માં નર્મદાની ઉત્તરવાહીની પરિક્રમાનું અનેરું મહત્ત્વ, ઉમટી રહી છે શ્રદ્ધાળુઓની ભીડ

ગુજરાતની જીવાદોરી ગણાતી નર્મદા નદીનું જેટલું મહત્ત્વ લોકકલ્યાણ માટે છે, તેટલું જ મહત્ત્વ આ મહાન નદીની પાવન પરિક્રમાનું છે.. હાલ પવિત્ર ચૈત્ર માસ ચાલી રહ્યો છે, ત્યારે દેશભરમાંથી સેંકડોની સંખ્યામાં શ્રદ્ધાળુઓ 'મા રેવા'ની પાવન પરિક્રમાએ ઉમટી રહ્યાં છે.આવો જાણીએ મા નર્મદાની પંચકોશી ઉત્તરવાહીની પરિક્રમાનું મહત્વ 

મા રેવાનાં નામે ઓળખાતી પવિત્ર નર્મદા નદીનું ધાર્મિક મહત્વ અનોખું છે.મધ્યપ્રદેશના અમરકંટકથી નીકળી ગુજરાતની ધરાને પાવન કરી દરિયાને મળતી નર્મદા નદીની પરિક્રમા કરનાર ભાગ્યશાળી હોય છે અને તે વ્યક્તિને પુણ્યની પ્રાપ્તિ થાય છે. વેદો અને ઇતિહાસમાં મા નર્મદાને દેવીનું સ્થાન આપવામાં આવ્યું છે અને તેથી જ જેટલું ધાર્મિક મહત્ત્વ દેવી દેવતાઓનાં પૂજનનું છે, તેટલું જ મહત્ત્વ માં નર્મદાની આરાધના અને તેની પાવન પરિક્રમાનું છે. મોટાભાગનાં ગુજરાતની તરસ છીપાવતી અને ખેડૂતો માટે આશીર્વાદરૂપ એવી નર્મદા નદીની પરિક્રમા એ મનુષ્યના પાપોનો નાશ કરી પુણ્ય પ્રદાન કરે છે તેથી જ હાલ ચૈત્ર મહિનામાં મા નર્મદાની ઉત્તરવાહીની પરિક્રમા કરવા શ્રદ્ધાળુઓનું ઘોડાપૂર ઉમટી રહ્યું છે..