રાજકોટમાં દારુની મહેફીલ પર મહિલાઓની રેડનો મામલો , મહિલાઓએ પરિવારજનો માટે માંગ્યું પોલીસ પ્રોટેક્શન

રાજકોટ શહેરમાં રવિવારના રોજ દારૂની મહેફિલ માણનારા લોકોને રણચંડી બનેલી મહિલાઓની મદદથી પોલીસે ઝડપી પાડ્યા બાદ આજરોજ આરોપીઓ સામે પંચનામાની કાર્યવાહી કરવામાં આવી.. 

મહત્વપૂર્ણ છે કે ગઇકાલે સ્થાનિક મહિલાઓએ આરોપીઓને ઝડપી પાડવામાં પોલીસની મદદ કરી હતી. સ્થાનિક મહિલાઓનું કહેવું હતું કે તેમણે 100 નંબર ઉપર ફોન કર્યો હતો પરંતુ તેમને જણાવવામાં આવ્યું હતું કે હાલ એક પણ પોલીસ વેન ફ્રી નથી. જેના કારણે સૌ પ્રથમ તેઓ આમ્રપાલી પોલીસ ચોકી ખાતે ગયા હતા.  જ્યાં તેમને જણાવવામાં આવ્યું હતું કે, હદ તેમની નહીં પરંતુ ગાંધીગ્રામ મુખ્ય પોલીસ સ્ટેશનની લાગે છે. જેના કારણે મહિલાઓએ ગાંધીગ્રામ મુખ્ય પોલીસ સ્ટેશન સુધી ધક્કા થયા હતા. ત્યારે સમગ્ર મામલે મહિલાઓ રણચંડી બનતા પોલીસે ચાર જેટલા આરોપીઓને ઝડપી પાડ્યા છે. ત્યારે આજરોજ તમામ આરોપીઓને ઘટના સ્થળે લાવવામાં આવ્યા હતા. જ્યાં જરૂરી પંચનામા ની કાર્યવાહી પૂર્ણ કરવામાં આવી હતી. 

ઉલ્લેખનીય છે કે સમગ્ર મામલે મહાનગરપાલિકામાં ક્લાર્ક તરીકે ફરજ બજાવતો કશ્યપ ઠાકર પણ સામેલ છે. ત્યારે પોલીસને સમગ્ર મામલે ગુનો નોંધી તમામ આરોપીઓની ધરપકડ કરી છે. પરંતુ આ સમગ્ર મામલાની નોંધ પોલીસ દ્વારા પોતાના ડેઇલી રિપોર્ટમાં જણાવવામાં ન આવતા ફરી એક વખત રાજકોટ પોલીસની કાર્યવાહી પર સવાલો ઉઠી રહ્યા છે. તો બીજી તરફ મહિલાઓએ મીડિયા ની સમક્ષ તેમને અને તેમના પરિવારજનોને આવારા તત્વોથી પોલીસ પ્રોટેક્શન મળે તે બાબતની માગણી કરી છે. 

આ પણ વાંચોઃ સમરોલી ગામેથી વિદેશી દારૂ સાથે માતા પુત્રની ગાંધીનગર પોલીસે કરી ધરપકડ, ચાર લોકોને વોન્ટેડ જાહેર કર્યા