વડોદરામાં યુવકે જાહેરમાં દારૂની બોટલો લહેરાવી, પીઆઇએ કહ્યું, "એમાં શું.. આ તો નોર્મલ છે "

રાવપુરા પોલીસ મથકનાં જવાબદાર અધિકારીનાં આ પ્રકારનાં બેજવાબદારીભર્યા ઉત્તરથી સમજી શકાય છે કે, વડોદરામાં બુટલેગરો કેમ આટલાં બેફામ બન્યાં છે.કેમ બૂટલેગરોને પોલીસનો ડર નથી રહ્યો.પોલીસનાં આશીર્વાદ સિવાય વડોદરામાં ધમધમતાં દારૂનાં ધંધા શક્ય નથી.  તે પણ આ મહિલા પીઆઇનાં વર્તન પરથી સમજી શકાય છે.
વડોદરાનું આ એ જ રાવપુરા પોલીસ મથક છે જે બૂટલેગરો સાથેની સાંઠગાંઠને લઇને બદનામ છે. થોડાં દિવસો અગાઉ રાવપુરા પોલીસે તેમની હદમાં એક બુટલેગરને ત્યાં રેઇડ કરી હતી,પણ બુટલેગરને પકડ્યો નહોતો.જ્યારે ત્યારબાદ તરત જ પીસીબીએ ત્યાં જ દરોડો પાડતાં વિદેશી શરાબ સાથે બુટલેગરને ઝડપી લીધો હતો.જેથી રાવપુરા પોલીસની બુટલેગર સાથેની મિલીભગત ખુલ્લી પડી ગઇ હતી. વડોદરા પોલીસ કમિશ્નરે મોટી કાર્યવાહી કરતાં રાવપુરા પોલીસ મથકનાં આખેઆખા સ્ટાફને બદલી 84 કર્મચારીઓની બદલી કરી નાંખી હતી.

એસીપીને તપાસ સોંપાઇ 
જો કે, 'ગુજરાત ફર્સ્ટ ન્યુઝ'નાં અહેવાલથી વડોદરા પોલીસની ફજેતી થતાં પોલીસે વાયરલ વીડિયોમાં દેખાતાં દર્શન પંચાલ નામનાં યુવકની ધરપકડ કરી હતી અને રાવપુરા પોલીસ પર લાગેલાં હપ્તાબાજીનાં આક્ષેપો અંગે તપાસનાં આદેશ આપ્યાં હતાં. ડીસીપી ઝોન 2 જયરાજસિંહ વાળાએ આ અંગે તપાસ કરવા એસીપી ડી ડિવિઝન એ.વી.રાજગોરને જવાબદારી સોંપી છે.જો તપાસમાં સત્યતા બહાર આવશે તો વધુ એક વાર રાવપુરા પોલીસ પર તવાઇ આવી શકે છે