ધર્મશાળામાં આજે સવારથી પડી રહ્યો છે વરસાદ, શું ધોવાઈ જશે ભારત-શ્રીલંકા મેચ?

ભારત અને શ્રીલંકા વચ્ચે ચાલી રહેલી T20 શ્રેણીમાં ભારતે પ્રથમ મેચ સરળતાથી જીતી લીધી હતી પરંતુ હવે ટીમને થોડું ધ્યાન આપવાની જરૂર છે. કારણ કે ધર્મશાલાના મેદાન પર ભારતની જીતના આંકડા કોઇ ખાસ સારા નથી. શ્રીલંકાની ટીમે અહીં સારૂ પ્રદર્શન કર્યું છે. તેથી જો રોહિત શર્માએ પોતાની જીતનો સિલસિલો જાળવી રાખવો હોય તો તેણે શ્રીલંકાને હળવાશથી લેવાનું ટાળવું પડશે.

ભારત અને શ્રીલંકા વચ્ચે ત્રણ મેચની T20I શ્રેણીની બીજી મેચ આજે ધર્મશાળાના હિમાચલ પ્રદેશ ક્રિકેટ એસોસિએશન સ્ટેડિયમ (HPCA) ખાતે રમાશે. પ્રથમ મેચ 62 રને જીત્યા બાદ ભારતે શ્રેણીમાં 1-0ની સરસાઈ મેળવી લીધી છે. બીજી મેચ જીત્યા બાદ ટીમ ઈન્ડિયા શ્રેણીમાં 2-0થી અજેય સરસાઈ મેળવી લેશે. જો કે, ભારતે તેના માટે થોડી વધુ રાહ જોવી પડશે કારણ કે ધર્મશાળામાં રાતથી જ વરસાદ પડી રહ્યો છે અને સવાર સુધી આવી જ પરિસ્થિતિ જોવા મળી રહી છે. જેના કારણે મેચ ધોવાઈ જવાની શક્યતાઓ દેખાઈ રહી છે. ભારતે આ સ્ટેડિયમમાં શ્રીલંકા સામે તેની ત્રીજી અને અંતિમ T20 મેચ પણ રમવાની છે. ધર્મશાલા સહિત હિમાચલ પ્રદેશના અનેક જિલ્લાઓમાં મોડી રાતથી મુશળધાર વરસાદ પડી રહ્યો છે. હવામાન વિભાગે આ જિલ્લાઓમાં યલો એલર્ટ જાહેર કર્યું છે. મીડિયા રિપોર્ટ્સ અનુસાર, વિભાગે મેચના દિવસે એટલે કે શનિવારે સતત વરસાદ અને હિમવર્ષા થવાની સંભાવના વ્યક્ત કરી છે.