Kheda : સંતાન ન થવા મુદ્દે વારંવાર થતા ડખા, પતિ વારંવાર કરતો પત્ની સાથે મારઝૂડ

ખેડા જિલ્લાના ફાગવેલ પાસે આવેલા દાદાના મુવાડા ગામે એક હૃદયદ્રાવક ઘટના બની છે. લગ્નજીવનના લાંબા સમય બાદ પણ સંતાન ન થવાના કારણે એક દંપતી વચ્ચે અવારનવાર ઝઘડા થતા હતા. પતિની મારઝૂડથી કંટાળીને પત્ની પોતાના પિયર રહેવા આવી ગઈ હતી. ગઈકાલે પતિ પત્નીને મળવા પિયર પહોંચ્યો હતો, જ્યાં બંને વચ્ચે ફરીથી ઉગ્ર બોલાચાલી થઈ હતી. વિવાદ એટલો વધ્યો કે પતિએ ગુસ્સા પરનો કાબૂ ગુમાવ્યો અને પત્નીના માથામાં લોખંડના દસ્તાના બે ઘા ઝીંકી દીધા. ગંભીર ઈજાના કારણે પત્નીનું ઘટનાસ્થળે જ કરુણ મૃત્યુ નીપજ્યું હતું. સંતાન મેળવવાની ઘેલછા અને ક્ષણિક આવેશમાં એક હસતો-રમતો પરિવાર કાયમ માટે વિખેરાઈ ગયો છે. પોલીસે આ મામલે ગુનો નોંધી આગળની કાર્યવાહી હાથ ધરી છે.