મોરબીમાં રહસ્યમય કૂવો બન્યો ચર્ચાનો વિષય, પાણી આપમેળે થવા લાગ્યું હાલક-ડોલક

Morbi News: મોરબી (Morbi) તાલુકાના વીરપરડા (Virparda) ગામે આવેલા એક રહસ્યમય કૂવામાંથી એક અચરજ પમાડે તેવી કુદરતી ઘટના સામે આવી છે. કૂવામાં રહેલું પાણી કોઈ પણ દેખીતા કારણ વગર આપમેળે ઉછળવા અને હાલક-ડોલક થવા લાગતાં સ્થાનિક ગ્રામજનોમાં ભારે કૌતુક અને આશ્ચર્ય ફેલાયું છે. બે દિવસ અગાઉ બનેલી આ ઘટના બાદ વચ્ચે થોડો સમય હલચલ શાંત પડી હતી, પરંતુ ગત બપોરથી કૂવાના પાણીમાં ફરીથી તે જ પ્રકારે વિચિત્ર હલચલ શરૂ થઈ જતાં સમગ્ર પંથકમાં ચર્ચાનો વિષય બન્યો છે.

સ્થાનિકોના જણાવ્યા અનુસાર, વીરપરડા (Virparda) ગામના આ કૂવામાં બે દિવસ પહેલાં સૌપ્રથમવાર પાણીમાં ઉકાળા આવતા હોય તે પ્રકારની હલચલ જોવા મળી હતી. તે ઘટના બાદ ગતકાલ બપોર સુધી કૂવાનું પાણી સામાન્ય થઈ ગયું હતું. પરંતુ, ગતકાલે બપોરે 3 વાગ્યાના અરસપરસમાં કૂવાનું પાણી ફરીથી આપમેળે ઉછળવા લાગ્યું હતું અને અંદર ભારે હલચલ શરૂ થઈ ગઈ હતી. કૂવામાં અચાનક થતી આ પ્રકારની પ્રવૃત્તિ જોવા માટે આસપાસના વિસ્તારોમાંથી લોકોના ટોળાં ઉમટી પડ્યા હતા.