Patan : હારીજમાં વેપારી લૂંટાયો, છરી બતાવીને 2.70 લાખ પડાવ્યા

પાટણના હારીજ વિસ્તારમાં ગત દિવસોમાં એક વેપારી પાસેથી છરીની અણીએ ₹2.70 લાખની સનસનીખેજ લૂંટ થઈ હતી. આ ઘટનાને ગંભીરતાથી લઈને પાટણ પોલીસ હરકતમાં આવી હતી. LCB, SOG અને હારીજ પોલીસની અલગ-અલગ ટીમોએ તપાસનો ધમધમાટ શરૂ કર્યો હતો. ટેકનિકલ સર્વેલન્સ અને હ્યુમન ઇન્ટેલિજન્સની મદદથી પોલીસે માત્ર 48 કલાકમાં જ લૂંટનો ગુનો ઉકેલી નાખ્યો છે. આ લૂંટમાં સંડોવાયેલી મધ્યપ્રદેશની ગેંગના 6 સભ્યોની ધરપકડ કરવામાં આવી છે. પોલીસ તપાસમાં તેમની પાસેથી ₹2.50 લાખની રોકડ અને લૂંટમાં વપરાયેલા બે બાઈક સહિતનો મુદ્દામાલ જપ્ત કરવામાં આવ્યો છે. હાલમાં પોલીસ એ દિશામાં તપાસ કરી રહી છે કે આ પરપ્રાંતીય ટોળકીને વેપારી અંગેની ચોક્કસ બાતમી કોણે આપી હતી અને આ ગેંગ અન્ય કેટલા ગુનાઓમાં સંડોવાયેલી છે.