માર્કેટમાંથી તૈયાર લોટ લઈને ખાતા લોકો ચેતી જજો, જાણો શું રિપોર્ટ આવ્યો

GTUના ગ્રેજ્યુએટ સ્કૂલ ઓફ ફાર્મસીના  સંશોધનમાં ચોંકાવનારું તારણ બહાર આવ્યું છે. સંશોધન મુજબ બજારમાં મળતા તૈયાર લોટમાં બેનઝાઇલ પેરોકસાઇડ મોટા પ્રમાણમાં જોવા મળ્યું છે. સરકારે પ્રતિ કિલોએ 40 મિલી ગ્રામની પરમિશન આપી છે પરંતુ 20 ટકા કંપનીના લોટમાં 60 મિલી ગ્રામ કરતા વધુ બેનઝાઇલ પેરોકસાઇડ જોવા મળ્યું છે. 20 ટકા સેમ્પલ ટેસ્ટમાં 40 મિલી ગ્રામ કરતા વધુ માત્રામાં જોવા મળ્યું છે. જો લોટમાં બેનઝાઇલ પેરોકસાઇડ વધુ પ્રમાણમાં હોય તો લિવર ડેમેજ થાય છે અને કેન્સર જેવી ભયંકર બીમારી પણ થઇ શકે છે. 

સમગ્ર વિશ્વ 19 એપ્રિલના રોજ વિશ્વ લિવર દિવસની ઉજવણી કરે છે. વર્તમાન સમયમાં પેકિંગવાળા ખોરાકો અને તેની સાચવણી માટે વપરાતાં જરૂરીયાતથી વધુ માત્રામાં રસાયણીક તત્વોને કારણે તે પદાર્થ અખાદ્ય બની જતો હોય છે. જેનાથી માનવ શરીરના મહત્વના અંગ એવા લિવર સંબધીત અનેક રોગ થતાં જોવા મળે છે. તાજેતરમાં જ  ગુજરાત ટેક્નોલોજીકલ યુનિવર્સિટી (જીટીયુ) સંચાલિત ગ્રેજ્યુએટ સ્કૂલ ઑફ ફાર્મસીના (જીએસપી) આસિસ્ટન્ટ પ્રો. ડૉ. કશ્યપ ઠુમ્મરના માર્ગદર્શન હેઠળ માસ્ટર ઓફ ફાર્મસીની વિદ્યાર્થીની મનાલી મહેન્દ્રસિહ પવાર દ્વારા પેકિંગ ઘંઉના લોટ અને મેદાની ચકાસણી સંદર્ભે મેથડ વિકસાવવામાં આવી છે.