ઉદયપુર હત્યાકાંડના આરોપીઓને પકડનારા શૌકત સહિત 5 પોલીસકર્મીઓને પ્રમોશન અપાશે

રાજસ્થાનના ઉદયપુરમાં કન્હૈયા લાલની ઘાતકી હત્યાએ સમગ્ર દેશને હચમચાવી નાખ્યો છે. આ કેસમાં બંને આરોપીઓ સામે કાર્યવાહી કરવામાં આવી રહી છે. દરમિયાન, રાજ્યની અશોક ગેહલોત સરકારે આ ઘટનામાં સંડોવાયેલા આરોપીઓને પકડનાર પાંચેય પોલીસકર્મીઓને ખાસ ભેટ આપી છે. ઉદયપુરની ઘટનામાં સંડોવાયેલા આરોપીઓને ઝડપી ધરપકડ કરનારા પાંચ પોલીસકર્મીઓ તેજપાલ, નરેન્દ્ર, શૌકત, વિકાસ અને ગૌતમને રાજ્ય સરકારે આઉટ ઓફ ટર્મ પ્રમોશન આપવાનો નિર્ણય કર્યો છે.

રાજસ્થાનના મુખ્ય પ્રધાન અશોક ગેહલોતે બુધવારે કહ્યું હતું કે ઉદયપુરની ઘટના કોઈ નાની ઘટના નથી અને જ્યાં સુધી આરોપીઓ આંતરરાષ્ટ્રીય અથવા રાષ્ટ્રીય સ્તરે કોઈ સંબંધ ધરાવતા ન હોય ત્યાં સુધી તે થઈ શકે નહીં. તેમણે કહ્યું કે આ ઘટનાની તપાસ એ ધ્યાનમાં રાખીને કરવામાં આવી રહી છે કે જે લોકોએ હત્યા કરી હતી, તેમનું કાવતરું શું હતું, તેઓ કોની સાથે સંપર્કમાં છે, તેઓ કોઈ રાષ્ટ્રીય-આંતરરાષ્ટ્રીય એજન્સીના સંપર્કમાં છે કે કેમ તે ખુલાસો થઇ શકે. 

 ઉદયપુરના ધનમંડી પોલીસ સ્ટેશન વિસ્તારમાં મંગળવારે ધોળા દિવસે કન્હૈયા લાલ નામના દરજીની બે મુસ્લિમ શખ્સોએ હત્યા કરી નાખી હતી. પોલીસના જણાવ્યા અનુસાર, ધનમંડી પોલીસ સ્ટેશન વિસ્તારમાં ટેલર કન્હૈયાલાલની ગળું કાપીને હત્યા કરવામાં આવી હતી. આ ગુનાને અંજામ આપવા બદલ રિયાઝ મોહંમદ અને ગોસ મોહમ્મદની ધરપકડ કરવામાં આવી હતી. બંને આરોપીઓની રાજસમંદ જિલ્લાના ભીમા વિસ્તારમાંથી ધરપકડ કરવામાં આવી હતી.

બુધવારે જયપુરમાં કાયદો અને વ્યવસ્થાની સમીક્ષા બેઠક પહેલા પત્રકારો સાથે વાત કરતા ગેહલોતે કહ્યું, અમે આ ઘટનાને ગંભીરતાથી લઈ રહ્યા છીએ. આ ઘટના નાની નથી અને આંતરરાષ્ટ્રીય કે રાષ્ટ્રીય સ્તરે કોઈ કટ્ટરપંથી તત્વ સાથે સંબંધિત ન હોય ત્યાં સુધી તે બની શકે નહીં. જેથી તેની તપાસ શરૂ કરવામાં આવી છે.

        

ગેહલોતે કહ્યું કે આ ઘટના ઘણી મોટી અને ઘૃણાસ્પદ છે. તેમણે કહ્યું, ગઈકાલે પણ મેં કહ્યું હતું કે જેટલી નિંદા કરીએ તે ઓછી છે અને તેથી જ અમે SITની રચના કરી છે, SITએ પોતાનું કામ શરૂ કરી દીધું છે.

        

મંગળવારે દરજીની હત્યાની ઘટના બાદ શહેરમાં સર્જાયેલા તણાવને ધ્યાનમાં રાખીને જિલ્લાના સાત પોલીસ સ્ટેશન વિસ્તારમાં કર્ફ્યુ લાદવામાં આવ્યો હતો. રાજ્યભરમાં મોબાઈલ ઈન્ટરનેટ સેવા 24 કલાક માટે સ્થગિત કરવામાં આવી હતી અને આગામી એક મહિના માટે રાજ્યમાં પ્રતિબંધિત આદેશો લાદવામાં આવ્યા હતા.