બહુચરાજી મંદિર ટ્રસ્ટના ટ્રસ્ટીઓના 4 મહિનામાં રાજીનામા

શક્તિપીઠ બહુચરાજી માતાજી ટેમ્પલ ટ્રસ્ટમાં 23 ઓગસ્ટ 2022માં નવીન ટ્રસ્ટી મંડળની રાજ્ય સરકાર દ્વારા રચના કરવામાં આવી હતી. આ વ્યવશ્થાપન કમિટીમાં રાજ્ય સરકાર દ્વારા બિનરાજકીય સભ્યો સાથે સાથે બીજેપી, RSS તેમજ પૂર્વ સાંસદનો સમાવેશ કરવામાં આવ્યો હતો.

આ ટ્રસ્ટી મંડળમાં પ્રથમ મિટિંગમાં જ જીતેન્દ્રભાઈ મોદીએ રાજીનામુ ધરી દીધું હતું ત્યાર બાદ વિધાનસભાની ચૂંટણી જાહેર થતા બીજેપીના બે  ઉમેદવાર બળવંતસિંહ રાજપૂત તેમજ શુખાજી ઠાકોરને ટિકિટ મળતા આ બંનેએ પણ રાજીનામાં આપ્યા હતા. હવે વાત એવી સામે આવી કે અન્ય ટ્રસ્ટીઓને સરકાર તરફથી બે થી ત્રણ દિવસમાં પહેલાજ ટેલિફોનિક સૂચના આપી કે તમામે રાજીનામાં લખી મોકલી આપવા.

આ સૂચનાને પગલે  બાકીના તમામ ટ્રસ્ટીઓએ સૂચનાનું પાલન કરી રાજીનામાં મોકલી આપ્યા છે ત્યારે 4 મહિના જેટલા ટૂંકા ગાળામાં રાજીનામાંનો દોર શરૂ થતાં અટકળો ફરતી થઈ છે. સવાલ એ ઉભા થઇ રહ્યા છે કે એવું તો શું બન્યું કે ટ્રસ્ટી મંડળ વિખેરવાની ફરજ પડી? આ બાબતે ટ્રસ્ટી ઓ સાથે ટેલિફોનિક વાતચીત કરતા તેઓ કોઈ કારણ થી અજાણ છે. હવે જોવાનું એ રહ્યું કે હવે નવું ટ્રસ્ટી મંડળ બને છે કે કેમ ? અને બને છે તો ક્યારે અને નવા કયા ચહેરાઓ ને ટ્રસ્ટી મંડળ માં સ્થાન મળે છે.

આ પણ વાંચો - બહુચરાજી સિવિલમાં ડોકટરનો પૂરતો સ્ટાફ નહીં મળતા દર્દીઓ પરેશાન