શ્રીલંકામાં સ્થિતિ બેકાબૂ, આજે રાત્રે 8 વાગ્યાથી સમગ્ર દેશમાં કર્ફ્યુ

શ્રીલંકાની
સ્થિતિ દિવસે દિવસે કથળી રહી છે. શ્રીલંકામાં આર્થિક સંકટની સાથે સાથે મોંઘવારીએ
માજા મુકી છે. જેના પગલે લોકોને રસ્તા પર ઉતરવાની ફરજ પડી છે. હાલ શ્રીલંકામાં
લોકો દેખાવ અને વિરોધ કરી રહ્યા છે. જેના પગલે સરકારની ચિંતા વધી રહી છે. શ્રીલંકામાં ગંભીર આર્થિક
સંકટ વચ્ચે દેખાવો ઉગ્ર બન્યા છે. ધીમે ધીમે સ્થિતિ બગડી રહી છે. દરમિયાન
પરિસ્થિતિ બેકાબૂ બનતી જોઈને આજ રાતથી કર્ફ્યુ લાદી દેવામાં આવ્યો છે. આજે રાત્રે 8 વાગ્યાથી મંગળવારે સવારે 5 વાગ્યા સુધી કર્ફ્યુ લાગુ
રહેશે. રાષ્ટ્રપતિના મીડિયા વિભાગે આ માહિતી આપી છે.

શ્રીલંકા આઝાદી બાદથી ગંભીર
આર્થિક સંકટમાંથી પસાર થઈ રહ્યું છે. દેશમાં મોંઘવારી તેની ટોચ પર છે. વીજળીની
કટોકટી સાથે પેટ્રોલ અને ડીઝલ સહિતની રોજીંદી ચીજવસ્તુઓની ભારે અછત છે. રવિવારે
દેશના નવા વડાપ્રધાન રાનિલ વિક્રમસિંઘે કહ્યું કે ઘણું કરવાનું બાકી છે. અમે
બાબતોને પ્રાથમિકતા આપી રહ્યા છીએ. દેશમાં આર્થિક સંકટને લઈને રાષ્ટ્રપતિ ગોટાબાયા
રાજપક્ષે અને તેમના પરિવાર વિરુદ્ધ વ્યાપક વિરોધ પ્રદર્શન ચાલી રહ્યા છે. સરકાર
સમર્થકો અને વિરોધીઓ વચ્ચેની અથડામણમાં નવ લોકોએ જીવ ગુમાવ્યા છે જ્યારે સેંકડો
ઘાયલ થયા છે. જે પછી વડા પ્રધાન મહિન્દા રાજપક્ષેને રાજીનામું આપવાની ફરજ પડી હતી
અને વિક્રમસિંઘેને નવા વડા પ્રધાન તરીકે નિયુક્ત કરવામાં આવ્યા હતા.

વિરોધીઓનું કહેવું છે કે
જ્યાં સુધી ગોટાબાયા રાજપક્ષે રાષ્ટ્રપતિ રહેશે ત્યાં સુધી તેઓ તેમનું અભિયાન ચાલુ
રાખશે. તેમણે વિક્રમસિંઘેને કઠપૂતળી પણ કહ્યા અને ચાર કેબિનેટ મંત્રીઓની તેમની
નિમણૂકની ટીકા કરી. શ્રીલંકા 1948 માં તેની આઝાદી પછીથી રોગચાળા, વધતી જતી તેલની કિંમતો અને રાજપક્ષે દ્વારા લોકશાહી કરમાં કાપને
કારણે ગંભીર આર્થિક સંકટમાં ફસાઈ ગયું છે.