નીરજ ચોપરાને લઇને આવ્યા સૌથી મોટા સમાચાર, કોમનવેલ્થ ગેમ્સ 2022માં નહીં લે ભાગ, જાણો કારણ

26 જુલાઈ મંગળવારના રોજ કોમનવેલ્થ ગેમ્સ પહેલા ભારતીય ટુકડીને મોટો આંચકો લાગ્યો છે. ભારતના સ્ટાર એથ્લેટ અને ભાલા ફેંકના ખેલાડી નીરજ ચોપરા ઈજાના કારણે બર્મિગહામ કોમનવેલ્થ ગેમ્સમાંથી બહાર થઇ ગયા છે. તાજેતરમાં તેણે વર્ડ એથ્લેટિક્સ ચેમ્પિયનશીપમાં સિલ્વર મેડલ જીત્યો હતો. નોંધનીય છે કે, યુજેનમાં આયોજિત આ ચેમ્પિયનશીપના અંતિમ રાઉન્ડમાં પણ તે કેટલીક મુશ્કેલીમાં જોવા મળ્યો હતો. જણાવી દઈએ કે, બર્મિંગહામમાં 28 જુલાઈથી શરૂ થઈ રહેલા કોમનવેલ્થ ગેમ્સ માટે નીરજ ચોપરાને ભારત માટે મેડલની મોટી આશા માનવામાં આવી રહી હતી. પરંતુ ગ્રોઈન ઈન્જરી એટલે કે જાંઘની ઈજાને કારણે તે હવે આ ગેમ્સમાં ભાગ લઈ શકશે નહીં. તેની સમસ્યા વર્લ્ડ એથ્લેટિક્સ ચેમ્પિયનશિપના અંતિમ રાઉન્ડમાં પણ જોવા મળી હતી જ્યાં છેલ્લા બે પ્રયાસોમાં તે ફાઉલ કરતો જોવા મળ્યો હતો અને તેની જાંઘ પર પટ્ટી બાંધીને ડગઆઉટમાં બેઠો હતો.