સામાન્ય જનતાને લાગ્યો મોંઘવારીનો ફટકો, LPG સિલિન્ડરની કિંમતમાં એકવાર ફરી વધારો

મોંઘવારીના આ સમયે સામાન્ય નાગરિક કેવી રીતે પોતાનું ગુજરાન ચલાવે છે તે કોઇનાથી ચુપાયેલું નથી. રોજ કોઇને કોઇ ચીજ-વસ્તુઓના ભાવ વધતા તેમનું જીવન ઘણું પ્રભાવિત થાય છે. મહત્વનું છે કે, સામાન્ય માણસને મોંઘવારીનો વધુ એક ફટકો પડ્યો છે. 

લિક્વિફાઇડ પેટ્રોલિયમ ગેસ (LPG) સિલિન્ડરની કિંમતમાં 50 રૂપિયાનો વધારો કરવામાં આવ્યો છે. નવીનતમ સંશોધન સાથે, ઘરેલું LPG સિલિન્ડર દિલ્હીમાં રૂ. 999.50માં વેચાશે. થોડા દિવસો પહેલા કોમર્શિયલ ગેસ સિલિન્ડરના ભાવમાં ભારે વધારો થયો હતો અને 19 કિલોના ગેસ સિલિન્ડરની કિંમત હવે 2355 રૂપિયા થઈ ગઈ છે. વળી, ભૂતકાળમાં પાઇપલાઇન ગેસ (PNG)ના ભાવમાં પણ સતત વધારો થયો હતો. ગેસના ભાવ વધારાના કારણે સામાન્ય લોકોને મોંઘવારીનો મોટો ઝટકો લાગ્યો છે. સાથે જ ખાદ્ય ચીજવસ્તુઓના ભાવ વધારાની પ્રક્રિયા સતત ચાલુ છે અને મોંઘવારીથી ત્રસ્ત લોકો માટે કોઇ પણ જગ્યાએથી રાહતના સંકેત દેખાઇ રહ્યા નથી. આ પહેલા છેલ્લી વખત 22 માર્ચ 2022ના રોજ ઘરેલુ ગેસ સિલિન્ડરની કિંમતમાં 50 રૂપિયાનો વધારો કરવામાં આવ્યો હતો, ત્યારબાદ દિલ્હીમાં ગેસ સિલિન્ડરની કિંમત 949.50 રૂપિયા થઈ ગઈ હતી. ત્યારબાદ કોલકાતામાં ગેસ સિલિન્ડર 976 રૂપિયામાં મળતો હતો. 

આ ઉપરાંત, 1 માર્ચ, 2022 ના રોજ કોમર્શિયલ LPGની કિંમતમાં 105 રૂપિયાનો વધારો કરવામાં આવ્યો હતો. પેટ્રોલ અને પેટ્રોલિયમ ઉત્પાદનોમાં તાજેતરના ભાવમાં વધારો રશિયા-યુક્રેનની પરિસ્થિતિના પરિણામે વૈશ્વિક ઉર્જાના ભાવમાં તીવ્ર વધારાને કારણે છે, જેના કારણે પુરવઠાની ચિંતા વધી છે. ઉલ્લેખનીય છે કે, પેટ્રોલ અને ડીઝલના ભાવ, રાંધણગેસના ભાવ અને જીવનજરૂરી ચીજવસ્તુઓના ભાવ સતત લોકોના ખિસ્સા પર બોજ વધારી રહ્યા છે. વધતી મોંઘવારી વચ્ચે હવે તમારી લોન પણ મોંઘી થશે, કારણ કે RBIએ રેપો રેટમાં પણ વધારો કર્યો છે. દલીલ એવી છે કે, આ વધારો મોંઘવારી પર અંકુશ મેળવવા માટે કરવામાં આવ્યો છે. હવે સવાલ એ છે કે શું મોંઘી લોનથી મોંઘવારી અટકશે? છેલ્લા કેટલાક દિવસોમાં ઈંધણના ભાવમાં જોરદાર વધારો થયો છે. ત્યારે સવાલ થાય છે કે, આવી સ્થિતિમાં સામાન્ય માણસ કેવી રીતે ઘરનું બજેટ સંભાળે તે શું સરકાર સમજે છે ખરા?