અયોધ્યામાં રામમંદિર નિર્માણ સ્થળે ગર્ભગૃહનો શિલાન્યાસ કરાયો

અયોધ્યામાં ચાલી રહેલા રામ મંદિર નિર્માણ માટે આજનો દિવસ ઐતિહાસીક દિવસ છે. મુખ્યમંત્રી યોગી આદિત્યનાથે આજે મંદિરના ગર્ભ ગૃહની આધારશિલા રાખી શિલાન્યાસ કર્યો હતો અને તેની સાથે જ વર્ષોથી કોતરીને રખાયેલા પથ્થરનો ઉપયોગ શરુ કરાયો હતો. 

આજથી જ 20 મેથી શરુ થયેલા સર્વદેવ અનુષ્ઠાનનું પણ સમાપન થયું હતું. હવે મુખ્યમંત્રી યોગી નિર્માણ સ્થળની પાસે દ્રવિડ શૈલીમાં બની રહેલા મંદિરના પ્રાણ પ્રતિષ્ઠા કાર્યક્રમમાં સામેલ થશે. 

ગર્ભ ગૃહનો પહેલો પથ્થર મુક્યા બાદ મીડિયા સાથે વાત કરતા સીએમ યોગીએ કહ્યું કે આજથી શિલાઓ રાખવાનું કામ તેજીથી શરુ કરાશે. હવે એ દિવસો દુર નથી જ્યારે મર્યાદા પુરષોત્તમ ભગવાન રામનું ભવ્ય મંદિર અયોધ્યા ધામમાં બનીને તૈયાર થઇ જશે. આ મંદિર ભારતનું રાષ્ટ્ર મંદિર હશે. 

આ અગાઉ તેઓ મુખ્યમંત્રી  યોગી નિર્માણ સ્થળ પર પહોંચ્યા હતા અને મંત્રોચ્ચાર સાથે ગર્ભગૃહની આધારશિલા રાખી હતી. તેમણે હનુમાનગઢી પહોંચીને હનુમાનજીના દર્શન કર્યા હતા અને ત્યારબાદ શ્રી રામજન્મભૂમિ ખાતે પહોંચ્યા હતા.