ચીનમાં સ્થિતિ બેકાબૂ, સખત લોકડાઉનમાં ખાવાનું લૂંટતા જોવા મળ્યા લોકો

કોવિડ-19 મહામારીના સૌથી ખરાબ તબક્કામાંથી પસાર થઈ રહેલા ચીનના સૌથી મોટા શહેર શાંઘાઈની સ્થિતિ દિવસેને દિવસે ખરાબ થઈ રહી છે. 2.60 કરોડની વસ્તી ધરાવતું ચીનની આર્થિક રાજધાની શાંઘાઈ અત્યાર સુધીના સૌથી મોટા કોરોના વિસ્ફોટને કારણે છેલ્લા 22 દિવસથી લોકડાઉન હેઠળ છે. ઝીરો કોવિડ નીતિને લઈને અહીં કડક નિયંત્રણો લાગુ કરવામાં આવ્યા છે. ચીનના શાંઘાઈમાં ખોરાક અને દવાઓની અછતને કારણે મોટી સંખ્યામાં લોકો લોકડાઉન ઓર્ડર તોડીને રસ્તા પર ઉતરી આવ્યા છે. સપ્લાય પોઈન્ટ પર વિતરણ માટે રાખવામાં આવેલા ખાદ્યપદાર્થોના બોક્સ લોકોએ લૂંટી લીધા હતા. શાંઘાઈમાં લાગુ કરવામાં આવેલા કડક લોકડાઉનને કારણે લોકો જરૂરિયાત મુજબ ખાવા-પીવાની વસ્તુઓ મેળવી શકતા નથી. કડક વલણના કારણે લોકો ઘરની બહાર પણ નીકળી શકતા નથી.

શાંઘાઈમાં સંક્રમણના નવા કેસોની સંખ્યા સતત વધી રહી છે, જેના કારણે ચીનની 'ઝીરો કોવિડ' કેસની જાણીતી નીતિ પ્રશ્નના ઘેરામાં આવી છે. શી જિનપિંગની આગેવાની હેઠળની શાસક કમ્યુનિસ્ટ પાર્ટી ઑફ ચાઇના રવિવારે ચિંતિત જોવા મળી હતી કારણ કે શાંઘાઈમાં એક જ દિવસમાં ચેપના 24,944 નવા કેસ નોંધાયા હતા, જે સતત 9માં દિવસે નવો રેકોર્ડ છે. ચીનમાં હોમ આઇસોલેશન અથવા ક્વોરેન્ટિન પર પ્રતિબંધ છે. નાના બાળકોને પણ તેમના માતા-પિતાથી અલગ કરવામાં આવે છે અને જ્યારે તેઓને કોરોના થાય છે ત્યારે તેમને હોસ્પિટલમાં દાખલ કરવામાં આવે છે. જેને લઈને વાલીઓ નારાજ છે. 

ચીનની આર્થિક રાજધાની શાંઘાઈમાં કર્મચારીઓને તેમની ઓફિસમાં રાખવામાં આવી રહ્યા છે. તેમને ઘરે પણ જવા દેવામાં આવતા નથી. શાંઘાઈમાં, ફક્ત 2 લોકોને જ એપાર્ટમેન્ટમાંથી ખોરાક લેવા જવાની મંજૂરી છે. તે જ એપાર્ટમેન્ટમાં દરેક માટે ખોરાકનો પુરવઠો લાવે છે. શાંઘાઈમાં લોકડાઉનના 3 અઠવાડિયાથી વધુ સમય પછી પણ નવા કેસમાં ઘટાડો થયો નથી. જે હવે એક ચિંતાનું કારણ બન્યું છે. 

ઉલ્લેખનીય છે કે, શાંઘાઈ ચીનનું સૌથી મોટું શહેર તેમજ વૈશ્વિક નાણાકીય કેન્દ્ર છે. શાંઘાઈમાં છેલ્લા કેટલાક દિવસોમાં કોરોના વાયરસના ચેપના નવા કેસ દરરોજ 20 હજાર સુધી પહોંચી ગયા છે. શાંઘાઈમાં કોરોના વાયરસના ઓમિક્રોન સ્વરૂપનું સંક્રમણ ઝડપથી ફેલાઈ રહ્યું છે, જેના કારણે હોસ્પિટલોમાં બેડ ઉપલબ્ધ નથી. વળી, 26 મિલિયનની વસ્તીવાળા શાંઘાઈમાં લોકો પણ કડક લોકડાઉનનો સામનો કરી રહ્યા છે. જેના કારણે લોકોની સામે અનેક પ્રકારની સમસ્યાઓ ઉભી થઈ રહી છે.