સલૂનમાં નવી સ્ટાઇલથી વાળ કાપવાની હોશિયારી યુવકને પડી ભારે

રાજ્યમાં એક યુવકને વાળ કાપવાના સલૂનમાં અખતરા કરવું ભારે પડ્યું હતું. સામાન્ય રીતે તમે સલૂનમાં જાઓ છો તો ત્યા તમારા વાળને કાતરની મદદથી કાપવામાં આવે છે પરંતુ હવે નવા યુગમાં જાણે નવ યુવકો અવનવા પ્રયોગો કરવામાં માને છે. ત્યારે આજના સમયે ઘણા સલૂનમાં વાળ કાપવા માટે કાતરની નહીં પણ આગની મદદ લેવામાં આવે છે. આ અખતરા ઘણીવાર ભારે પડી જતા હોય છે. કઇંક આવું જ વલસાડના વાપીના સુલપડમાં બન્યું જ્યા એક યુવકને વાળ કાપવાના સલૂનમાં અખતરો કરવો ભારે પડી ગયો હતો. અહીં યુવકને કાતરથી વાળ કાપવાને બદલે સળગાવીને વાળ કાપતા વાળમાં આગ લાગી ગઇ હતી. આ આગ લાગવાની સાથે જ યુવકના સમગ્ર ચહેરાથી લઇને તેની ગર્દન સુધી પહોંચી હતી. વાળ કાપનાર વ્યક્તિએ આગને શાંત કરવા માટે પ્રયત્ન કર્યો પરંતુ આગ શાંત ન થતા ત્યા હાજર લોકો ડરી ગયા હતા. જોકે, થોડીવારમાં આ આગ ઓલવાઇ ગઇ પરંતુ ત્યા સુધી યુવક ઘણો દાઝી ગયો હતો. યુવક ગર્દનની બાજુએ વધારે દાઝી ગયો છે. આ સમગ્ર ઘટના મોબાઈલમાં કેદ થઇ છે. યુવકની હાલતને ધ્યાનમાં રાખી તેને તુરંત જ સિવિલ હોસ્પિટલમાં ખસેડાયો હતો. જ્યા તેની સારવાર ચાલી રહી છે.