જ્હોન અને રિતેશનો આજે જન્મ દિવસ, આવો જાણીએ તેમની રસપ્રદ માહિતી

બોલિવુડ અભિનેતાઓ જ્હોન અબ્રાહમ (John Abraham) અને રિતેશ દેશમુખ (Ritesh Deshmukh)નો જન્મદિન છે. આવો તેમના વિશે જાણીએ એવી વાતો જે કદાચ તમે અગાઉ નહીં જાણી હોય 

અભિનેતા જ્હોન અબ્રાહમે પોતાના કામથી બોલિવૂડમાં પોતાનું નામ તો બનાવ્યું જ છે પરંતુ તે તેની ઉત્તમ ફિટનેસ અને મસ્ક્યુલર બોડી માટે પણ જાણીતો છે. જ્હોન અબ્રાહમનો જન્મ 17 ડિસેમ્બર 1972ના રોજ થયો હતો. આજે જ્હોન તેનો 50મો જન્મદિવસ ઉજવી રહ્યો છે. મોડલિંગથી કરિયરની શરૂઆત કરનાર જ્હોનની શરૂઆતથી જ એક્શન હીરોની ઈમેજ હતી. જ્યારે તેણે કોમિકથી લઈને રોમેન્ટિક હીરો સુધીની ઘણી અલગ-અલગ ભૂમિકાઓ ભજવી છે. 

ફિલ્મોની દુનિયામાં પગ મૂકતા પહેલા જ્હોન અબ્રાહમ મોડલીંગ કરતો હતો અને એક એડ એજન્સી સાથે જોડાયેલો હતો. મળતી માહિતી મુજબ, જ્હોનને આ એજન્સી પાસેથી લગભગ 13,800 રૂપિયા મળતા હતા. ફિલ્મો પહેલા તેણે મ્યુઝિક વીડિયોમાં પણ કામ કર્યું હતું. મોડલીંગ દરમિયાન મહેશ ભટ્ટે જૉન અબ્રાહમને પોતાની ફિલ્મમાં કામ કરવાની તક આપી.

 તે સમયે મહેશ ભટ્ટ પોતાની ફિલ્મ 'જિસ્મ' માટે એક નવો ચહેરો શોધી રહ્યા હતા જે વ્યક્તિત્વમાં સંજય દત્ત જેવો હોય. મહેશ ભટ્ટની આ શોધનો જ્હોન સાથે અંત આવ્યો. તેણે જ્હોનને કહ્યું કે તે તેને જે ફિલ્મમાં લેવા માંગે છે તે ઑફબીટ હતી. આવી સ્થિતિમાં દર્શકો નક્કી કરશે કે તેમને ફિલ્મ ગમશે કે નહીં. જ્હોન અબ્રાહમે મહેશ ભટ્ટની આ શરત સ્વીકારી અને વર્ષ 2003માં ફિલ્મ 'જિસ્મ'થી ડેબ્યૂ કર્યું. પહેલી જ ફિલ્મ માટે તેમને ફિલ્મફેરનો બેસ્ટ ડેબ્યુ એવોર્ડ મળ્યો હતો. 17 થી 18 વર્ષની તેમની કારકિર્દીમાં, જ્હોને અભિનેતા તરીકે લગભગ 40 ફિલ્મો અને નિર્માતા તરીકે સાત ફિલ્મોમાં કામ કર્યું છે.

તમે જોન અબ્રાહમને ઘણી વખત બાઇક પર પોઝ આપતા જોયા હશે.  જ્હોન અબ્રાહમને બાઈકનો ખૂબ જ શોખ છે અને તેની પાસે બાઈકનું પણ ઘણું કલેક્શન છે. અંગત જીવનની વાત કરીએ તો તેણે NRI પ્રિયા રૂંચલ સાથે લગ્ન કર્યા છે.

બોલિવૂડ એક્ટર રિતેશ દેશમુખ એવા કલાકારોમાંથી એક છે જે કોમેડીથી લઈને ગંભીર સુધીની ભૂમિકાઓમાં સરળતાથી ફિટ થઈ શકે છે. તેણે અત્યાર સુધી હાઉસફુલ સિરીઝથી ધમાલ જેવી ઘણી કોમેડી ફિલ્મોમાં પોતાના અભિનયથી લોકોને પોતાની તરફ આકર્ષિત કર્યા છે. બીજી તરફ, એક વિલન માં નેગેટિવ પાત્ર ભજવીને રિતેશે સાબિત કર્યું છે કે તે કોઈપણ પાત્રને ખૂબ સારી રીતે ભજવી શકે છે. 

રિતેશે તેની ફિલ્મી સફર 'તુઝે મેરી કસમ'થી શરૂ કરી હતી. આ ફિલ્મમાં તેની પત્ની જેનેલિયા ડિસોઝાએ પણ કામ કર્યું હતું. જો કે તે પોતાની ડેબ્યુ ફિલ્મથી લોકોમાં એટલો લોકપ્રિય બન્યો ન હતો. વર્ષ 2004માં રિલીઝ થયેલી ફિલ્મ 'મસ્તી'એ તેમને રાતોરાત ફેમસ બનાવી દીધા હતા. આ પછી તેણે ક્યારેય પાછું વળીને જોયું નથી. રિતેશ પોતાની એક્ટિંગના જોરે લાખો દિલો પર રાજ કરે છે. હિન્દી સિવાય તે મરાઠી સિનેમામાં પણ સક્રિય છે.

રિતેશ મહારાષ્ટ્રના રાજકીય પરિવાર સાથે સંબંધ ધરાવે છે. તેમના પિતા વિલાસ રાવ દેશમુખ  રાજ્યના મુખ્યમંત્રી રહી ચુક્યા છે. સાથે જ તેમના ભાઈ પણ રાજકારણમાં સક્રિય છે. બહુ ઓછા લોકો જાણતા હશે કે અભિનયની દુનિયામાં પ્રવેશતા પહેલા રિતેશ એક આર્કિટેક્ટ હતો. તેમણે મુંબઈની કમલા રહેજા કૉલેજ ઑફ આર્કિટેક્ચરમાંથી આર્કિટેક્ચરનો અભ્યાસ કર્યો અને પછી વિદેશી આર્કિટેક્ટ ફર્મમાં પ્રેક્ટિસ કરવાનું શરૂ કર્યું. અહીં તેમણે એક વર્ષ કામ કર્યું. બાદમાં, તેમણે પોતાનો વિચાર બદલી નાખ્યો અને ફિલ્મ ઉદ્યોગ તરફ વલણ અપનાવ્યું.

રિતેશે તેની ડેબ્યૂ ફિલ્મ અભિનેત્રી જેનેલિયા સાથે લગ્ન કર્યા છે. નવ વર્ષ સુધી એકબીજાને ડેટ કર્યા બાદ બંનેએ વર્ષ 2012માં હિન્દુ અને ક્રિશ્ચિયન રીતિ-રિવાજો સાથે લગ્ન કર્યા હતા. રિતેશ આજકાલ ફિલ્મ ઈન્ડસ્ટ્રીના સૌથી વ્યસ્ત કલાકારોમાંથી એક છે. ચાહકો તેની ફિલ્મોની આતુરતાથી રાહ જોતા હોય છે.

આ પણ વાંચો--આ બોલિવૂડ સ્ટાર્સે આપી સૌથી વધુ 200 કરોડની ફિલ્મો