બેંક કર્મચારીએ ATM માં લોડ કરવાના પૈસાનું શું કર્યું? જાણો

અમદાવાદના અમરાઇવાડી વિસ્તારમાં બેંક કામ કરતાં કર્મચારીએ જ બેંક સાથે લાખો રૂપિયાની ઠગાઈ કરી હોવાની ચોંકાવનારી  ઘટના બની છે. એટીએમ મશીનમાં પૈસા લોડ કરનારા બેન્ક કર્મીએ માત્ર એક મહિનાના સમયગાળામાં લાખો રૂપિયાની ઉચાપત કરતા પોલીસ ફરિયાદ નોંધાઇ છે. આ મામલે અમરાઈવાડી પોલીસે બેંક કર્મચારી જીગ્નેશ પ્રજાપતિની ધરપકડ કરી છે.

વિગતવાર વાત કરીએ તો અમરાઇવાડીના હાટકેશ્વર સર્કલ પાસે આવેલી કેનેરા બેન્કની ખોખરા બ્રાન્ચમાં જીગ્નેશ પ્રજાપતિ છેલ્લા ઘણા સમયથી નોકરી કરતો હતો.આરોપીનું કામ બેંકના કેશિયર પાસેથી વાઉચર મેળવી તે રકમને બેંકમાંથી લઈને એટીએમ મશીનમાં જમા કરાવવાનું હતું, પરંતુ આરોપીએ છેલ્લા એક દોઢ મહિનાના અરસામાં જ અલગ અલગ સમયે બેંકમાંથી પૈસા લઈ તેમાંથી અમુક જ રકમ એટીએમ મશીનમાં જમા કરાવી અંદાજે ૩૮ લાખ 28 હજાર જેટલી રકમ પોતે લઈને છેતરપિંડી આચરી હતી જેથી આ મામલે બેંકના આસિસ્ટન્ટ મેનેજરે પોલીસ ફરિયાદ નોંધાવી છે.

ખોખરાની કેનેરા બેંક બ્રાન્ચના મેનેજરે થોડા સમય પહેલા બેંકના આસિસ્ટન્ટ જનરલ મેનેજરને ફોન કરીને એટીએમમાં પૈસા લોડ કરવામાં આવે છે, તેમાં છેતરપિંડી થઈ હોવાનું જણાવ્યું હતું.જેથી આસિસ્ટન્ટ જનરલ મેનેજરે ખોખરા બ્રાંચમાં મુલાકાત બેંકના ATM માં તપાસ કરી હતી.જે તપાસમાં બેંક કર્મી જીગ્નેશ પ્રજાપતિ જે બેંકના કેશિયર પાસેથી વાઉચરથી રોકડ મેળવી 21-2-2020થી અત્યાર સુધીના સમયગાળાનો હિસાબ તપાસતા આ સમયગાળા દરમિયાન ૩૮ લાખ થી વધુ રૂપિયા ATM માં લોડ જ ન કર્યા હોવાનું ધ્યાને આવ્યું હતું. અંતે સમગ્ર મામલે ફરિયાદ નોંધાતાં પોલીસે આરોપીની ધરપકડ કરી છે.

અમરાઈવાડી પોલીસે આ સમગ્ર મામલે આરોપી બેંક કર્મચારીની ધરપકડ કરીને તેણે આ પૈસાનો કયાં ઉપયોગ કર્યો હતો તે સહિતના મુદ્દા પર તપાસ શરુ કરી હતી.આરોપી દ્વારા ATM માં ઓછી રકમ જમા કરી મેન્યુઅલ એન્ટ્રીમાં વધુ રકમ દર્શાવી માત્ર 1 મહિનામાં ૩૮ લાખ રૂપિયાથી વધુ પૈસાની ઉચાપત કરી છે. આ બેંક કર્મચારીએ આ લાખો રૂપિયા કોને આપ્યા અને તેનો ઉપયોગ ક્યાં કર્યો તે દિશામાં તપાસ અમરાઈવાડી પોલીસે હાથ ધરી છે.