પ્રેમિકા સાથે જઈ રહેલા પતિને પત્નીએ રોકવાનો પ્રયાસ કર્યો તો કાર પર જ લટકાવી દીધી
બરેલીના ભમોરા વિસ્તારમાં બનેલી આ ઘટના કોઈ બોલિવૂડ ફિલ્મની એક્શન સિક્વન્સ જેવી છે, જેણે સ્થાનિક લોકોને સ્તબ્ધ કરી દીધા છે. પીડિત મહિલા ગુલાબો પોતાના બાળક સાથે દેવચરા ચૌરાહા પાસે ઊભી હતી, ત્યારે જ સાંજે સાતેક વાગ્યાના સુમારે તેનો પતિ નેત્રપાલ કાર લઈને ત્યાંથી પસાર થયો હતો. કારની અંદર નેત્રપાલની બાજુમાં તેની પ્રેમિકા બેઠી હોવાનું પત્નીના ધ્યાને આવ્યું હતું. ગુલાબોએ તુરંત જ કાર રોકવા માટે બૂમો પાડી હતી, પરંતુ નેત્રપાલે ગાડી ઉભી રાખવાને બદલે તેની સ્પીડ વધારી દીધી હતી. પત્ની પણ હિંમત હાર્યા વગર કારની પાછળ દોડવા લાગી હતી.
ફૂલમંડીના સ્પીડ બ્રેકર પાસે પત્નીએ જીવ જોખમમાં મૂકી છલાંગ લગાવી
"ફૂલમંડી પાસે રોડ પર બમ્પ હોવાના કારણે કારની સ્પીડ થોડી ધીમી પડી હતી. આ તકનો લાભ લઈને ગુલાબોએ પોતાની જાનની પરવા કર્યા વિના સીધી જ કારના બોનેટ પર છલાંગ લગાવી દીધી હતી જેથી પતિ કાર ઊભી રાખવા મજબૂર થાય." - સ્થાનિક પ્રત્યક્ષદર્શી
જો કે, ક્રૂરતાની હદ વટાવીને નેત્રપાલે બોનેટ પર પત્ની લટકતી હોવા છતાં કાર રોકવાના બદલે તેને રોડ પર દોડાવવાનું ચાલુ રાખ્યું હતું. આ દ્રશ્ય જોઈને હાઈવે પરથી પસાર થતા અન્ય વાહનચાલકોના શ્વાસ અધ્ધર થઈ ગયા હતા.
રાહદારીઓએ બાઇક પાછળ દોડાવી કાર રોકી
કારના બોનેટ પર મહિલાને આ રીતે જોખમી સ્થિતિમાં લટકતી જોઈને આસપાસના લોકો તાત્કાલિક એક્શનમાં આવ્યા હતા. કેટલાક સ્થાનિક યુવાનોએ પોતાની બાઇક લઈને કારનો પીછો શરૂ કર્યો હતો. આશરે 200 મીટર દૂર દેવચરા-બલ્લિયા રોડ પર લોકોએ કારને ઘેરીને ઊભી રાખી દીધી હતી.
પતિને ખેંચીને બહાર કાઢ્યો
કાર ઊભી રહેતા જ રોષે ભરાયેલા ટોળાએ પતિ નેત્રપાલને બહાર ખેંચી કાઢ્યો હતો અને રસ્તા પર જ તેની બરાબરની ધોલાઈ કરી નાખી હતી. હંગામાનો લાભ લઈને નેત્રપાલ અને તેની પ્રેમિકા ત્યાંથી ભાગવામાં સફળ રહ્યા હતા. આ સમગ્ર ઘટના નજીકના સીસીટીવી કેમેરામાં કેદ થઈ ગઈ હતી. બરેલીના એસપી સાઉથ અંશિકા વર્માએ જણાવ્યું કે પીડિત મહિલા ગુલાબોની ફરિયાદના આધારે ભમોરા પોલીસ સ્ટેશનમાં તેના પતિ નેત્રપાલ વિરુદ્ધ આકરા કાયદાકીય પગલાં હેઠળ ગુનો નોંધીને તપાસ તેજ કરવામાં આવી છે.
આ પણ વાંચો : Mumbai 5 Star Hotel : આખું પરિવાર બહાર જમી શકે તેટલું તો ઇંડા-આલુ પરોઠાનું જ બીલ !
