Mercedes બની કબર! ચીનમાં વ્યક્તિના અંતિમ સંસ્કારમાં 1.5 કરોડની લક્ઝરી કાર દફનાવી
- Luxury Car Buried in China : કાર બની શબપેટી!
- 1.5 કરોડની મર્સિડીઝ (Mercedes) કારને જમીનમાં દફનાવી
- લિયાઓનિંગ પ્રાંતની ચોંકાવનારી ઘટનાનો વીડિયો વાયરલ
- વીઆઈપી ‘8888’ નંબર પ્લેટ સાથે ગાડીને આપી અંતિમ વિદાય
- અંધશ્રદ્ધા અને ફિઝૂલખર્ચી બદલ તંત્રએ પરિવારને ફટકાર્યો ઠપકો
- અંતિમ સંસ્કારની અજીબોગરીબ રીતથી દુનિયાભરમાં ચર્ચા
સામાન્ય રીતે અંતિમ સંસ્કાર સમયે લોકો ફૂલો, મંત્રોચ્ચાર અને ધાર્મિક વિધિઓ દ્વારા વિદાય આપતા હોય છે, પરંતુ ચીન (China) ના લિયાઓનિંગ પ્રાંતમાં એક એવો કિસ્સો સામે આવ્યો છે જેણે દુનિયાભરના લોકોને વિચારતા કરી દીધા છે. અહીં એક પરિવારે તેમના વડીલની અંતિમ ઈચ્છા પૂરી કરવા માટે કોઈ શબપેટીનો નહીં, પરંતુ 1.5 કરોડ રૂપિયાની આલીશાન લક્ઝરી કારનો (Luxury Car) ઉપયોગ કર્યો અને તેને જમીનમાં દફનાવી દીધી હતી.
Luxury Car Buried in China : મર્સિડીઝ બની ‘કોફીન’
મૃતક વ્યક્તિને જીવતેજીવ લક્ઝરી ગાડીઓનો ખૂબ જ શોખ હતો. તેમના પરિવારનું માનવું હતું કે જો તેમને તેમની મનપસંદ ગાડી સાથે દફનાવવામાં આવશે, તો તેમને પરલોકમાં પણ તેટલો જ આરામ અને સુખ મળશે. આ માટે પરિવારે તેમની કિંમતી મર્સિડીઝ-બેન્ઝ એસ450એલ (Mercedes-Benz S450L) કાર પસંદ કરી હતી. આ કારની કિંમત અંદાજે 1.1 મિલિયન યુઆન એટલે કે ભારતીય ચલણ મુજબ 1.5 કરોડ રૂપિયાથી વધુ થાય છે. આ અજીબ અંતિમ સંસ્કારનો વીડિયો વાયરલ (Viral Video) થતા જ ઈન્ટરનેટ પર વિવાદનું વંટોળ સર્જાયું છે.
શુભ નંબર પ્લેટ અને ભવ્ય વિદાય
આ ઘટનાની સૌથી આકર્ષક વાત એ હતી કે કાર પર '8888' નંબરની પ્લેટ લાગેલી હતી. ચીની સંસ્કૃતિમાં '8' અંકને અત્યંત નસીબદાર અને સમૃદ્ધિનું પ્રતીક માનવામાં આવે છે. વીડિયોમાં જોઈ શકાય છે કે એક વિશાળ એક્સકેવેટર (Excavator) મશીન દ્વારા ખૂબ જ મહેનતથી એક વિશાળ ખાડો ખોદવામાં આવ્યો હતો અને ત્યારબાદ આખી કારને લાલ રિબનથી શણગારીને જમીનમાં પધરાવવામાં આવી હતી. આ અનોખા અંતિમ સંસ્કાર જોવા માટે આખું ગામ ઉમટી પડ્યું હતું.
સરકારની કડક કાર્યવાહી
જોકે, આ ઘટના સોશિયલ મીડિયા પર વાયરલ થતા જ સ્થાનિક વહીવટીતંત્ર હરકતમાં આવ્યું હતું. અધિકારીઓએ આ કૃત્યને ઘોર અંધશ્રદ્ધા અને પર્યાવરણ માટે જોખમી ગણાવ્યું છે. ચીની સરકારના મતે, આ પ્રકારની ફિઝૂલખર્ચી સમાજમાં ખોટો સંદેશ આપે છે. વહીવટીતંત્રે પરિવારને ઠપકો આપ્યો છે અને પર્યાવરણના નિયમોના ઉલ્લંઘન બદલ મોટો દંડ ફટકારવાની તૈયારી પણ કરી લીધી છે. આ કિસ્સાએ સાબિત કર્યું છે કે ક્યારેક શોખ અને અંધશ્રદ્ધા કાયદાકીય મુશ્કેલીઓ પણ નોતરી શકે છે.
આ પણ વાંચો : ચાલુ ક્રિકેટ મેચમાં ટ્રેક્ટર લઈને ઘૂસી ગયો શખ્સ, પછી જે કર્યું તે જોઈને તમે પણ હેબતાઈ જશો; જુઓ VIDEO