Viral News : એક પ્લમ્બરના બેન્ક ખાતામાં અચાનક આવ્યા 294800000000 રૂપિયા, જાણો ત્યારબાદ શું થયુ?

બિહારના ગયા જિલ્લાના બોધગયાના મસ્તપુરા ગામમાં એક પ્લમ્બરના બેન્ક ખાતામાં અચાનક 294 કરોડ 80 લાખ રૂપિયા દેખાતા ભારે ચકચાર મચી ગઈ છે. વિકાસ કુમાર નામના આ યુવાને બે દિવસ પહેલા જીઓ પેમેન્ટ્સ બેન્કના એપ પર બેલેન્સ ચેક કર્યું ત્યારે આ આંકડો જોઈ તે ચોંકી ગયો હતો. આ ચોંકાવનારો મામલો અત્યારે સમગ્ર વિસ્તારમાં ચર્ચાનું કેન્દ્ર બન્યો છે.

પ્લમ્બરના બેન્ક એકાઉન્ટમાં કરોડો રૂપિયા: ટેકનિકલ ખામી કે બેન્કની મોટી બેદરકારી?

બોધગયાના મસ્તપુરા ગામના રહેવાસી વિકાસ કુમાર જે વ્યવસાયે ઈલેક્ટ્રિકલ અને પ્લમ્બરનું કામ કરે છે, તેમના ખાતામાં જમા થયેલી આ રકમ જોઈ સૌ કોઈ આશ્ચર્યમાં છે. વિકાસ છેલ્લા પાંચ વર્ષથી જીઓ પેમેન્ટ્સ બેન્કનો ગ્રાહક છે. બે દિવસ પહેલા એપ ખોલતા જ તેણે જોયું કે ખાતામાં 294.80 કરોડ રૂપિયા પડ્યા છે. વિકાસે જણાવ્યું કે તેના ખાતામાં અત્યાર સુધી માત્ર 6 થી 7 લાખનું જ વ્યવહાર થયો છે.

 સતત બે દિવસ બેલેન્સ ચેક કર્યું, આંકડો જોઈ યુવાનની વધી ચિંતા

વિકાસને પહેલા લાગ્યું કે કદાચ કોઈ એપ કે સિસ્ટમમાં ટેકનિકલ સમસ્યા હશે. પરંતુ જ્યારે તેણે બીજા દિવસે ફરી ચેક કર્યું તો પણ રકમ તેટલી જ હતી. આટલી મોટી રકમ જોઈને તે ડરી ગયો હતો અને તેણે કોઈ પણ પ્રકારનો વ્યવહાર કે પૈસા ઉપાડવાનો પ્રયાસ કર્યો નથી. તેણે બેન્ક સત્તાવાળાઓને આ અંગે તાત્કાલિક તપાસ કરવા વિનંતી કરી છે.

 ગામમાં ચર્ચાઓનો દોર: શું ખરેખર બેન્કિંગ સિસ્ટમમાં આવી શકે આટલી મોટી ભૂલ?

આ ઘટનાની જાણ થતા જ મસ્તપુરા ગામમાં લોકોના ટોળેટોળા ઉમટી પડ્યા હતા. આસપાસના ગામના લોકો પણ સત્ય જાણવા માટે વિકાસના ઘરે પહોંચવા લાગ્યા છે. કોઈ આને બેન્કની મોટી બેદરકારી ગણાવે છે, તો કોઈ સોફ્ટવેરની ખામી માની રહ્યું છે. બેન્ક તરફથી હજુ સુધી કોઈ સત્તાવાર નિવેદન આવ્યું નથી, જેના કારણે રહસ્ય વધુ ઘેરું બન્યું છે.

આ પણ વાંચો : Bengaluru Pregnant Woman : 9 મહિનાની ગર્ભવતી મહિલાએ સાડી પહેરી કર્યા મુશ્કેલ યોગાસન, Video Viral