Rules for Only Indians : ભારતીયોની Civic Sense અને જાહેર સ્થળોએ તેમના વર્તનને લઈને સોશિયલ મીડિયા (Social Media) પર ફરી એકવાર ચર્ચા શરૂ થઈ છે. આ વખતે ચર્ચાનું કેન્દ્ર બન્યું છે સ્વિટ્ઝર્લેન્ડ (Switzerland) સ્થિત એક હોટેલ, જ્યાં ખાસ કરીને ભારતીય મહેમાનો માટે કેટલાક વિશેષ નિયમો જાહેર કરવામાં આવ્યા છે. જે જાણીને તમે પણ ચોંકી જશો. જાણીતા ઉદ્યોગપતિ હર્ષ ગોએન્કા (Harsh Goenka) દ્વારા સોશિયલ મીડિયા પર શેર કરાયેલી એક તસવીરે આ મુદ્દાને ફરી ચર્ચામાં લાવી દીધો છે.

ભારતીયના વર્તન પર શેર કરી પોસ્ટ

હર્ષ ગોએન્કાએ પોતાના પોસ્ટમાં જણાવ્યું કે તેમણે એક વખત સ્વિસ હોટેલમાં ભારતીયો માટે ખાસ બનાવવામાં આવેલા નિયમોની યાદી જોઈ હતી અને તે જોઈને તેઓ આશ્ચર્યચકિત થઈ ગયા હતા. તેમણે લખ્યું કે તાજેતરના સમયમાં રેસ્ટોરાંમાં લોકો દ્વારા ગરબા રમવાના વીડિયો, એરપોર્ટ પર મોટેથી વાતચીત કરવાના દ્રશ્યો અને વિમાનના કેબિનને જાણે પિકનિક સ્થળમાં ફેરવી દેવાના બનાવો વારંવાર સામે આવી રહ્યા છે. તેમણે વધુમાં એક ઉદાહરણ આપતા જણાવ્યું કે દાવોસ (Davos) ખાતે એક ભારતીય ઉદ્યોગપતિએ ક્લબમાં એટલા જોરથી પંજાબી ગીતો વગાડ્યા હતા કે તેનો અવાજ સમગ્ર વિસ્તાર સુધી સંભળાતો હતો. આ પ્રકારની ઘટનાઓ દેશની છબીને અસર કરી શકે છે તેવો સંકેત પણ તેમણે આપ્યો.

જાપાનનું ઉદાહરણ સાથે આપી મહત્વપૂર્ણ શીખ

હર્ષ ગોએન્કાએ જાપાન (Japan)નું ઉદાહરણ આપતાં જણાવ્યું કે ત્યાંના લોકો તેમની નમ્રતા (Humility), શિસ્ત (Discipline) અને ઉત્તમ નાગરિક શિષ્ટાચાર (Civic Etiquette) માટે વિશ્વભરમાં જાણીતા છે. જો ભારતને વૈશ્વિક મહાસત્તા (Global Superpower) તરીકે ઉભરવું હોય, તો ભારતીયોને પણ તેમની શ્રેષ્ઠતા, અન્ય લોકો પ્રત્યેના આદર અને જવાબદાર વર્તન માટે ઓળખ મળવી જોઈએ. તેમણે ભારપૂર્વક કહ્યું કે હવે ભારતીયોએ પોતાની નાગરિક સમજને વધુ વિકસિત કરવાની જરૂર છે.

સ્વિસ હોટેલ દ્વારા ભારતીયો માટે બનાવવામાં આવેલા નિયમો (Rules for Only Indians)

સ્વિટ્ઝર્લેન્ડના ગસ્ટાડ (Gstaad) શહેરમાં આવેલી Arc-en-Ciel Hotel દ્વારા ભારતીય મહેમાનો માટે કેટલીક ખાસ સૂચનાઓ આપવામાં આવી છે. હોટેલના નિયમો અનુસાર, નાસ્તાનું બુફે (Buffet) સવારે 7:30 વાગ્યાથી 10:30 વાગ્યા સુધી ઉપલબ્ધ રહે છે. હોટેલ દ્વારા પીરસવામાં આવતો તમામ ખોરાક તાજો તૈયાર કરવામાં આવે છે અને સ્થાનિક ઉત્પાદકો પાસેથી મેળવવામાં આવે છે. મહેમાનોને નાસ્તાનો ખોરાક પેક કરીને બહાર લઈ જવાની મંજૂરી નથી. જો કોઈને પેક્ડ લંચ (Packed Lunch) જોઈએ તો તે સ્ટાફ પાસેથી અલગથી ઓર્ડર આપી શકે છે અને તેની નિર્ધારિત કિંમત ચૂકવવી પડે છે. હોટેલે એ પણ સ્પષ્ટ કર્યું છે કે અન્ય મહેમાનોને પણ બુફેનો સમાન લાભ મળે તે માટે માત્ર આપવામાં આવેલી કટલરી (Cutlery) નો જ ઉપયોગ કરવો જોઈએ. ઉપરાંત, જો 2 અથવા વધુ લોકો એક જ ભોજન શેર કરવા માંગતા હોય તો દરેક વધારાના વ્યક્તિ માટે સર્વિસ અને પ્લેટના CHF 5 તેમજ પીણાં માટે CHF 1 વધારાના ચાર્જ ચૂકવવાના રહેશે.

શાંતિ અને ગોપનીયતા જાળવવા માટે ખાસ સૂચનાઓ

હોટેલમાં રોકાયેલા અન્ય આંતરરાષ્ટ્રીય મહેમાનોની સુવિધા અને શાંતિ જળવાઈ રહે તે માટે પણ કેટલાક નિયમો બનાવવામાં આવ્યા છે. મહેમાનોને કોરિડોર (Corridor) માં શાંત રહેવા અને બાલ્કની (Balcony) માં મોટેથી વાતચીત ન કરવા વિનંતી કરવામાં આવી છે. આ ઉપરાંત, હોટેલનું રિસેપ્શન (Reception) સવારે 7 વાગ્યાથી રાત્રે 10:30 વાગ્યા સુધી ખુલ્લું રહે છે. આ સમય બાદ માત્ર ઇમરજન્સી (Emergency) સંબંધિત કોલ જ સ્વીકારવામાં આવે છે. જ્યારે રૂમ સર્વિસ (Room Service) સવારે 7:30 થી રાત્રે 10 વાગ્યા સુધી ઉપલબ્ધ રહે છે.

નાગરિક શિષ્ટાચાર અંગે ફરી શરૂ થઈ ચર્ચા

ઉલ્લેખનીય છે કે, હર્ષ ગોએન્કાની પોસ્ટ બાદ સોશિયલ મીડિયા પર નાગરિક શિષ્ટાચાર, જાહેર સ્થળોએ વર્તન અને આંતરરાષ્ટ્રીય સ્તરે ભારતીયોની છબી અંગે નવી ચર્ચા શરૂ થઈ છે. ઘણા લોકોનું માનવું છે કે, વિદેશમાં ભારતની પ્રતિષ્ઠા વધુ મજબૂત બનાવવા માટે વ્યક્તિગત સ્તરે શિસ્તબદ્ધ અને જવાબદાર વર્તન અપનાવવું સમયની જરૂરિયાત બની ગયું છે.

આ પણ વાંચો : Video Viral : "તમારા દેશમાં પાછા જાઓ..!" અમેરિકન વ્યક્તિની ભારતીય સામે જાતિવાદી ટિપ્પણી