World Yoga Day 2026: કોલકાતામાં યોગ દિવસનો ભવ્ય ઉત્સવ
વડાપ્રધાન નરેન્દ્રભાઈ મોદીએ કોલકાતાના રેડ રોડ પર 12મા આંતરરાષ્ટ્રીય યોગ દિવસ સમારોહનું નેતૃત્વ કર્યું હતું. આ મુખ્ય કાર્યક્રમમાં 35,000થી વધુ લોકોએ એકસાથે યોગ કર્યા હતા. આ વર્ષે યોગ દિવસની મુખ્ય થીમ "Yoga for Healthy Ageing" રાખવામાં આવી હતી. સવારે 6:30 વાગ્યે શરૂ થયેલા આ રાષ્ટ્રવ્યાપી સત્રમાં 7:00 થી 7:45 દરમિયાન કોમન યોગ પ્રોટોકોલનો અભ્યાસ કરવામાં આવ્યો હતો. હુગલી નદી પર 500 જેટલી નાવડીઓ પર યોજાયેલું યોગ પ્રદર્શન આ કાર્યક્રમનું મુખ્ય આકર્ષણ બન્યું હતું.
World Yoga Day 2026: PM મોદીએ આપી યોગથી યુવાન અને સ્વસ્થ રહેવાની પ્રેરણા
વડાપ્રધાન નરેન્દ્રભાઈ મોદીએ જનતાને સંબોધન પણ કર્યું હતું. જેમાં તેમણે કહ્યું કે, યોગ વ્યક્તિને મોટી ઉંમરે પણ સ્વસ્થ અને ઉર્જાવાન બનાવે છે. વ્યક્તિએ 20 વર્ષની ઉંમર કરતા 40 વર્ષની ઉંમરે વધુ લચીલા બનવાનું લક્ષ્ય રાખવું જોઈએ. 30 વર્ષની ઉંમર કરતા 50 વર્ષની ઉંમરે વધુ ઉર્જા અને 40 વર્ષની ઉંમર કરતા 70 વર્ષની ઉંમરે રોગો સામે લડવાની ક્ષમતા કેળવવી જોઈએ. યોગ શારીરિક અને માનસિક વિકાસને સતત પ્રોત્સાહન આપે છે.
બંગાળની આધ્યાત્મિક ભૂમિ અને યોગનું મહત્વ
પીએમ મોદીએ યોગ દિવસ નિમિત્તે પશ્ચિમ બંગાળના લોકો દ્વારા હાથ ધરવામાં આવેલા સ્વચ્છતા અભિયાનની પણ પ્રશંસા કરી હતી. તેમણે અભિયાનને "અદ્ભુત પહેલ" ગણાવી અને અભિયાનમાં ભાગીદારી બદલ લોકોની પ્રશંસા કરી. વડાપ્રધાન મોદીએ કહ્યું કે પશ્ચિમ બંગાળમાં આંતરરાષ્ટ્રીય યોગ દિવસની ઉજવણી ખાસ છે. કારણ કે આ રાજ્ય તેના સમૃદ્ધ આધ્યાત્મિક અને યોગ વારસા માટે જાણીતું છે. આ ભૂમિ આધ્યાત્મિકતા અને યોગના વારસાથી સમૃદ્ધ છે. રામકૃષ્ણ પરમહંસ અને સ્વામી વિવેકાનંદ જેવા સંતોએ યોગનો સંદેશ વિશ્વમાં ફેલાવ્યો છે. વડાપ્રધાન મોદીએ લાહિરી મહાશયના યોગદાનને યાદ કરી આ ભૂમિ પર યોગ કરવાને અનોખો આધ્યાત્મિક અનુભવ ગણાવ્યો હતો.
હિમાલયથી હિંદ મહાસાગર સુધી એકતા
વડાપ્રધાન મોદીએ યોગને માનવતાને જોડનારી શક્તિ ગણાવી હતી. હિમાલયથી લઈને હિંદ મહાસાગર સુધી અને પૂર્વથી પશ્ચિમ સુધી આખો દેશ યોગની ચેતનાથી ભરેલો જોવા મળ્યો છે. વિશ્વના 210થી વધુ ભારતીય મિશન દ્વારા 2,500 સ્થળોએ કાર્યક્રમોનું આયોજન કરવામાં આવ્યું છે. દેશભરના 100 ઐતિહાસિક સ્થળોએ પણ વિશેષ યોગ સત્રો યોજાયા છે. યોગ વ્યક્તિને તેની આસપાસની દુનિયા સાથે જોડે છે અને માનવ એકતાનો આધાર બને છે.
આ પણ વાંચો--- World Yoga Day 2026 : અમદાવાદ રિવરફ્રન્ટ પર વિશ્વ યોગ દિવસની ભવ્ય ઉજવણી, ગુજરાત ભાજપ પ્રદેશ પ્રમુખ જગદીશભાઈ વિશ્વકર્મા રહ્યાં હાજર
