• ગુજરાતની શાળામાં અભ્યાસ કરતા વિદ્યાર્થીઓ માટે મહત્વના સમાચાર
• બોર્ડ ધોરણ 9 થી 12માં કોમ્પ્યુટર વિષયનો અભ્યાસક્રમ ઘટાડવામાં આવશે
• પરીક્ષાલક્ષી ભારણ ઘટાડવા બોર્ડનો નિર્ણય
• આગામી શૈક્ષણિક વર્ષથી લાગુ પડશે અભ્યાસક્રમ ઘટાડો
• દરેક ધોરણમાં સરેરાશ 4 થી 5 ચેપ્ટર ઘટાડવામાં આવશે

Gujarat : ગુજરાત માધ્યમિક અને ઉચ્ચતર માધ્યમિક શિક્ષણ બોર્ડમાં અભ્યાસ કરતા વિદ્યાર્થીઓ માટે એક મહત્વના સમાચાર સામે આવ્યા છે. આગામી શૈક્ષણિક વર્ષથી ધોરણ 9 થી 12માં કોમ્પ્યુટર વિષયનો અભ્યાસક્રમ ઘટાડવાની જાહેરાત બોર્ડ દ્વારા કરવામાં આવી છે. આ નિર્ણયનો મુખ્ય હેતુ વિદ્યાર્થીઓ પરનું પરીક્ષાલક્ષી ભારણ ઓછું કરવાનો છે, જેથી તેઓ મુખ્ય વિષયો પર વધુ ધ્યાન કેન્દ્રિત કરી શકે. આ ફેરફાર આગામી શૈક્ષણિક સત્રથી લાગુ થશે અને વિદ્યાર્થીઓને નવા ઘટાડેલા અભ્યાસક્રમ પ્રમાણે ભણવાની તક મળશે.

અભ્યાસક્રમમાં ઘટાડો: કેટલો અને કેવી રીતે?

ગુજરાત બોર્ડના આ નિર્ણય અનુસાર, ધોરણ 9 થી 12માં કોમ્પ્યુટર વિષયના અભ્યાસક્રમમાંથી સરેરાશ 4 થી 5 ચેપ્ટર દૂર કરવામાં આવશે. સામાન્ય રીતે, આ ધોરણોમાં કોમ્પ્યુટર વિષયમાં 10 થી 15 ચેપ્ટરનો સમાવેશ થતો હોય છે, પરંતુ હવે તેમાંથી નોંધપાત્ર ઘટાડો કરીને વિદ્યાર્થીઓનો બોજ હળવો કરવાનો પ્રયાસ કરાયો છે. શૈક્ષણિક સમિતિ દ્વારા લેવાયેલા આ નિર્ણયને વિદ્યાર્થીઓ અને શિક્ષણવિદો બંનેએ સકારાત્મક પ્રતિસાદ આપ્યો છે.

નિર્ણયનું કારણ અને તેનું મહત્વ

આ નિર્ણય પાછળનું મુખ્ય કારણ એ છે કે કોમ્પ્યુટર વિષયની થિયરીમાં જટિલ ટર્મિનોલોજી અને શબ્દોને યાદ રાખવામાં વિદ્યાર્થીઓને ઘણી મહેનત કરવી પડતી હતી. આ ઉપરાંત, મુખ્ય વિષયો જેવા કે વિજ્ઞાન, ગણિત, સામાજિક વિજ્ઞાન, રસાયણશાસ્ત્ર, ભૌતિકશાસ્ત્ર અને જીવવિજ્ઞાન જેવા વિષયોની તૈયારી માટે પૂરતો સમય મળે તે જરૂરી હતું. કોમ્પ્યુટરને વૈકલ્પિક વિષય તરીકે ગણવામાં આવે છે, અને તેનું ભારણ ઘટાડવાથી વિદ્યાર્થીઓને અન્ય મહત્વના વિષયો પર ધ્યાન આપવાની સુવિધા મળશે. શિક્ષણજ્ઞોનું માનવું છે કે આ પગલું વિદ્યાર્થીઓના શૈક્ષણિક પ્રદર્શનને સુધારવામાં મદદરૂપ થશે.

આધુનિક સમયમાં કોમ્પ્યુટરની ભૂમિકા

આજના મોબાઇલ યુગમાં કોમ્પ્યુટરનો ઉપયોગ પણ ઘણી હદે મર્યાદિત થયો છે. અગાઉ જે કાર્યો માટે કોમ્પ્યુટર આવશ્યક હતું, તે હવે સ્માર્ટફોન દ્વારા સરળતાથી થઈ શકે છે. આવી સ્થિતિમાં, કોમ્પ્યુટરના વિગતવાર થિયરેટિકલ જ્ઞાન કરતાં તેના પ્રાયોગિક અને મૂળભૂત જ્ઞાન પર વધુ ધ્યાન આપવું જરૂરી બન્યું છે. ગુજરાત બોર્ડે આ બદલાતા સમયને ધ્યાનમાં રાખીને અભ્યાસક્રમમાં ફેરફાર કરવાનો નિર્ણય લીધો છે, જેમાં બેઝિક અને પ્રેક્ટિકલ નોલેજને પ્રાધાન્ય આપવામાં આવશે.

આ પણ વાંચો :  Ahmedabad : જીવતે તો જીવ બચાવ્યાં, મૃત્યુ પછી પણ 4 લોકોને નવજીવન આપ્યું!