સ્કૂલો ફરી બાળકોની કિલકારીઓથી ગુંજી ઉઠી

કોરોનાના કારણે લોકોના જીવન અસ્ત વ્યસ્ત થઈ ગયા હતા. ફકત પરિવારનાં મોટા સભ્યો જ નહિ પણ બાળકોને પણ ઘણું બધું વેઠવું પડ્યું આ કોરોના કારણે. બાળકોનું સૌથી મોટું નુકશાન થયું તો એ છે શિક્ષા! આ કોરોનાકાળમાં શિક્ષા, શિક્ષક, અને શિષ્યના સંબધોમાં લાંબો અંતર આવી ગયો હતો. જેના કારણે બાળકોની ભણતર પ્રત્યેની રૂચી ઓછી થઈ હતી. પણ હવે એ રૂચી ફરી પરત આવશે કારણ કે હવે શાળાઓ શરૂ થઈ રહી છે. 

કોરોનાનો કહેર શરૂ થતા શાળાઓ બંધ થઈ હતી. આ સમયમાં સ્કૂલોમાં ઓનલાઈન શિક્ષણ શરૂ કરવામાં આવ્યું હતું. ત્યારે બે વર્ષના લાંબા ગાળા બાદ આજથી પ્રિ પ્રાઈમરી સ્કૂલ શરૂ થઈ છે. ત્યારે સ્કૂલોમાં બાળકોનો ઉત્સાહ ખુબ જ જોવા મળ્યો હતો. સ્કૂલમાં પ્રવેશ કરતા જ સ્કૂલના કેર ટેકર દ્વારા તેમને સેનીટાઈઝેશન કરીને બાળકોનું પુષ્પગુચ્છથી સ્વાગત કરવામાં આવ્યું હતું. મણીનગર ખાતે આવેલી વેદાંત સ્કૂલ ખાતે બાળકોનો ઉત્સાહ ખુબ જ જોવા મળ્યો શિક્ષકો પણ એક લાંબા સમયગાળા બાદ સ્કૂલ કેમ્પસમાં બાળકોને જોઈને આનંદીત થયા હતા.

બાળકોને જ્ઞાન સાથે ગમ્મત આપવામાં આવ્યું હતું. અલગ - અલગ ગીતો વગાડીને બાળકોને ડાન્સ કરાવીને આજથી તેમનુ સ્કૂલમાં સ્વાગત કરાયું હતું. સાથે જ ધીમેધીમે બાળકોને ભણાવવાની શરૂઆત કરાશે. વાલીઓની વાત કરીએ તો વાલીઓ પણ આ પ્રસંગે આનંદીત જોવા મળ્યા હતા. લાંબા સમય બાદ બાળકો તેમના મિત્રો સાથે મળીને હળવાશ સાથે ખુશી અનુભવી તેવું વાલીઓ દ્વારા કહેવામાં આવ્યું હતું. બાળકોને શિક્ષણ આપવું ખુબ જરૂરી છે, પરંતુ આ કોરોનાના કારણે લાંબા સમયથી શાળાઓ શિક્ષણથી વંચિત રહ્યા બાદ આજથી શાળાઓએ આવીને બાળકોએ ગમ્મત કરી અને હળવાશનો અનુભવ કર્યો હતો.