અપહરણનું તરકટ રચનારા ડોક્ટરનું આખરે શું થયું ? જાણો

પોકર ગેમમાં રૂપિયા હારી જવાથી પોતાનું અપહરણ થયું હોવાનું તરકટ રચનારા અમદાવાદના ડોક્ટરની અમદાવાદ ક્રાઇમ બ્રાન્ચે સાઉથ બોપલ વિસ્તારમાંથી ધરપકડ કરી છે.

અમદાવાદ શહેર પોલીસ કંટ્રોલરૂમને એક કોલ મળ્યો હતો જેમાં એક ડોક્ટરનું અપહરણ થયાનો મેસેજ સમગ્ર શહેર પોલીસને ફોરવર્ડ કરવામાં આવ્યો હતો. ખોખરા વિસ્તારમાં રહેતા અને આંખની હોસ્પિટલ ચલાવતા ડોક્ટરનું અપહરણ થયું છે અને અહરણકર્તાઓએ રૂપિયા ૧૫ લાખની ખંડણી માંગી છે તેવી જાણ પોલીસને થઇ હતી. સમગ્ર બનાવની ગંભીરતાને જોતા અમદાવાદ ક્રાઈમ બ્રાન્ચની એક ટીમ પણ તપાસમાં જોતરાઇ ગઇ હતી.

 જે નંબર પરથી ફોન આવ્યો હતો તે નંબરના લોકેશન ટ્રેસ કરવાની કામગીરી  અમદાવાદ ક્રાઈમ બ્રાન્ચે શરૂ કરી દીધી હતી જેમાં ડોક્ટર સંકેત શાહનું અપહરણ થયું છે અને તેમના જ મોબાઈલ નંબર પરથી તેમના પિતાના મોબાઈલ નંબર ઉપર એક ફોન આવ્યો હતો અને બાદમાં અલગ-અલગ મેસેજ પણ આવ્યા હતા જેમાં તમારા દીકરાનું અપહરણ થયું છે અને રૂપિયા ૧૫ લાખ તૈયાર રાખજો તેવી ગર્ભિત ચીમકી ભર્યા મેસેજ પણ કરવામાં આવ્યા હતા.  

ડોક્ટર સંકેત શાહ આજે ક્રાઇમ બ્રાન્ચની કસ્ટડીમાં આવી ગયા છે કારણ માત્ર એક જ છે કે તેમણે પોતાનું અપહરણ થયું હોવાનો મેસેજ તેમના પિતાને કર્યો હતો અને ખંડણીના ભાગ સ્વરૂપે રૂપિયા 15 લાખની માંગણી કરી હોવાનું તપાસમાં બહાર આવ્યું હતું. 

આ તરકટ રચવા પાછળ મુખ્ય કારણ એ હતું કે ડોક્ટર સંકેત શાહ ઓનલાઇન પર ગેમમાં જુગાર રમતો હતો અને હારી જતા તેણે પોતાના જ પિતા પાસેથી પૈસા મેળવવા માટે આ પ્રકારનો ગુનો આચર્યો હોવાની કેફિયત પોલીસ સમક્ષ ખુદ પોતે ડોક્ટર એ જ કબૂલી છે. ઉપરાંત ડોક્ટર સંકેત શાહે અગાઉ પણ પોતાનો અકસ્માત થયો છે અને રૂપિયા 12 લાખ સામેવાળા માંગે છે તેમ કહીને પોતાના પિતા પાસેથી આ રૂપિયા માંગ્યા હતા.

જ્યારે અમદાવાદ ક્રાઈમ બ્રાન્ચે આરોપી એવા ડોક્ટરની કડકાઈ પૂર્વક પૂછપરછ કરી ત્યારે એક ચોંકાવનારી બાબત એ પણ સામે આવી હતી કે વર્ષ 2015 થી 2019 દરમિયાન બેંગ્લોરમાં મેડિકલનો અભ્યાસ કરતા હતા તે સમયે પણ પોકર ગેમ માં રૂપિયા હારી જતા પોતાના જ ડોક્ટર મિત્રો પાસેથી 26 લાખ 50 હજાર રૂપિયા ઉછીના લીધા હતા.

ડોક્ટરનો વ્યવસાય આપણા સમાજમાં ઉચ્ચ દરજ્જાનો વ્યવસાય માનવામાં આવે છે અને આવા જ પ્રકારના લોકો જ્યારે આ પ્રકારની પ્રવૃત્તિ કરતા હોય છે ત્યારે સમાજમાં એક ખોટો મેસેજ પણ પહોંચતો હોય છે. ઓનલાઈન જુગાર બાબતે સરકારે આવનારા સમયમાં કોઈ ચોક્કસ નીતિ જાહેર કરવી જરુરી બની ગઇ છે. હાલ તો ક્રાઈમ બ્રાન્ચે આરોપી ડોક્ટરની ધરપકડ કરીને ખોખરા પોલીસ સ્ટેશનને સોંપવાની તજવીજ હાથ ધરી છે.