Maha kumbh 2025: અમેરિકાના માઈકલ ભાઇ બન્યા 'બાબા મોક્ષપુરી'

• લાખો વિદેશીઓ સહિત 40 કરોડથી વધુ લોકો હાજરી આપે તેવી અપેક્ષા
• 'જય ગંગા મૈયા' ના નારા સાથે ભક્તોએ સ્નાન કર્યું
• ભૂતપૂર્વ યુએસ આર્મી સૈનિકમાંથી સાધુ બન્યા માઈકલ

વિશ્વનો સૌથી મોટો મેળો મહાકુંભ શરૂ થઈ ગયો છે. ગાઢ ધુમ્મસ, કડકડતી ઠંડી અને થીજાવતા પાણી છતાં, પહેલા દિવસે 1.5 કરોડ લોકોએ મોક્ષ પ્રાપ્ત કરવા માટે સંગમમાં ડૂબકી લગાવી છે. એવું માનવામાં આવે છે કે ત્રિવેણીમાં સ્નાન કરવાથી બધા પાપ ધોવાઈ જાય છે. આધ્યાત્મિકતા, જ્યોતિષ, સંસ્કૃતિ, ધર્મ, પરંપરા અને આધુનિક ટેકનોલોજી... આ બધાનો સંગમ પ્રયાગરાજમાં ગંગા, યમુના અને અદ્રશ્ય સરસ્વતી સાથે જોઈ શકાય છે.

આ મેળામાં લાખો વિદેશીઓ સહિત 40 કરોડથી વધુ લોકો હાજરી આપે તેવી અપેક્ષા

12 વર્ષ પછી આયોજિત 45 દિવસના આ મેળામાં લાખો વિદેશીઓ સહિત 40 કરોડથી વધુ લોકો હાજરી આપે તેવી અપેક્ષા છે. આ ઉપરાંત, સંતોનો દાવો છે કે આ મહાકુંભ 144 વર્ષ પછી એક ખાસ સંયોગથી આયોજિત થઈ રહ્યો છે જેના કારણે તે ભક્તો માટે વધુ શુભ બન્યો છે. આ જ કારણ છે કે પ્રયાગરાજમાં આ મહાકુંભમાં લોકોની ભારે ભીડ એકઠી થઈ છે.

'જય ગંગા મૈયા' ના નારા સાથે ભક્તોએ સ્નાન કર્યું

હિમાલય પર તપસ્યા કરનારા રાખથી ઢંકાયેલા સાધુઓ, દેશ-વિદેશના ધાર્મિક લોકો, સૌથી મોટા ધાર્મિક મેળાવડાના સાક્ષી બનવા આતુર ભક્તો સાથે મહાકુંભ દરેકને આકર્ષી રહ્યો છે. મહાકુંભમાં 13 સંતોના અખાડાઓએ ભાગ લીધો છે. પોષ પૂર્ણિમા નિમિત્તે, મેળાની ઔપચારિક શરૂઆત પ્રભાતના અંધકારમાં શંખ નાદ અને ભજન સાથે થઈ ગઇ છે. વિશાળ સંગમ વિસ્તારમાં ભારે ઉત્સાહ સ્પષ્ટપણે દેખાઈ રહ્યો હતો. ભક્તો 'જય ગંગા મૈયા', 'હર હર મહાદેવ' અને 'જય શ્રી રામ' ના નારા લગાવતા પાણી તરફ આગળ વધી રહ્યા છે.

અમેરિકાના માઈકલ 'બાબા મોક્ષપુરી' બન્યા

ભૂતપૂર્વ યુએસ આર્મી સૈનિકમાંથી સાધુ બનેલા માઈકલ જુના અખાડામાં જોડાયા છે અને હવે તેઓ 'બાબા મોક્ષપુરી' તરીકે ઓળખાય છે. પોતાની પરિવર્તનની સફર વિશે વાત કરતાં તેમણે કહ્યું, 'હું એક સરળ વ્યક્તિ હતો જેનો પરિવાર અને કારકિર્દી હતી. પણ મને સમજાયું કે જીવનમાં કંઈ કાયમી નથી, તેથી મેં મુક્તિ શોધવાનું શરૂ કર્યું. પ્રયાગરાજમાં આ મારો પહેલો મહાકુંભ છે. અહીંની આધ્યાત્મિક ઉર્જા અસાધારણ છે. બ્રાઝિલના એક ભક્તે કહ્યું, 'હું બ્રાઝિલમાં યોગ કરું છું. હું અહીં 'મોક્ષ' ની શોધમાં આવ્યો છું. આ ખૂબ જ ખાસ છે... 144 વર્ષમાં એકવાર. સનાતન ધર્મ મારા જીવનનું મિશન છે અને તેણે મારું જીવન બદલી નાખ્યું. તેનાથી દુનિયા અને મારા પરિવાર પ્રત્યેનો મારો દૃષ્ટિકોણ બદલાઈ ગયો. જય શ્રી રામ.

'મહાકુંભ ભારતના કાલાતીત આધ્યાત્મિક વારસાનું પ્રતીક છે અને શ્રદ્ધા અને સંવાદિતાનો ઉત્સવ છે.': PM Modi

મેળામાં સ્પેનની જુલી પણ ભીડમાં સામેલ હતી. તેણીએ કહ્યું, 'આ પવિત્ર સ્થળ પર પવિત્ર નદીમાં ડૂબકી લગાવવાની તક મળી તે બદલ હું કૃતજ્ઞતા અનુભવું છું.' હું ખૂબ આનંદી થઇ ગઇ છું. મહાકુંભ પરના પોતાના સંદેશમાં, વડા પ્રધાન નરેન્દ્ર મોદીએ ઇન્સ્ટાગ્રામ પર એક પોસ્ટમાં કહ્યું કે મહાકુંભ અસંખ્ય લોકોને શ્રદ્ધા, ભક્તિ અને સંસ્કૃતિના પવિત્ર સંગમમાં એકત્ર કરે છે. તેમણે કહ્યું, 'મહાકુંભ ભારતના કાલાતીત આધ્યાત્મિક વારસાનું પ્રતીક છે અને શ્રદ્ધા અને સંવાદિતાનો ઉત્સવ છે.'

આ પણ વાંચો: મહાકુંભ શરૂ... ₹2000000000000 થી વધુના વ્યવસાયની અપેક્ષા