પાલીતાણાની ઘટના મુદ્દે જૈન સમાજ રેલી યોજશે,ગૃહમંત્રી અને મુખ્યમંત્રીને રજૂઆત કરાશે

પાલીતાણામાં ભગવાન આદિનાથના પગલાને થેયલા નુકસાન મુદ્દે અમદાવાદમાં પાલડી ઓપેરા સંઘ ખાતે જૈન સંઘોની તાકીદની બેઠક મળી હતી. આ બેઠકમાં એલિસબ્રિજના ધારાસભ્ય અમિત શાહ પણ હાજર રહ્યા હતા. બેઠકમાં જૈન સમાજના આગેવાનોએ આ મુદે કાયમી ઉકેલ આવે તે પ્રકારે આગામી દિવસોમાં રજૂઆતો કરવા તેમજ પગલા લેવાનો નિર્ણય કર્યો હતો. 

આ અંગે ધારાસભ્ય અને જૈન અગ્રણી અમિત શાહે ગુજરાત ફર્સ્ટને જણાવ્યુ કે જે રીતે પગલાને નુકસાન કરાયુ છે તેનાથી જૈન સમાજમાં આક્રોશ છે. આ સમસ્યાનો ઉકેલ લાવવાનું નક્કી કરાયુ છે. આ માટે ગૃહમંત્રી હર્ષ સંઘવી અને મુખ્યમંત્રીને રજૂઆત કરાશે. ગૃહમંત્રીએ આ વાતની જાણ થતા જ તાત્કાલિક જ ગાંધીનગર ખાતે તાકીદની બેઠક બોલાવી હતી. પાલીતાણામાં કેટલાક તત્વો જૈનોને પરેશાન કરી રહ્યા છે અને વૈમનસ્ય ફેલાવી રહ્યા છે જે હવે કાયમી ધોરણે બંધ થાય તેવી માગણી આજની બેઠકમાં કરવામાં આવી છે. આ માટે રજૂઆતો તેમજ રેલીનું આયોજન કરવા આગેવાનો વિચારી રહ્યા છે.