ગોંડલ: ભાઈ-બહેનનો પવિત્ર તહેવાર રક્ષાબંધનની ઉજવણી ગોંડલની રોટરી ક્લબ દ્વારા મહારાજા શ્રી ભગવતસિંહજી બાલાશ્રમની બાળાઓ સાથે ઉત્સાહપૂર્વક કરવામાં આવી હતી. રોટરી ક્લબ ઓફ ગોંડલ, જે અનેક સેવાકીય પ્રવૃત્તિઓ માટે જાણીતી છે, તે દર વર્ષની જેમ આ વર્ષે પણ બાલાશ્રમની દીકરીઓના હાથે રક્ષાસૂત્ર બંધાવીને આ તહેવારની ઉજવણી કરે છે. છેલ્લા 15 વર્ષથી આ પરંપરા અવિરત ચાલુ છે, જે ભાઈ-બહેનના અતૂટ સંબંધને ઉજાગર કરે છે.

બાલાશ્રમની બાળાઓના હાથે રાખડી બંધાવી તેમના આશીર્વાદ લીધા

રોટરી ક્લબના સભ્યો અને તેમના પરિવારજનોએ બાલાશ્રમની બાળાઓના હાથે રાખડી બંધાવી તેમના આશીર્વાદ લીધા અને મીઠાઈઓ વહેંચીને તહેવારની ખુશીને બેવડી કરી હતી. આ કાર્યક્રમમાં બાલાશ્રમની 9 બાળાઓ અને બહેનોને ખાસ ભેટ-સોગાદો આપવામાં આવી જેમાં ડ્રેસ, જ્વેલરી સેટ, સાડી, ચંપલ, મેકઅપ કીટ, કટલરી કીટ અને ચોકલેટ બોક્સનો સમાવેશ થતો હતો.

આ પણ વાંચો-Junagadh : ઘોર નિંદ્રામાં સૂતેલા તંત્રને જગાડવા યુવક પોતે કચેરીનાં ગેટ સામે સુઈ ગયો! જુઓ Viral Video

વૃદ્ધાશ્રમના સભ્યો માટે ભોજનની વ્યવસ્થા

રોટરી ક્લબના સભ્ય કેતન રૈયાણીએ ઇમિટેશન જ્વેલરી સેટ, યોગેશભાઈ રૈયાણીએ શૃંગાર કીટ, ભાવેશભાઈ રૈયાણીએ સાડીઓ અને જલ્પેશ રૈયાણીએ ચોકલેટ બોક્સનું દાન આપ્યું. આ ઉપરાંત, રોટરી ક્લબે બાળાઓ અને વૃદ્ધાશ્રમના સભ્યો માટે ભોજનની વ્યવસ્થા પણ કરી, જેમાં સૌએ સાથે મળીને ભોજનનો આનંદ માણ્યો.

કાર્યક્રમ દરમિયાન રોટરી ક્લબના સભ્ય યોગેન્દ્રભાઈ જોશીએ પ્રાસંગિક પ્રવચન આપીને ક્લબની સેવાકીય પ્રવૃત્તિઓ વિશે માહિતી આપી. આ કાર્યક્રમના પ્રોજેક્ટ ચેરમેન મનસુખલાલ રૂપારેલીયા અને મહેન્દ્રભાઈ સોજીત્રા હતા, જેમણે સૌ સભ્યોના સહયોગથી કાર્યક્રમને સફળ બનાવ્યો હતો.

આ પણ વાંચો-રક્ષાબંધન સ્પેશ્યલ: બહેનનું અનોખું રક્ષાસૂત્ર; કિડની દાન કરી ભાઈને આપ્યું નવું જીવન

ભાજપના અગ્રણીઓ ઉપસ્થિત રહીને બહેનોના લીધા આશીર્વાદ

ભાજપના અગ્રણી મનસુખભાઈ સખીયા, આસિસ્ટન્ટ ગવર્નર પ્રતિકભાઈ સાંગરાજકા, ક્લબના પ્રમુખ અંકુરભાઈ રૈયાણી, સેક્રેટરી નૈમિશભાઈ ભેંસાણીયા સહિત અન્ય સભ્યો જેવા કે ચેતન કોટડીયા, જયેશ કાવઠીયા, જીતેન્દ્ર માંડલીક, જ્યોતિન જસાણી, જલ્પેશભાઈ રૈયાણી, જયભાઈ ભાણવડીયા, ભાવેશભાઈ રૈયાણી, હિરેનભાઈ રૈયાણી, હરેશભાઈ રૈયાણી, વિજયભાઈ વાડોદરિયા અને રાજુભાઈ આસોદરિયા ઉપસ્થિત રહ્યા હતા.

આ કાર્યક્રમ રક્ષાબંધનના પર્વની ભાવનાને મજબૂત કરવા સાથે સમાજસેવાનું ઉત્તમ ઉદાહરણ બની રહ્યો. બાલાશ્રમની બાળાઓએ રાખડી બાંધીને રોટરી ક્લબના સભ્યોને ભાઈઓ તરીકે સ્વીકાર્યા, જ્યારે રોટરી ક્લબે તેમના માટે ભેટો અને ભોજનની વ્યવસ્થા કરીને બહેનોનું સન્માન કર્યું. આ ઉજવણીએ ભાઈ-બહેનના પ્રેમની સાથે સમાજ પ્રત્યેની જવાબદારીને પણ ઉજાગર કરી હતી.

અહેવાલ: વિશ્વાસ ભોજાણી, ગોંડલ

આ પણ વાંચો-Ahmedabad : બાપુનગરનાં વૃંદાવન ફ્લેટમાં મકાનની છત ધરાશાયી, મહિલાને ઇજા