VADODARA : 74 વર્ષિય દુષકર્મીની મેડિકલ તપાસ અમદાવાદમાં કરાશે, જાણો કારણ
VADODARA : વડોદરા (VADODARA) માં ઢળતી ઉંમરે વૃદ્ધે શાદીડોટ.કોમ નામની મેટ્રીમોની વેબસાઇટ પરથી પરિચયમાં આવેલી મહિલા જોડે હોટલમાં દુષકર્મ આચર્યું હોવાનો કિસ્સો સપાટી પર આવતા ચકચાર મચી જવા પામી હતી. ઘટના અંગે સયાજીગંજ પોલીસ મથક (SAYAJIGUNJ POLICE STATION) માં ફરિયાદ નોંધાવા પોલીસે તુરંત એક ટીમને મહારાષ્ટ્ર જવા રવાના કરી હતી. ટીમે ગણતરીના કલાકોમાં જ દુષકર્મી વૃદ્ધની અટકાયત કરીને વધુ તપાસ હાથ ધરી હતી. આ મામલે વૃદ્ધનો પોટેન્સી ટેસ્ટ કરાવવા માટે વડોદરાની એસએસજી હોસ્પિટલમાં લઇ જવામાં આવ્યા હતા. જ્યાં નિષ્ફળતા મળતા આખરે વૃદ્ધને પોટેન્સી ટેસ્ટ કરાવવા માટે અમદાવાદની સિવિલ હોસ્પિટલમાં લઇ જવાનો નિર્ણય લેવામાં આવ્યો છે.
લગ્ન નક્કી કરવા માટે વડોદરાની હોટલમાં મળવાનું નક્કી કરવામાં આવ્યું હતું
26, નવે. ના રોજ શહેરના સયાજીગંજ પોલીસ મથકમાં દુષકર્મની એક ઘટના નોંધાઇ હતી. જે અંગે પ્રાપ્ત વિગતો અનુસાર, આરોપી હરીપ્રસાદ જગન્નાથ રાઠી (ઉં. 74) (રહે. એલઆઇજી, વીએચબી કોલોની શાંતિનગર, નાગપુર, મહારાષ્ટ્ર) ની પત્નીનું દેહાંત થતા તેઓ એકલવાયું જીવન જીવી રહ્યા હતા. અને જીવન સંગીનીની શોધમાં તેમણે લગ્ન વિષયક સાઇટ શાદીડોટ.કોમ પર પોતાનું રજીસ્ટ્રેશન કરાવ્યું હતું. દરમિયાન તેઓ લગ્ન વિષયક શાદીડોટ.કોમ વેબસાઇટ પર રાજકોટની 50 વર્ષિય મહિલાના સંપર્કમાં આવ્યા હતા. ધીરે ધીરે બંને વચ્ચે વોટ્સએપ થકી વાત વધી હતી. આખરે લગ્ન નક્કી કરવા માટે વડોદરાની હોટલમાં મળવાનું નક્કી કરવામાં આવ્યું હતું. જ્યાં પહેલી જ મુલાકાતમાં વૃદ્ધે મહિલાનો દેહ ચૂંથ્યો હતો. જે અંગે પીડિતાએ ફરિયાદ નોંધાવી હતી.
વૃદ્ધ દ્વારા બે દિવસ માટે હોટલનો રૂમ બુક કરાવવામાં આવ્યો હતો
ફરિયાદ બાદ આરોપી મહારાષ્ટ્રનો હોવાનું જણાઇ આવતા તુરંત ઉપરી અધિકારીની મંજૂરીથી એક ટીમ નાગપુર, મહારાષ્ટ્ર જવા માટે રવાના થઇ હતી. જ્યાંથી આરોપીને દબોચી લઇને વડોદરા લાવવામાં આવ્યો હતો. આરોપીએ તેની પુછપરછમાં ગુનો આચર્યો હોવાની કબુલાત કરી હતી. આરોપીને કોર્ટમાં રજુ કરીને તેના બે દિવસના રિમાન્ડ મેળવવામાં આવ્યા હતા. દરમિયાન વડોદરાની એસએસજી હોસ્પિટલમાં દર્દીનો પોટેન્સી ટેસ્ટ કરવામાં નિષ્ફળતા મળતા તેને હવે અમદાવાદની સિવિલ હોસ્પિટલમાં લઇ જવામાં આવશે. વૃદ્ધ દ્વારા બે દિવસ માટે હોટલનો રૂમ બુક કરાવવામાં આવ્યો હોવાનું સુત્રો જણાવી રહ્યા છે. પોલીસ દ્વારા આરોપીનો મોબાઇલ ફોન કબ્જે કરવામાં આવ્યો છે.
આ પણ વાંચો -- VADODARA : બસની બહાર ડોકિયું કરતા મોઢું ચગદાયું, ડિવાઇડર કુદીને ટ્રેલર ભટકાતા એકનું મોત