ગઢડા કોંગ્રેસમાં ભડકો, અનેક હોદ્દેદારો અને કાર્યકરો ભાજપમાં જોડાયા

આજે એક તરફ કોંગ્રેસના પૂર્વ અધ્યક્ષ રાહુલ ગાંધી ગુજરાતમાં સભા ગજવી રહ્યા છે તો બીજી તરફ ગુજરાત કોંગ્રેસના (Congress)જ કેટલાક નેતાઓ પાર્ટી છોડી રહ્યા છે. ગઢડા બેઠક પર કોંગ્રેસમાં ભૂકંપ સર્જાયો છે. ગઢડા કોંગ્રેસના પૂર્વ પ્રમુખ પ્રતાપ છેયા ભાજપમાં (BJP) જોડાયા છે. ગઢડા કોંગ્રેસના વર્તમાન પ્રમુખ મોહિત બોરીચા સહિત શહેર સમિતિના અનેક હોદેદારો કોંગ્રેસ છોડી ભાજપમાં જોડાયા છે. કેન્દ્રીય મંત્રી મનસુખ માંડવીયાની (Mansukh Mandavia) હાજરીમાં આ તમામ આગેવાનો ભાજપમાં જોડાયા હતા.

ખૂબ મોટી સંખ્યામાં પ્રતાપ છેયાની આગેવાની કાર્યકરો અને આગેવાનો સહિત સરપંચો પણ કોંગ્રેસ છોડી ભાજપમાં જોડાયા હતા. કોંગ્રેસના પાયાના કાર્યકરો અને આગેવાનો ભાજપમાં જોડતા કોંગ્રેસમાં ભૂકંપ સર્જાયા જેવી સ્થિતિ સર્જાઈ હતી. ગુજરાત પ્રદેશ કોંગ્રેસ મોવડી મંડળ સાંભળતું ન હોવાના કારણે કોંગ્રેસ છોડવાનો નિર્ણય કર્યા હોવાનું પ્રતાપ છેયાએ જણાવ્યું હતું.

ગુજરાત વિધાનસભા ચૂંટણીના બીજા તબક્કાના મતદાનને લઈ ચૂંટણી ફોર્મ પાછું ખેંચવાનો આજે અંતિમ દિવસ છે. આજે કોંગ્રસ નેતા રાહુલ ગાંધી પણ પ્રચાર અર્થે આવી રહ્યા છે. આ પહેલા એક મોટા સમાચાર સામે આવ્યા છે. દેવગઢ બારીયાના એનસીપી ઉમેદવારો ફોર્મ પરત ખેંચ્યું છે. જેને લઈ દેવગઢ બારીયામાં એનસીપી-કોંગ્રેસ ગઠબંધન વચ્ચે સોદાબાજી થઈ હોવાના સંકેત છે. કોંગ્રેસે ગઠબંધનના ભાગરૂપે ઉમેદવાર ઉભો રાખ્યો નહોતો. પરંતુ હવે એનસીપી ઉમેદવારે ફોર્મ પરત ખેંચતા સોદાબાજી થઈ હોવાની પ્રબળ આશંકા છે. હવે દેવગઢ બારીયામાં ભાજપ, આમ આદમી પાર્ટી અને અપક્ષ વચ્ચે જંગ જામશે.