રાજ્યમાં મુખ્યમંત્રીનો ચહેરો કોણ? BJP-AAPનો ચહેરો સ્પષ્ટ, કોંગ્રેસ પાર્ટીનું કોણ?

ગુજરાતમાં વિધાનસભાની ચૂંટણીને લઇને રાજકીય માહોલ ગરમાયો છે. આ વખતે કોંગ્રેસ અને ભાજપ સિવાય આમ આદમી પાર્ટી એટલે કે 'AAP' પણ રાજ્યમાં ચૂંટણી મેદાનમાં ઉતરી છે, તેથી હરીફાઈ રસપ્રદ બની છે. દરમિયાન દરેકના મનમાં પ્રશ્ન ઉઠી રહ્યો છે કે ગુજરાતમાં ભાજપ, કોંગ્રેસ અથવા આપનો વિજય થશે તો મુખ્યમંત્રી કોણ હશે?

ગુજરાત ચૂંટણીમાં આ વખતે ભાજપ, કોંગ્રેસ સિવાય આમ આદમી પાર્ટી પણ ચૂંટણી લડવાની છે. ત્યારે આ વખતની ચૂંટણી ઘણી રસપ્રદ સાબિત થાય તેવી સંભાવનાઓ છે. હાલમાં આમ આદમી પાર્ટી પૂરજોશમાં જોવા મળી રહી છે. આમ આદમી પાર્ટીનો દાવો છે કે, આ વખતે ગુજરાત બદલાવા જઈ રહ્યું છે. તો બીજી તરફ ભાજપ પણ પોતાના દમદાર પ્રચાર સાથે પોતે ગુજરાતમાં ફરી એકવાર જીત મેળવશે તેવું રટણ કરે છે. વળલી કોંગ્રેસ પાર્ટીની વાત કરીએ તો હાલમાં તે પૂરી રીતે અદ્રશ્ય હોય તેવું લાગી રહ્યુ છે. જનમુખે ચર્ચા એ પણ થઇ રહી છે કે, 2017મા જે રીકે કોંગ્રેસ પાર્ટીએ ભાજપને જબરદસ્ત ટક્કર આપી હતી તે આ વર્ષે જોવા મળે તેની સંભાવના લગભગ ના બરાબર છે. કારણ કે કોંગ્રેસ પાર્ટીના દિગ્ગજ નેતાઓ હજુ સુધી આ ચૂંટણીમાં કોઇ જ પ્રકારનો રસ ધરાવતા ન હોય તેવું સ્પષ્ટપણે દેખાઇ રહ્યું છે. વળી એવી પણ ચર્ચાઓ વેગ પકડી રહી છે કે, કોંગ્રેસ પાર્ટીને ખબર પડી ગઇ છે કે તે ગુજરાતમાં નહીં જીતી શકે એટલે તેણે પૂરું ધ્યાન ભારત જોયો યાત્રામાં રાખ્યું છે. જોકે, આ વાતમાં કેટલી સચ્ચાઇ છે તે તો સમય જ બતાવશે.

આ બધાની વચ્ચે આમ આદમી પાર્ટીએ ઇસુદાન ગઢવી (Isudan Gadhvi) ને ગુજરાતમાં પોતાના મુખ્યમંત્રી પદના ઉમેદવાર બનાવ્યા છે. થોડા દિવસો પહેલા આમ આદમી પાર્ટીએ મુખ્યમંત્રી પદના ઉમેદવાર તરીકે ઇસુદાન ગઢવીનું નામ જાહેર કર્યું છે. ઈશુદાન ગઢવી ગુજરાતની જામ ખંભાળિયા વિધાનસભા બેઠક પરથી ચૂંટણી લડશે. આ બેઠક પરથી કોંગ્રેસ પાર્ટીએ વિક્રમ માડમ તો ભાજપે મુળુભાઈ બેરાને ટિકિટ આપી છે. દિલ્હીના મુખ્યમંત્રી અરવિંદ કેજરીવાલે ઈશુદાન ગઢવીના મુખ્યમંત્રી પદના ઉમેદવાર તરીકે જાહેર થયા બાદ ટ્વીટ કર્યું છે. પોતાના ટ્વીટમાં તેમણે દાવો કર્યો હતો કે, ગુજરાતને એક સારા મુખ્યમંત્રી મળશે. 

ભાજપના દિગ્ગજ નેતા અને કેન્દ્રીય મંત્રી અમિત શાહ જણાવ્યું હતું કે, જો આવતા મહિને યોજાનારી વિધાનસભાની ચૂંટણીમાં ભાજપ બહુમતી મેળવે તો ભૂપેન્દ્ર પટેલ (Bhupendrabhai Patel) ગુજરાતના મુખ્યમંત્રી તરીકે ચાલુ રહેશે. આ નિવેદનથી સ્પષ્ટ થાય છે કે ભૂપેન્દ્ર પટેલ ભાજપના મુખ્યમંત્રી પદના ઉમેદવાર છે. ભાજપ સતત સાતમી વખત ગુજરાત વિધાનસભાની ચૂંટણી જીતવા માટે તમામ શક્ય પ્રયાસો કરી રહી છે. કોંગ્રેસ અને AAP વડાપ્રધાન નરેન્દ્ર મોદી અને અમિત શાહના ગૃહ રાજ્યમાં સતત સાતમી વખત ભાજપને જીતવા માટે પડકાર આપી રહ્યા છે.

ગુજરાતમાં વિધાનસભાની ચૂંટણી યોજાવાની છે પરંતુ કોંગ્રેસ પાર્ટીનું અહીં પ્રચાર લગભગ ના બરાબર જોવા મળી રહ્યો છે. જોકે, પાર્ટી હાલમાં ઘણી અંદરની સમસ્યાઓથી પિડીત જોવા મળી રહી છે. ઘણા કોંગ્રેસના નેતાઓ પાર્ટીથી નારાજ છે. વળી હાલમાં રાહુલ ગાંધી પણ આ ચૂંટણી પૂર્વે અહીં જોવા મળી રહ્યા નથી. જે જોશ 2017મા હતો તે હાલમાં કોંગ્રેસ પાર્ટીમાં જોવા નથી મળી રહ્યો. તે સમયે ત્રણ ચહેરા કે જે કોંગ્રેસ પાર્ટીની સાથે હતા, તેમાંથી બે (હાર્દિક પટેલ અને અલ્પેશ ઠાકોર) આજે ભાજપમાં જોડાઇ ગયા છે. વળી એક ચહેરો (જીગ્નેશ મેવાણી) આજે કોંગ્રેસ પાર્ટી સાથે સત્તાવાર રીતે જોડાઇ ગયો છે. 

ઉલ્લેખનીય છે કે, ગુજરાતમાં વિધાનસભા માટે બે તબક્કામાં ચૂંટણી યોજાઈ રહી છે. પહેલો તબક્કો 1 ડિસેમ્બરે જ્યારે બીજો 5 ડિસેમ્બરે થશે. ગુજરાત ચૂંટણીના પરિણામો 8 ડિસેમ્બરે આવશે.

આ પણ વાંચો - ગુજરાતની એવી બેઠક જ્યા એક ઉમેદવાર 3 દાયકાથી ચૂંટણી નથી હાર્યા