ખ્રિસ્તી ધર્મના સર્વોચ્ચ ગુરુ પોપ ફ્રાન્સિસનો ચોંકાવનારો ખુલાસો, કહ્યું - નન અને પાદરીઓ પણ જુએ છે Porn

કેથોલિક ચર્ચના પ્રમુખ પોપ ફ્રાન્સિસે (Pope Francis) લોકોને "ઓનલાઈન પોર્નોગ્રાફી (Online Poronography) ના જોખમો" વિશે ચેતવણી આપી હતી. તેમણે કહ્યું કે, આ એક ખામી છે કે પાદરીઓ અને નન સહિત ઘણા લોકો પોર્ન જુએ છે. પોપ નિયમિતપણે લોકોને પોર્નોગ્રાફિક કન્ટેન્ટ જોવા સામે ચેતવણી આપે છે. જૂનમાં પોપ ફ્રાન્સિસે પોર્નોગ્રાફીને "જાહેર આરોગ્ય માટે ખતરો" જાહેર કરવાની હાકલ કરી હતી. પોપ ફ્રાન્સિસ રોમમાં અભ્યાસ કરી રહેલા પાદરીઓ અને સેમિનારીઓ સાથે કેવી રીતે ડિજિટલ અને સોશિયલ મીડિયા (Social Media) નો શ્રેષ્ઠ ઉપયોગ કરવો જોઈએ તેના પર વાત કરી રહ્યા હતા.

વિશ્વના સૌથી મહાન ખ્રિસ્તી ધર્મગુરુ પોપ ફ્રાન્સિસે જે વાતનો ખુલાસો કર્યો છે તે વિશે આજે બધે ચર્ચાઓ થઇ રહી છે. તેમના જણાવ્યા અનુસાર, નન અને પાદરીઓ પણ પોર્ન જુએ છે. પોર્નોગ્રાફી હૃદયમાં દુષ્ટતા તરફ દોરી જાય છે. આપણે બધાએ તેને તુરંત જ મોબાઈલમાંથી કાઢી નાખવું જોઈએ. પોપે આ અઠવાડિયે રોમન કેથોલિક ચર્ચમાં ભાવિ ધાર્મિક નેતાઓને સંબોધતા કહ્યું કે, પાદરીઓ અને નન સામાન્ય લોકોની જેમ જ ઓનલાઈન પોર્નોગ્રાફી જુએ છે. આ એક દુષ્ટતા છે જે ઘણા લોકો, ઘણા સામાન્ય પુરુષો, ઘણી સામાન્ય સ્ત્રીઓ અને પાદરીઓ અને નનમાં છે.

તેમણે કહ્યું કે, આ રીતે સામાન્ય માણસ શેતાન બની જાય છે. ચર્ચના એક વિદ્યાર્થીએ 85 વર્ષીય પોપને પૂછ્યું કે શું ભક્તોએ સેલ ફોન જેવી આધુનિક ટેક્નોલોજીનો ઉપયોગ કરવો જોઈએ. જેનો જવાબ આપતા પોપ ફ્રાન્સિસે કહ્યું કે, તમે તેનો ઉપયોગ કરો. આનો ઉપયોગ વાતચીત કરવા અને માત્ર મદદ મેળવવા માટે કરો. એક અહેવાલ મુજબ, પોપે કહ્યું કે તેઓ આ બધામાં માત્ર ગુનાહિત પોર્નોગ્રાફીનો ઉલ્લેખ કરી રહ્યા નથી, જેમાં બાળ શોષણનો પણ સમાવેશ થાય છે. આ પહેલેથી જ ખોટું છે પરંતુ પોર્નોગ્રાફી થોડી સામાન્ય છે. પોપે કહ્યું કે, જે પાદરીઓ હવે ચર્ચનું કામ શીખી રહ્યા છે, જેમ કે તમે લોકો, તમારે તેના વિશે સાવચેત રહેવું જોઈએ. આમાં, ડિજિટલ પોર્નોગ્રાફી તે છે જેના વિશે તમે લોકો જાણતા હશો. તેમણે કહ્યું, 'શુદ્ધ હૃદય, જે દરરોજ ઈસુને શોધે છે, તે આ અશ્લીલ માહિતી પ્રાપ્ત કરી શકતું નથી. જો તમે તેને તમારા મોબાઇલ ફોનમાંથી દૂર કરી શકો છો, તો તેને દૂર કરો.'

વેટિકન સિટીએ ગયા મહિને નોબેલ પારિતોષિક વિજેતા બિશપ કાર્લોસ જિમેનિસ પર અનેક શિસ્તબદ્ધ પ્રતિબંધો લાદ્યા હતા. તેમના પર બે દાયકાથી પણ વધુ સમયથી જાતીય શોષણના આરોપો લાગી રહ્યા છે. બિશપ જિમેનિસ 1990ના દાયકામાં પૂર્વ તિમોરમાં છોકરાઓના જાતીય શોષણના આરોપોથી ઘેરાયેલા છે. વેટિકને જણાવ્યું હતું કે, જાતીય શોષણ સાથે કામ કરતી ઓફિસને 2019 માં બિશપ જિમેનિસના વર્તન વિશે ફરિયાદો મળી હતી અને એક વર્ષની અંદર તેના પર પ્રતિબંધ મૂક્યો હતો. બિશપ જિમેનિસની હિલચાલ અને સત્તાઓ લાદવામાં આવી છે અને તેને પૂર્વ તિમોરમાં સગીરો સાથે સ્વૈચ્છિક સંપર્ક કરવા પર પ્રતિબંધ છે.