જાપાન સુધી પહોંચી સુનામીની લહેરો; ખાલી કરાવ્યું ફુકુશિમા ન્યૂક્લિયર પ્લાન્ટ, 20 લાખ લોકો થશે પ્રભાવિત

• જાપાન સુધી પહોંચી સુનામીની લહેરો; ખાલી કરાવ્યું ફુકુશિમા ન્યૂક્લિયર પ્લાન્ટ, 20 લાખ લોકો થશે પ્રભાવિત

રશિયાના કામચાટકા દ્વીપકલ્પમાં બુધવારે સવારે 8.8ની તીવ્રતાનો શક્તિશાળી ભૂકંપ આવ્યો જેના કારણે પેસિફિક મહાસાગરમાં સુનામીની લહેરો ઉઠી હતી. આ લહેરોએ રશિયા, જાપાન, હવાઈ, ચિલી અને સોલોમન આઇલેન્ડ્સના કેટલાક દરીયા કિનારાના વિસ્તારોને અસર કરી છે. પેસિફિક સુનામી ચેતવણી કેન્દ્રના જણાવ્યા અનુસાર, આ લહેરો સમુદ્રના સ્તરથી 1 થી 3 મીટર સુધી ઊંચી હતી, જેના કારણે દરીયા વિસ્તારોમાં ઘરો અને ઇમારતોને નુકસાન થયું છે.

રશિયાના કામચાટકામાં ભૂકંપ બાદ સુનામીની લહેરો

બુધવારે સવારે રશિયાના કામચાટકા પ્રાયદ્વીપમાં આવેલા 8.8ની તીવ્રતાના ભૂકંપ બાદ પેસિફિક મહાસાગરમાં સુનામીની લહેરો ઉઠી, જેણે રશિયા, જાપાન, હવાઈ અને ન્યૂઝીલેન્ડના તટીય વિસ્તારોને અસર કરી હતી. જાપાન ખાસ કરીને આ સુનામીથી પ્રભાવિત થયું છે. જાપાન મીટીયોરોલોજી એજન્સીના જણાવ્યા મુજબ, 60 સેન્ટિમીટર (2 ફૂટ) ઊંચી સુનામીની પ્રથમ લહેર હોક્કાઇડોના પૂર્વીય તટ પર આવેલા નેમુરો સુધી પહોંચી છે. આ લહેરો હોક્કાઇડોથી ટોક્યો ખાડી સુધી પેસિફિક તટ સાથે દક્ષિણ તરફ આગળ વધી રહી છે.

રશિયન આઇલેન્ડ પર કટોકટી જાહેર

રશિયાના દૂર પૂર્વીય પ્રદેશ વિસ્તાર કુરિલ આઇલેન્ડ્સમાં સુનામીની લહેરોને કારણે આવેલા પૂર અને નુકસાન બાદ સ્થાનિક અધિકારીઓએ કટોકટીની જાહેરાત કરી છે. રશિયન સમાચાર એજન્સીઓના જણાવ્યા મુજબ, સખાલિન સરકારે ઉત્તરી કુરિલ જિલ્લામાં કટોકટી જાહેર કરી, જ્યાં ભૂકંપ અને સુનામીની અસર થઈ છે. કુરિલ ટાપુના મેયર એલેક્ઝાન્ડર ઓવ્સ્યાનિકોવે જણાવ્યું કે "બધા લોકોને સુરક્ષિત સ્થળે ખસેડવામાં આવ્યા છે. તમામ લોકો સુનામી સુરક્ષા ઝોનમાં છે."

જાપાનના ફુકુશિમા ન્યૂક્લિયર પ્લાન્ટ સુધી સુનામીની લહેરો

જાપાનના પેસિફિક તટ પર સુનામીની લહેરો ટકરાઈ છે. હોક્કાઇડોના ઉત્તરથી લઈને વાકાયામા પ્રાંતના દક્ષિણ સુધીના વિસ્તારોમાં લોકોને ઘર ખાલી કરીને સુરક્ષિત સ્થળે જવા આદેશ આપવામાં આવ્યો છે. જાપાનની મીટીયોરોલોજી એજન્સીના જણાવ્યા મુજબ, સુનામીની લહેરો 3 મીટર સુધી ઊંચી હોઈ શકે છે, જે રહેણાંક વિસ્તારોમાં પહોંચે તો મોટું નુકસાન કરી શકે છે.

ફુકુશિમા ન્યૂક્લિયર પ્લાન્ટ સુધી સુનામીની લહેરો પહોંચી છે, જેના કારણે પ્લાન્ટના કર્મચારીઓને ખાલી કરાવી સુરક્ષિત સ્થળે ખસેડવામાં આવ્યા છે. હાલમાં પ્લાન્ટમાં કોઈ નુકસાનના અહેવાલ નથી. 2011માં 9.0ની તીવ્રતાના ભૂકંપ બાદ આવેલી સુનામીએ ફુકુશિમા દાઇચી પ્લાન્ટમાં મોટી દુર્ઘટના સર્જી હતી, જેના કારણે સ્થાનિક અધિકારીઓની ચિંતા વધી છે.

Strong earthquake in Russia#Tsunami #earthquake #Russia #Trending #earthquakerussia #Breaking pic.twitter.com/hzTm3PytO0

— Houda (@HoudaOnX) July 30, 2025

જાપાનમાં 20 લાખ લોકોને ઘર છોડવાનો આદેશ

સુનામીના કારણે જાપાનમાં લગભગ 20 લાખ લોકોને ઘર છોડીને સુરક્ષિત સ્થળે જવા આદેશ આપવામાં આવ્યો છે. હોક્કાઇડોમાંથી આવેલા વીડિયો અને ફોટોમાં લોકો ઘરોની છત પર એકઠા થઈને મદદની ગુહાર લગાવતા જોવા મળે છે. જાપાની અધિકારીઓએ લોકોને ઉત્તરીય તટીય વિસ્તારો ખાલી કરીને ઊંચા સ્થળે જવા આદેશ આપ્યો છે.

જાપાનના વડાપ્રધાન શિગેરુ ઇશિબાએ આ સંકટ અંગે જણાવ્યું કે અધિકારીઓ સતત પરિસ્થિતિ પર નજર રાખી રહ્યા છે. રાહત અને બચાવ ટીમો પણ સતર્ક છે. ઇશિબાએ કહ્યું કે રાહત અને બચાવ કાર્યમાં પ્રથમ પ્રાથમિકતા માનવજીવન બચાવવાની રહેશે. તેમણે નાગરિકોને તટીય વિસ્તારોથી દૂર રહેવા અને ઊંચા સ્થળો પર જવા અપીલ કરી. હજી સુધી જાપાનમાં જાનમાલના નુકસાનની કોઈ પુષ્ટિ થઈ નથી.

પેરુમાં સુનામીની ચેતવણી

રશિયાના કામચાટકામાં આવેલા 8.8ની તીવ્રતાના ભૂકંપ બાદ પેરુએ પણ સુનામીની ચેતવણી જાહેર કરી છે. પેરુ નૌસેનાના સુનામી ચેતવણી કેન્દ્રએ દેશના તટીય વિસ્તારોમાં જોખમની ચેતવણી આપીને જણાવ્યું કે પરિસ્થિતિ પર નજીકથી નજર રાખવામાં આવશે. પેરુના ભૂભૌતિકી સંસ્થાનના વડા હર્નાન્ડો તવેરાના જણાવ્યા મુજબ, બુધવારે સવાર સુધી (સ્થાનિક સમય) લહેરો પેરુ સુધી પહોંચે તેવી શક્યતા છે, જેની ઊંચાઈ 3 મીટરથી વધુ નહીં હોય.

અલાસ્કાના તટ સુધી પહોંચી સુનામી

રશિયાના કામચાટકામાં આવેલા ભૂકંપ બાદ ઉઠેલી સુનામીની લહેરો અમેરિકાના અલાસ્કા સુધી પહોંચી છે. અલાસ્કાના સુનામી ચેતવણી કેન્દ્રએ જણાવ્યું કે અમચિટકા અને અદક સમુદાયોમાં એક ફૂટથી ઓછી ઊંચાઈની લહેરો જોવા મળી છે.

The sheer intensity and energy exploding from this quake. 😳

8.7 mag earthquake in #Russia. Tsunami warnings and watches. #earthquake #sismo #tsunami #breaking pic.twitter.com/OZtCEvKqdN

— Gerardo Zúñiga (@GEZUPA) July 30, 2025

અમેરિકાના તટીય વિસ્તારોમાં ભારતીયો માટે ચેતવણી

અમેરિકાના સૅન ફ્રાન્સિસ્કો સ્થિત ભારતીય મહાવાણિજ્ય દૂતાવાસે રશિયાના કામચાટકા ભૂકંપ બાદ અમેરિકામાં રહેતા ભારતીય નાગરિકો માટે સંભવિત સુનામીની સુરક્ષા ચેતવણી જાહેર કરી છે. આ ચેતવણી કેલિફોર્નિયા, અમેરિકાના અન્ય પશ્ચિમી તટીય રાજ્યો અને હવાઈમાં રહેતા ભારતીય નાગરિકો માટે છે.

ચીનના તટ સાથે સુનામી ટકરાવાની શક્યતા

ચીનના સુનામી ચેતવણી કેન્દ્રએ જણાવ્યું કે રશિયાના કામચાટકા ભૂકંપ બાદ ચીનના પૂર્વીય સમુદ્ર તટના કેટલાક ભાગોમાં 30 સેન્ટિમીટરથી 1 મીટર સુધીની લહેરો ઉઠી શકે છે. કેન્દ્રએ જણાવ્યું કે આ ચેતવણી નવીનતમ વિશ્લેષણ અને પરિણામોના આધારે આપવામાં આવી છે, જે દર્શાવે છે કે સુનામીથી ચીનના કેટલાક તટીય વિસ્તારોને નુકસાન થવાની શક્યતા છે.

હવાઈ પર 10 ફૂટ ઊંચી લહેરોનો ખતરો

અમેરિકાના હવાઈ આઇલેન્ડ્સ પર 10 ફૂટ ઊંચી સુનામી લહેરો ટકરાઈ શકે છે. હવાઈના ગવર્નર જોશ ગ્રીનના જણાવ્યા મુજબ, જાપાન અને હવાઈ વચ્ચે આવેલા મિડવે એટોલ આઇલેન્ડથી 6 ફૂટ (1.8 મીટર) ઊંચી લહેર પસાર થઈ છે. તેમણે કહ્યું કે આ લહેર નીચલા સ્તરથી ચરમ સ્તર સુધીની હતી. ગ્રીને ઉમેર્યું, "અમને હજી પણ મોટી લહેરનો ડર છે." તેઓ ત્યારે જ સ્થિતિ સ્પષ્ટ કરશે જ્યારે સંપૂર્ણ સુરક્ષાની ખાતરી થશે. હોનોલુલુના મેયરે નિવાસીઓને ઊંચા સ્થળે જવા આદેશ આપ્યો છે, જ્યારે ગવર્નર ગ્રીને લોકોને તટીય વિસ્તારો તાત્કાલિક ખાલી કરવા વિનંતી કરી છે. તેમણે કહ્યું, "આ ફક્ત એક બીચને જ નહીં, પરંતુ આખા દ્વીપસમૂહને પોતાની લપેટમાં લઈ શકે છે."

આ પણ વાંચો- CETA : યુ.કે. સાથે ભારતના આર્થિક જોડાણમાં એક મહત્વપૂર્ણ સીમાચિહ્નરૂપ કરાર