યુક્રેનને મળ્યો યુરોપિયન યુનિયનનો ટેકો, શું રશિયા સાથે યુદ્ધ ચાલુ રહેશે?

• યુક્રેનને યુરોપિયન યુનિયનનો ટેકો
• મુક્ત વિશ્વને એક નવા નેતાની જરૂર
• યુક્રેન રશિયા સાથે યુદ્ધ કરાર નહીં કરે

European Union Support Ukraine : શુક્રવારે અમેરિકી રાષ્ટ્રપતિ ડોનાલ્ડ ટ્રમ્પ અને વોલોડિમિર ઝેલેન્સકી વચ્ચેની ચર્ચા સમગ્ર વિશ્વમાં હેડલાઇન્સમાં છે. બંને દેશોના ટોચના નેતાઓ મીડિયા સામે એવી રીતે ઝઘડ્યા જાણે તેઓ શેરીઓમાં લડી રહ્યા હોય. બંનેએ એકબીજાને ખૂબ જ ઠપકો આપ્યો. ઝેલેન્સકીએ રશિયા સાથેના ટ્રમ્પના સમાધાનના પ્રસ્તાવને નકારી કાઢ્યો અને વ્હાઇટ હાઉસથી જમ્યા વિના પોતાના દેશ જવા રવાના થઈ ગયા. અમેરિકા તરફથી ધૂંધળી થતી આશાઓ વચ્ચે, યુક્રેનને યુરોપિયન યુનિયનનો ટેકો મળ્યો છે. હવે મોટો પ્રશ્ન એ છે કે શું રશિયા સાથે યુદ્ધ ચાલુ રહેશે ?

વિશ્વને એક નવા નેતાની જરૂર

ડોનાલ્ડ ટ્રમ્પ દ્વારા વોલોડીમીર ઝેલેન્સકી સાથે કરવામાં આવેલા ખરાબ વર્તન બાદ યુરોપમાં વિરોધ થઈ રહ્યો છે. યુરોપિયન યુનિયનના વિદેશી બાબતો અને સુરક્ષા નીતિના ઉચ્ચ પ્રતિનિધિ અને યુરોપિયન કમિશનના ઉપાધ્યક્ષ કાજા કલ્લાસે શનિવારે X (ટ્વિટર) પર યુરોપિયન યુનિયન વતી વિરોધ દર્શાવ્યો હતો. તેમણે કહ્યું કે યુક્રેન યુરોપ છે. તેઓ યુક્રેન સાથે ઉભા છે. યુરોપ યુક્રેનને પોતાનો ટેકો વધારશે જેથી તેઓ હુમલાખોરો સામે લડવાનું ચાલુ રાખી શકે. આજે એ સ્પષ્ટ થઈ ગયું કે મુક્ત વિશ્વને એક નવા નેતાની જરૂર છે. હવે આ પડકારનો સામનો કરવો એ યુરોપિયનો પર નિર્ભર છે.

Ukraine is Europe!
We stand by Ukraine.

We will step up our support to Ukraine so that they can continue to fight back the agressor.

Today, it became clear that the free world needs a new leader. It’s up to us, Europeans, to take this challenge.

— Kaja Kallas (@kajakallas) February 28, 2025

ટ્રમ્પે યુદ્ધના સમાધાન માટે યુક્રેન પર દબાણ કર્યું

તમને જણાવી દઈએ કે વ્હાઇટ હાઉસના ઓવલ ઓફિસમાં રાષ્ટ્રપતિ ડોનાલ્ડ ટ્રમ્પ, ઉપરાષ્ટ્રપતિ જેડી વાન્સ અને રાષ્ટ્રપતિ ઝેલેન્સકી વચ્ચે ઉગ્ર ચર્ચા થઈ હતી. આ દરમિયાન ટ્રમ્પે કહ્યું કે યુક્રેનને રશિયા સાથે યુદ્ધવિરામ સમજૂતી કરવી જોઈએ, કારણ કે આ યુદ્ધ ખોટી દિશામાં જઈ રહ્યું છે. તેમણે એમ પણ કહ્યું કે અમેરિકા માટે રશિયા અને યુક્રેન બંને સમાન દેશો છે. યુદ્ધ બંધ કરવું પડશે, નહીં તો ત્રીજું વિશ્વયુદ્ધ થઈ શકે છે.

આ પણ વાંચો : 14મી વખત પિતા બન્યા એલોન મસ્ક, પાર્ટનર શિવોન ઝિલિસે પુત્રને જન્મ આપ્યો

ઝેલેન્સકીએ ટ્રમ્પની ઓફર ફગાવી દીધી

આ અંગે વોલોડીમીર ઝેલેન્સકીએ કહ્યું કે વ્લાદિમીર પુતિને યુદ્ધ શરૂ કર્યું છે, તેથી રશિયાને યુદ્ધની કિંમત ચૂકવવી પડશે. મીડિયા રિપોર્ટ્સ અનુસાર બંને નેતાઓ વચ્ચે ખનિજ ડીલ પર ચર્ચા થઈ હતી. ઝેલેન્સકીએ ટ્રમ્પને સ્પષ્ટપણે કહ્યું કે તેઓ રશિયા સાથે યુદ્ધ કરાર નહીં કરે.

ઝેલેન્સકી યુરોપિયન યુક્રેનિયન સમિટમાં હાજરી આપશે

ઝેલેન્સકી રવિવારે લંડનમાં યુરોપિયન યુક્રેનિયન સમિટમાં હાજરી આપશે. આ એક પૂર્વનિર્ધારિત ઘટના છે, જે વ્હાઇટ હાઉસની ઘટનાઓ પછી મુખ્ય ઉદ્દેશ્ય બની ગઈ છે. ઝેલેન્સકી અહીં યુરોપિયન દેશોના રાષ્ટ્રપ્રમુખોને મળશે. યુરોપિયન દેશો માને છે કે ટ્રમ્પનું વર્તન ખોટું હતું અને તેમણે યુદ્ધનો અંત લાવવા માટે ખોટો રસ્તો પસંદ કર્યો. રશિયા ફક્ત યુક્રેન માટે સમસ્યા નથી. જો રશિયા યુક્રેનમાં સફળ થાય છે, તો તે અટકશે નહીં, આ ચિંતાનો વિષય છે. ઝેલેન્સકીને ટેકો આપનારા યુરોપિયન દેશોમાં સ્લોવેનિયા, બેલ્જિયમ, આયર્લેન્ડ, ઑસ્ટ્રિયા, કેનેડા, રોમાનિયા, ક્રોએશિયા, ફિનલેન્ડ, એસ્ટોનિયા, લાતવિયા, નેધરલેન્ડ, ફ્રાન્સ, લક્ઝમબર્ગ, પોર્ટુગલ, સ્વીડન, જર્મની, નોર્વે, ચેક રિપબ્લિક, લિથુઆનિયા, સ્પેન, પોલેન્ડ અને યુકેનો સમાવેશ થાય છે.

આ પણ વાંચો :  તમે મેળવી શકો છો અન્ય દેશની નાગરિકતા! જાણો કેવી રીતે