• અદાણી પાવરે ઇતિહાસ રચ્યો!
• અદાણી પાવરે 600 મેગાવોટ વિદર્ભ પાવરનું સંપાદન પૂર્ણ કર્યું
• 18,150 મેગાવોટની ક્ષમતા સાથે દેશની સૌથી મોટી પાવર કંપની બની

Adani Power Acquisition : અદાણી પાવર લિમિટેડ (APL) એ મહારાષ્ટ્રના નાગપુરમાં આવેલા વિદર્ભ ઇન્ડસ્ટ્રીઝ પાવર લિમિટેડ (VIPL)નું સંપાદન સફળતાપૂર્વક પૂર્ણ કર્યું છે. આ સંપાદન રૂ. 4,000 કરોડની રકમમાં નાદારી પ્રક્રિયા હેઠળ થયું છે. VIPL ની કુલ ક્ષમતા 600 મેગાવોટ છે, જેમાં 2×300 મેગાવોટના સ્થાનિક કોલસા આધારિત પાવર પ્લાન્ટનો સમાવેશ થાય છે. આ સોદાની પુષ્ટિ APL એ મંગળવારે એક નિવેદનમાં કરી હતી. આ સંપાદનથી APL ની કાર્યકારી ક્ષમતા 18,150 મેગાવોટ સુધી પહોંચી ગઈ છે, જે ભારતની સૌથી મોટી ખાનગી થર્મલ પાવર ઉત્પાદન કંપની (India's largest private thermal power generation company) તરીકે તેની સ્થિતિને વધુ મજબૂત બનાવે છે.

NCLT ની મંજૂરી અને સંપાદનની પ્રક્રિયા

આ સંપાદન યોજનાને NCLT ની મુંબઈ બેન્ચે 18 જૂન, 2025ના રોજ મંજૂરી આપી હતી. આ મંજૂરી બાદ, 7 જુલાઈ, 2025ના રોજ આ યોજનાનો સંપૂર્ણ અમલ કરવામાં આવ્યો. VIPL નો પાવર પ્લાન્ટ નાગપુર જિલ્લાના બુટીબોરી વિસ્તારમાં આવેલો છે, જે સ્થાનિક કોલસા આધારિત 2 યુનિટ ધરાવે છે. આ સંપાદન અદાણી પાવરના વિસ્તરણની રણનીતિનો એક મહત્વપૂર્ણ ભાગ છે, જેનો હેતુ ભારતની વધતી જતી વીજળીની માંગને પહોંચી વળવાનો છે.

2029-30 સુધી 30,670 MW નું લક્ષ્ય

અદાણી પાવરે 2029-30 સુધીમાં પોતાની ક્ષમતા 30,670 મેગાવોટ સુધી વધારવાનું લક્ષ્ય નક્કી કર્યું છે. આ લક્ષ્યને હાંસલ કરવા માટે કંપની દેશભરમાં બ્રાઉનફિલ્ડ અને ગ્રીનફિલ્ડ પ્રોજેક્ટ્સ પર ઝડપથી કામ કરી રહી છે. APL ના ચીફ એક્ઝિક્યુટિવ ઓફિસર એસ.બી. ખ્યાલિયાએ જણાવ્યું કે, “અમે ‘બધા માટે વીજળી’ના ભારતના વિઝનને સાકાર કરવા માટે પ્રતિબદ્ધ છીએ. સસ્તું અને વિશ્વસનીય બેઝ-લોડ પાવર દ્વારા દેશના ટકાઉ વિકાસને ટેકો આપવા અમે અમારા પોર્ટફોલિયોનો વિસ્તાર કરી રહ્યા છીએ.”

Adani Power Limited announces acquisition and resolution plan implementation of Vidarbha Industries Power Ltd. (VIPL) for an aggregate consideration of Rs 4,000 crore pic.twitter.com/Ykle4O9G9o

— ANI (@ANI) July 8, 2025

બ્રાઉનફિલ્ડ અને ગ્રીનફિલ્ડ પ્રોજેક્ટ્સ

APL હાલમાં 6 બ્રાઉનફિલ્ડ અલ્ટ્રા સુપરક્રિટિકલ થર્મલ પાવર પ્લાન્ટ્સ (USCTPP) નું નિર્માણ કરી રહી છે, જેમાં દરેકની ક્ષમતા 1,600 મેગાવોટ છે. આ પ્લાન્ટ્સ મધ્યપ્રદેશના સિંગરૌલી-મહાન, છત્તીસગઢના રાયપુર, રાયગઢ, કોરબા અને રાજસ્થાનના કવાઈમાં સ્થાપિત થઈ રહ્યા છે. આ ઉપરાંત, ઉત્તર પ્રદેશના મિર્ઝાપુરમાં 1,600 મેગાવોટનો ગ્રીનફિલ્ડ USCTPP પણ બનાવવામાં આવી રહ્યો છે. કંપનીએ છત્તીસગઢના કોરબામાં 1,320 મેગાવોટના સુપરક્રિટિકલ પાવર પ્લાન્ટના બાંધકામને પણ પુનર્જીવિત કર્યું છે, જે અગાઉ હસ્તગત કરવામાં આવ્યું હતું.

અદાણી પાવરનો વર્તમાન પોર્ટફોલિયો

અદાણી પાવર ભારતની સૌથી મોટી ખાનગી થર્મલ પાવર ઉત્પાદન કંપની છે, જે ગુજરાત, મહારાષ્ટ્ર, કર્ણાટક, રાજસ્થાન, છત્તીસગઢ, મધ્યપ્રદેશ, ઝારખંડ અને તમિલનાડુમાં 18,150 મેગાવોટની સ્થાપિત ક્ષમતા ધરાવે છે. આ ઉપરાંત, ગુજરાતમાં 40 મેગાવોટનો સૌર ઉર્જા પ્રોજેક્ટ પણ કાર્યરત છે. કંપનીનો વિસ્તરણ દ્વારા ભારતની ઊર્જા જરૂરિયાતોને પૂર્ણ કરવાનો પ્રયાસ દેશની ઊર્જા સુરક્ષા અને આર્થિક વિકાસમાં મહત્વનું યોગદાન આપી રહ્યો છે.

આ પણ વાંચો :   અદાણી ગ્રીન એનર્જીએ ભારતનો સૌથી મોટો 15,000 મેગાવોટથી વધુ સ્થાપિત નવીનીકરણીય ઉર્જા ક્ષમતા સાથે વિક્રમ સ્થાપ્યો