રાષ્ટ્રપતિ સાથે ત્રણેય સેના પ્રમુખોએ કરી મુલાકાત, જાણો શું થઇ ચર્ચા
- રાષ્ટ્રપતિ સાથે ત્રણેય સેના પ્રમુખોની મુલાકાત
- 'ઓપરેશ સિંદૂર' બાદ પ્રથમ વખત મુલાકાત કરી
- CDS અનિલ ચૌહાણ પણ રાષ્ટ્રપતિને મળ્યાં
- સેના પ્રમુખ ઉપેન્દ્ર દ્વિવેદી, નેવી ચીફ ત્રિપાઠી રહ્યાં હાજર
- વાયુસેના પ્રમુખ અમરપ્રીત સિંહ પણ રહ્યાં હાજર
- રાષ્ટ્રપતિને 'ઓપરેશન સિંદૂર' અંગે કર્યા અવગત
President Droupadi Murmu : પહેલગામમાં 26 નાગરિકોના જીવ લેનારા આતંકવાદી હુમલા (Terrorist Attack) ના જવાબમાં ભારતે 22 એપ્રિલ, 2025ના રોજ ‘Operation Sindoor’ શરૂ કર્યું, જે આતંકવાદ સામે દેશની અડગ પ્રતિબદ્ધતાનું પ્રતીક બન્યું. આ સંયુક્ત લશ્કરી કાર્યવાહી (joint military operation) માં ભારતીય સેના, નૌકાદળ અને વાયુસેનાએ પાકિસ્તાન તેમજ પાકિસ્તાન અધિકૃત કાશ્મીર (PoK)માં 9 આતંકવાદી ઠેકાણાઓને નિશાન બનાવ્યા. આ હુમલાઓમાં 100થી વધુ આતંકવાદીઓ માર્યા ગયા. ભારતે આ ઓપરેશનને “ચોક્કસ, સંયમિત અને બિન-ઉશ્કેરણીજનક” ગણાવ્યું, જેમાં પાકિસ્તાનના સિયાલકોટ, મુરીદકે, બહાવલપુર અને PoKના મુઝફ્ફરાબાદ, કોટલી તથા ભીમ્બરમાં આવેલા આતંકી અડ્ડાઓને નષ્ટ કરવામાં આવ્યા.
રાષ્ટ્રપતિ સાથે ઉચ્ચ સ્તરીય બેઠક
બુધવારે, 14 મે, 2025ના રોજ દિલ્હીના રાષ્ટ્રપતિ ભવનમાં ચીફ ઓફ ડિફેન્સ સ્ટાફ (CDS) જનરલ અનિલ ચૌહાણ, આર્મી ચીફ જનરલ ઉપેન્દ્ર દ્વિવેદી, વાયુસેના ચીફ એર ચીફ માર્શલ એ.પી. સિંહ અને નૌકાદળના વડા એડમિરલ દિનેશ કે. ત્રિપાઠીએ રાષ્ટ્રપતિ દ્રૌપદી મુર્મૂ સાથે મુલાકાત કરી. આ બેઠકમાં તેમણે ઓપરેશન સિંદૂરની વિગતો અને તેની સફળતા અંગે રાષ્ટ્રપતિને માહિતગાર કર્યા. રાષ્ટ્રપતિ ભવન દ્વારા જારી કરાયેલા એક નિવેદનમાં કહેવામાં આવ્યું છે કે, "રાષ્ટ્રપતિએ આતંકવાદનો સામનો કરવામાં ભારતીય સશસ્ત્ર દળોની બહાદુરી, સમર્પણ અને વ્યાવસાયિક કાર્યક્ષમતાની પ્રશંસા કરી. તેમણે કહ્યું કે સશસ્ત્ર દળોએ ફરી એકવાર સાબિત કર્યું છે કે રાષ્ટ્રની સુરક્ષા સર્વોપરી છે." રાષ્ટ્રપતિ મુર્મૂએ સોશિયલ મીડિયા પર આ મુલાકાતની તસવીર શેર કરતા લખ્યું કે, “સશસ્ત્ર દળોની હિંમત અને સમર્પણના કારણે ઓપરેશન સિંદૂર આતંકવાદ સામે ભારતનો જબરદસ્ત પ્રતિભાવ બન્યું.” તેમણે સેનાની બહાદુરી અને નિષ્ઠાની પ્રશંસા કરી.
Chiefs of Indian Armed Forces meet President Droupadi Murmu at Rashtrapati Bhavan, brief about Operation Sindoor
Read @ANI Story | https://t.co/2BVKMpiI4C#DroupadiMurmu #RashtrapatiBhavan #IndianArmedForces pic.twitter.com/PlN9V2aWjZ
— ANI Digital (@ani_digital) May 14, 2025
ઓપરેશન પછીની કાર્યવાહીઓ
ઓપરેશન સિંદૂર બાદ પાકિસ્તાને ભારતના લશ્કરી અને નાગરિક વિસ્તારો પર હુમલાઓ કરીને બદલો લેવાનો પ્રયાસ કર્યો. જવાબમાં, ભારતે 11 પાકિસ્તાની વાયુસેના મથકો પર ચોક્કસ હવાઈ હુમલાઓ કર્યા, જેનાથી પાકિસ્તાનની આક્રમકતાને નિયંત્રણમાં લાવવામાં મદદ મળી. આ ઘટનાઓ બાદ બંને દેશો ગોળીબાર અને લશ્કરી કાર્યવાહીઓ બંધ કરવા સંમત થયા, જે એક ટૂંકા ગાળાની શાંતિનો સંકેત આપે છે. જોકે, આ ઓપરેશન દ્વારા ભારતે આતંકવાદ સામેની પોતાની નીતિને વધુ સ્પષ્ટ અને કડક કરી છે.
આતંકવાદ સામે ભારતની નવી નીતિ
- "જો ભારત પર આતંકવાદી હુમલો થશે, તો યોગ્ય જવાબ આપવામાં આવશે. અમે અમારી પોતાની શરતો પર જવાબ આપીશું અને દરેક જગ્યાએથી આતંકવાદના મૂળને નાબૂદ કરીશું."
- "ભારત કોઈપણ પરમાણુ બ્લેકમેલ સહન કરશે નહીં. અમે પરમાણુ બ્લેકમેલની આડમાં વિકસતા આતંકવાદી ઠેકાણાઓ પર ચોક્કસ અને નિર્ણાયક હુમલાઓ કરીશું."
- "આતંકવાદને પ્રાયોજિત કરતી સરકાર અને આતંકવાદના માસ્ટરમાઇન્ડ વચ્ચે અમે ભેદ પાડીશું નહીં. ઓપરેશન સિંદૂર દરમિયાન જ્યારે પાકિસ્તાની સેનાના ઉચ્ચ અધિકારીઓ માર્યા ગયેલા આતંકવાદીઓને વિદાય આપવા આવ્યા ત્યારે દુનિયાએ ફરીથી પાકિસ્તાનનો સાચો ચહેરો જોયો. આ રાજ્ય પ્રાયોજિત આતંકવાદનો મજબૂત પુરાવો છે. અમે ભારત અને આપણા નાગરિકોને દરેક ખતરાથી બચાવવા માટે નિર્ણાયક પગલાં લેવાનું ચાલુ રાખીશું."