બિહાર વોટર લિસ્ટ રિવિઝન: 99.8% મતદારો કવર, વિરોધી પક્ષોએ પણ લીધો ઉત્સાહથી ભાગ!
બિહાર વોટર લિસ્ટ રિવિઝન: 99.8% મતદારો કવર, વિરોધી પક્ષોએ પણ લીધો ઉત્સાહથી ભાગ!
પટના, 25 જુલાઈ 2025: બિહારમાં ચૂંટણી આયોગ દ્વારા હાથ ધરાયેલ સ્પેશિયલ ઈન્ટેન્સિવ રિવિઝન (SIR) અભિયાનનું આજે ફોર્મ ભરવાનું છેલ્લું દિવસ હતું. આયોગે જણાવ્યું કે બિહારના 99.8% મતદારોને આ અભિયાન હેઠળ આવરી લેવાયા છે, જેમાં 7.23 કરોડ મતદારોએ સક્રિય ભાગીદારી દર્શાવી છે. આ પ્રક્રિયા 2025ની બિહાર વિધાનસભા ચૂંટણી પહેલાં મતદાર યાદીની ચોકસાઈ સુનિશ્ચિત કરવા માટે હાથ ધરાઈ હતી.
ચૂંટણી પંચે જણાવ્યું હતું કે 7.23 કરોડ મતદારોના ફોર્મ પ્રાપ્ત થયા છે અને તેમનું ડિજિટાઇઝેશન કરવામાં આવ્યું છે. આ બધા મતદારોના નામ ડ્રાફ્ટ મતદાર યાદીમાં સામેલ કરવામાં આવશે. બાકીના મતદારોના ફોર્મનું ડિજિટાઇઝેશન અને બીએલઓ રિપોર્ટ પણ 1 ઓગસ્ટ સુધીમાં પૂર્ણ કરવામાં આવશે. પંચે જણાવ્યું હતું કે જે મતદારોએ ફોર્મ ભર્યા નથી, જેઓ મૃત્યુ પામ્યા છે અથવા જેઓ કાયમી ધોરણે બીજા રાજ્યમાં સ્થળાંતર કરી ગયા છે તેમની યાદી 20 જુલાઈના રોજ તમામ 12 માન્ય રાજકીય પક્ષો સાથે શેર કરવામાં આવી છે.
ચૂંટણી પંચના જણાવ્યા અનુસાર, લગભગ 22 લાખ મૃત મતદારોના નામ યાદીમાં મૂકવામાં આવ્યા છે, જેમને મતદાર યાદીમાંથી દૂર કરવામાં આવશે. લગભગ 7 લાખ એવા મતદારો સામે આવ્યા છે જેમના નામ એક કરતાં વધુ સ્થળોએ નોંધાયેલા હતા. લગભગ 35 લાખ મતદારો કાં તો કાયમી સ્થળાંતર કરી ચૂક્યા છે અથવા તેમના ઠેકાણાની કોઈ જાણકારી નથી. લગભગ 1.2 લાખ મતદારોના મતગણતરી ફોર્મ હજુ સુધી પ્રાપ્ત થયા નથી.
વિરોધ કરનારી પાર્ટીઓએ પણ SIRમાં ઉત્સાહભેર લીધો ભાગ
બિહારમાં સઘન મતદાર સુધારણા પ્રક્રિયા અંગે ચોંકાવનારા તથ્યો પ્રકાશમાં આવ્યા છે. આ પ્રક્રિયાનો વિરોધ કરતા પક્ષોએ પણ મોટી સંખ્યામાં તેમના BLAs ને તૈનાત કર્યા છે. ચૂંટણી પંચના ડેટા અનુસાર, ભાજપ પછી RJD એ SIR પ્રક્રિયામાં સૌથી વધુ BLAs ને તૈનાત કર્યા. JDU ત્રીજા સ્થાને હતું અને BLA નિમણૂકોમાં કોંગ્રેસ ચોથા સ્થાને હતી. 23 જૂને SIR પ્રક્રિયા શરૂ થાય તે પહેલાં કોંગ્રેસે ફક્ત 8586 BLAs ની નિમણૂક કરી હતી. પરંતુ 25 જુલાઈએ પ્રક્રિયા પૂર્ણ થાય તે સમયે કોંગ્રેસે 17549 BLAs ની નિમણૂક કરી હતી.
SIR પ્રક્રિયાનો વિરોધ કરવા છતાં કોંગ્રેસે BLA માં 105 ટકાનો વધારો કર્યો. ભાજપના 53338 BLA આ પ્રક્રિયાનો ભાગ બન્યા. RJD ના 47506 BLA આ પ્રક્રિયામાં ભાગ લીધો. JDUના 36550 BLA એ ભાગ લીધો. SIR પ્રક્રિયાની શરૂઆતમાં ડાબેરી પક્ષોએ રસ દાખવ્યો ન હતો પરંતુ અંત સુધીમાં આ પક્ષોએ BLA ની સંખ્યામાં પણ વધારો કર્યો. બિહારમાં 12 માન્ય રાજકીય પક્ષોના કુલ 1 લાખ 60 હજાર 813 BLA સઘન મતદાર સુધારણા પ્રક્રિયાનો ભાગ બન્યા.
આ પણ વાંચો- PM મોદીની માલદીવ યાત્રા: ભારતે આપી ₹4,850 કરોડની લોન અને 72 સૈન્ય વાહનો