• Garib Rath ટ્રેનમાં આગ, મોટી દુર્ઘટના ટળી
• સરહિંદ નજીક ગરીબ રથના કોચમાં ભીષણ આગ
• ટ્રેનમાં આગ લાગતાં મુસાફરો ડરી ગયા
• ટ્રેનના S-19 કોચમાં આગ, મુસાફરો સુરક્ષિત
• સમયસૂચક મુસાફરો અને સ્ટાફથી ટળી મોટી દુર્ઘટના

Garib Rath coach fire : લુધિયાણાથી દિલ્હી જઈ રહેલી 12204 અમૃતસર-સહરસા ગરીબ રથ એક્સપ્રેસ ટ્રેનમાં શનિવારે સવારે એક મોટી દુર્ઘટના થતા ટળી ગઈ હતી. સરહિંદ રેલ્વે સ્ટેશન નજીક પહોંચતા જ ટ્રેનના એક કોચમાં ભીષણ આગ લાગતાં મુસાફરોમાં ગભરાટ અને અફરાતફરીનો માહોલ સર્જાયો હતો. જોકે, ટ્રેનના સ્ટાફ અને મુસાફરોની સમયસૂચકતાને કારણે કોઈ જાનહાનિ થઈ ન હતી.

લોકોએ ચીસો પાડી

આ ઘટના શનિવારે સવારે લગભગ 7 વાગ્યાની આસપાસ બની હતી. ગરીબ રથ ટ્રેન જ્યારે સરહિંદ રેલ્વે સ્ટેશનને પાર કરી રહી હતી, ત્યારે અચાનક કોચ નંબર S-19 માંથી ધુમાડો નીકળવાનું શરૂ થયું હતું. આ કોચમાં ખાસ કરીને ઘણા વેપારીઓ મુસાફરી કરી રહ્યા હતા. ધુમાડો વધતાં જ મુસાફરોમાં ગભરાટ ફેલાયો હતો અને લોકોએ ચીસો પાડવાનું શરૂ કરી દીધું હતું. પરિસ્થિતિ એટલી તંગ બની ગઈ કે મુસાફરોએ તાત્કાલિક ટ્રેનની ચેન ખેંચીને ટ્રેનને રોકી દીધી.

VIDEO | Sirhind, Punjab: A major train accident was averted near Sirhind railway station when a fire broke out in the Garib Rath Express travelling from Amritsar to Saharsa, just half a kilometre ahead of Ambala. The train was halted immediately after smoke was seen billowing… pic.twitter.com/vXwHoqTEJB

— Press Trust of India (@PTI_News) October 18, 2025

મુસાફરોની સમયસૂચકતા અને તાત્કાલિક કાર્યવાહી

ટ્રેન રોકાતા જ પાયલટે પણ સ્થિતિની ગંભીરતા સમજીને તાત્કાલિક તમામ મુસાફરોને કોચમાંથી નીચે ઉતરવાનો આદેશ આપ્યો હતો. ટ્રેનના મુસાફરો, જેમાં બાળકો અને સામાન સાથેના પરિવારોનો સમાવેશ થતો હતો, તેઓ હંગામો અને અંધાધૂંધી વચ્ચે પોતાનો જીવ બચાવવા માટે ઝડપથી પાટા પર ઉતર્યા હતા. કોચ ખાલી થતાં જ ધુમાડાના ગોટેગોટા અને આગની લપટો ઊંચે ઉઠવા લાગી હતી, જેણે ભયનો માહોલ વધુ વધાર્યો હતો. આસપાસના કોચના મુસાફરો પણ પરિસ્થિતિની ગંભીરતા જોઈને ટ્રેનમાંથી નીચે ઉતરી ગયા હતા અને રાહત કાર્યમાં મદદરૂપ બન્યા હતા.

આગ પર કાબૂ મેળવ્યો

સમગ્ર ઘટનાના સમાચાર મળતાં જ રેલ્વે સ્ટેશનના અધિકારીઓ, સ્ટાફ, GRP (સરકારી રેલ્વે પોલીસ), RPF (રેલ્વે પ્રોટેક્શન ફોર્સ) અને સ્થાનિક પોલીસની ટીમો ઝડપથી ઘટનાસ્થળે પહોંચી હતી. ફાયર બ્રિગેડને પણ તાત્કાલિક બોલાવવામાં આવી હતી. તમામ ટીમોએ સંયુક્ત ઓપરેશન હાથ ધરીને ભીષણ આગને સફળતાપૂર્વક ઓલવી દીધી હતી.

આગનું કારણ અને ઈજાગ્રસ્તોની સ્થિતિ

પ્રાથમિક તપાસના આધારે રેલ્વે અધિકારીઓએ જણાવ્યું છે કે આગ લાગવાનું મુખ્ય કારણ શોર્ટ સર્કિટ હોઈ શકે છે. જોકે, રેલ્વે એન્જિનિયરોની એક વિશેષ ટીમ હજુ પણ આગ લાગવાના ચોક્કસ કારણની ઊંડાણપૂર્વક તપાસ કરી રહી છે. ઉલ્લેખનીય છે કે, સૌથી રાહતની વાત એ છે કે રેલ્વે દ્વારા સત્તાવાર નિવેદન જારી કરીને પુષ્ટિ કરવામાં આવી છે કે આ ઘટનામાં કોઈ જાનહાનિ થઈ નથી. જોકે, ભયમાં નીચે ઉતરતી વખતે કેટલાક મુસાફરોને સામાન્ય ઇજાઓ થઈ હતી, જેમને તાત્કાલિક પ્રાથમિક સારવાર આપવામાં આવી હતી.

આ પણ વાંચો :   શ્રીલંકાના બૌદ્ધ મઠમાં કેબલ ટ્રેન દુર્ઘટના, એક ભારતીય સહિત 7 સાધુઓના મોત