• શિલોંગ કેસમાં સોનમની ધરપકડ
• સોનમ સહિત 3 છોકરાઓની પોલીસે કરી ધરપકડ
• રાજા રઘુવંશીની હત્યાનો આખો મામલો શું છે?

Indore Missing Couple case News : ઇન્દોરના નવપરિણીત દંપતી રાજા રઘુવંશી અને સોનમ રઘુવંશી (Raja Raghuvanshi and Sonam Raghuvanshi) ના મેઘાલયના શિલોંગમાં હનીમૂન દરમિયાન ગુમ થવાના કેસમાં હવે નવો વળાંક આવ્યો છે, જેમાં રાજાનો મૃતદેહ મળ્યા બાદ લાંબા સમયથી ગુમ રહેલી સોનમ રઘુવંશી ઉત્તર પ્રદેશના ગાઝીપુરથી મળી આવી છે. ગાઝીપુર પોલીસે સોનમની ધરપકડ કરી છે, અને આશ્ચર્યજનક રીતે, પોલીસે દાવો કર્યો છે કે સોનમ પણ રાજાની હત્યામાં સામેલ હોઈ શકે છે. આ ઘટનામાં 3 અન્ય પુરુષોની પણ ધરપકડ કરવામાં આવી છે, જે મધ્યપ્રદેશના રહેવાસી હોવાનું જાણવા મળ્યું છે. આ ઘટનાએ તપાસને નવી દિશા આપી છે, અને હવે પોલીસ આ હત્યાના પાછળના ચોક્કસ કારણોની શોધખોળ કરી રહી છે.

ગુમશુદગીથી હત્યા સુધીની ઘટના

20 મે, 2025ના રોજ લગ્ન બાદ હનીમૂન માટે શિલોંગ ગયેલા રાજા અને સોનમ 23 મેના રોજ સોહરા (ચેરાપુંજી) નજીક ડબલ ડેકર લિવિંગ રૂટ બ્રિજની મુલાકાત લીધા બાદ ગુમ થયા હતા. તેમની ભાડાની સ્કૂટર ઓસરા હિલ્સ નજીક લાવારિસ હાલતમાં મળી આવી હતી. 2 જૂનના રોજ રાજાનો મૃતદેહ એક ઊંડા કોતરમાંથી મળી આવ્યો, બીજી તરફ સોનમનો કોઈ પત્તો નહોતો. આ ઘટનાએ પરિવાર અને પોલીસમાં ચિંતા વધારી દીધી હતી. તાજેતરમાં મળી રહેલી માહિતી અનુસાર, સોનમે પોતે જ પરિવારને ફોન કરીને પોતાની હાજરીની જાણકારી આપી હતી, જેના આધારે ગાઝીપુર પોલીસે તેને એક ઢાબા પરથી કસ્ટડીમાં લીધી. ઇન્દોર પોલીસની ટીમ સોનમને લેવા ગાઝીપુર રવાના થઈ છે.

ટુરિસ્ટ ગાઈડનો ખુલાસો

આ કેસમાં એક મહત્વનો ખુલાસો માવલાખિયાતના ટુરિસ્ટ ગાઈડ આલ્બર્ટ પીડીએ કર્યો છે. તેણે જણાવ્યું કે, 23 મેના રોજ સવારે 10 વાગ્યાની આસપાસ તેણે રાજા અને સોનમને 3 અજાણ્યા પુરુષો સાથે નોંગરિયાતથી માવલાખિયાત તરફ 3,000થી વધુ પગથિયાં ચઢતા જોયા હતા. આલ્બર્ટે આ દંપતીને ઓળખી લીધું, કારણ કે એક દિવસ પહેલાં તેમણે તેમને પોતાની ગાઈડ સેવા ઓફર કરી હતી, પરંતુ દંપતીએ નમ્રતાપૂર્વક ઇનકાર કરીને બીજા ગાઈડને રાખ્યો હતો. તેમણે જણાવ્યું કે 4 પુરુષો આગળ ચાલી રહ્યા હતા, જ્યારે સોનમ પાછળ હતી, અને પુરુષો હિન્દીમાં વાતચીત કરી રહ્યા હતા. આલ્બર્ટ, જે ફક્ત ખાસી અને અંગ્રેજી સમજે છે, તેમની વાતચીત સમજી શક્યા નહોતા. આ માહિતીએ પોલીસની તપાસને નવી દિશા આપી, અને તેના આધારે 3 પુરુષોની ધરપકડ કરવામાં આવી.

પોલીસની કાર્યવાહી અને મુખ્યમંત્રીનું નિવેદન

મેઘાલયના ડીજીપી આઈ નોંગરંગે જણાવ્યું કે, રાજાની હત્યા સાથે જોડાયેલા 4 શકમંદો, જેમાં સોનમનો પણ સમાવેશ થાય છે, તેની ધરપકડ કરવામાં આવી છે. મેઘાલયના મુખ્યમંત્રી કોનરાડ સંગમાએ X પર પોસ્ટ કરીને જણાવ્યું, "મેઘાલય પોલીસે રાજા રઘુવંશી હત્યા કેસમાં 7 દિવસમાં મોટી સફળતા હાંસલ કરી છે. મધ્યપ્રદેશના 3 હુમલાખોરોની ધરપકડ થઈ છે, એક મહિલાએ આત્મસમર્પણ કર્યું છે, અને અન્ય આરોપીઓની શોધ ચાલુ છે." આ ઘટનાએ મધ્યપ્રદેશના મુખ્યમંત્રી મોહન યાદવને પણ આ મામલે CBI તપાસની માંગ કરવા પ્રેર્યા છે, અને તેમણે પરિવારને સમર્થન આપવાની ખાતરી આપી છે.

આગળની તપાસ

આ કેસમાં હજુ ઘણા પ્રશ્નો અનુત્તરિત છે. સોનમની ધરપકડ અને તેની હત્યામાં સંડોવણીનો દાવો આ ઘટનાને વધુ જટિલ બનાવે છે. 3 પુરુષોની ઓળખ અને તેમની ભૂમિકા હજુ સ્પષ્ટ થવાની બાકી છે. પોલીસ આ ઘટનાના પાછળના ઉદ્દેશ્ય અને સંજોગોની ઊંડાણપૂર્વક તપાસ કરી રહી છે, જે આ રહસ્યમય કેસને ઉકેલવામાં મદદ કરી શકે છે.

આ પણ વાંચો :  Indore Missing Couple case : ઇન્દોર દંપતીના કેસમાં ચોંકાવનારો વળાંક, સોનમ રઘુવંશીની પોલીસે કરી ધરપકડ