• જમ્મુ-કાશ્મીરના રામબનમાં ભૂસ્ખલન, 3ના મોત
• રામબનમાં ફસાઈ ગયેલી ગુજરાતની મુસાફર બસ
• કાશ્મીરમાં 50 ગુજરાતીઓ સાથેની બસ ફસાઈ
• ફસાયેલા મુસાફરોએ વીડિયો દ્વારા માંગી મદદ
• મદદ માટે વાયરલ થયો ભાવુક વીડિયો

Landslide in J&K : 20 એપ્રિલ 2025ના રોજ જમ્મુ-કાશ્મીર (Jammu and Kashmir) ના રામબન જિલ્લા (Ramban district) માં વાદળ ફાટવાની દુર્ઘટનાએ સ્થાનિક વિસ્તારમાં હાહાકાર મચાવ્યો. આ ઘટનામાં 3 લોકોના મોત થયા છે, અને ખરાબ હવામાનના કારણે ગુજરાતથી આવેલી 50 મુસાફરો (50 passengers) ની બસ રામબનમાં ફસાઈ ગઈ છે. આ બસમાં 30 મુસાફરો (30 passengers) ગાંધીનગરના અને 20 પાલનપુરના છે. ભારે વરસાદ અને ભૂસ્ખલન (heavy rains and landslides) ને કારણે રસ્તાઓ તૂટી ગયા છે, જેના પરિણામે મુસાફરો અટવાયા છે. આ ઘટનામાં ફસાયેલા એક મુસાફરે 20 એપ્રિલની સાંજે 6:35 વાગ્યે એક વીડિયો વાયરલ કરી, ગુજરાત સરકાર પાસે મદદની ભાવુક અપીલ કરી હતી. આ વીડિયોના પગલે ગુજરાત અને જમ્મુ-કાશ્મીરના વહીવટી તંત્રએ તાત્કાલિક બચાવ કામગીરી શરૂ કરી. હાલમાં મુસાફરો શ્રીનગર પરત ફરી રહ્યા છે, પરંતુ આ ઘટનાએ તેમની વ્યથાને પ્રકાશમાં લાવી છે.

વીડિયોમાં મુસાફરોની ભાવુક અપીલ

વાયરલ થયેલા વીડિયોમાં ગાંધીનગર અને પાલનપુરના મુસાફરો, જેઓ અંબીકા ટ્રાવેલ્સની બસમાં મુસાફરી કરી રહ્યા હતા, ગભરાયેલા દેખાયા. બસમાં નાનાં બાળકોથી લઈને વૃદ્ધ સુધીના લોકો સામેલ હતા. મુસાફરોએ જણાવ્યું કે લાંબા સમયથી તેઓ ખાવા-પીવા વિના છે, અને તેમની પાસે કોઈ સુવિધા ઉપલબ્ધ નથી. એક મુસાફરે આક્રંદ કરતાં કહ્યું, “અમારા બાળકો પાણીમાં બિસ્કીટ ડૂબાડીને ખાઈ રહ્યાં છે. અહીં ખાવા-પીવાનું કોઈ મોકલતું નથી, અને વિસ્તાર ખૂબ જોખમી લાગે છે. ગુજરાત સરકાર, ગમે તેમ કરીને અમને લઈ જાઓ.” આ વીડિયો સોશિયલ મીડિયા પર ઝડપથી ફેલાયો, જેના કારણે વહીવટી તંત્ર એલર્ટ થયું.

મુસાફરની વ્યથા: કેતનની વાત

ફસાયેલા મુસાફરોમાંથી એક, કેતન નામના વ્યક્તિએ વીડિયોમાં પોતાની વ્યથા વ્યક્ત કરી. તેમણે જણાવ્યું, “અમે 12 એપ્રિલે જમ્મુ-કાશ્મીરની યાત્રા માટે નીકળ્યા હતા. 19 એપ્રિલે શ્રીનગરથી પરત ફરતી વખતે ભારે વરસાદ અને ભૂસ્ખલનને કારણે રસ્તા તૂટી ગયા, અને અમે રામબનમાં ફસાઈ ગયા. અમારી પાસે ખાવા-પીવાની કોઈ સુવિધા નથી, અને સ્થાનિક વહીવટ તરફથી યોગ્ય જવાબ મળ્યો નથી. અમે 50 લોકો, જેમાં 30 ગાંધીનગર અને 20 પાલનપુરના છીએ, અમારા નાના બાળકો સાથે જોખમમાં છીએ. ગુજરાત સરકારને વિનંતી છે કે અમને સુરક્ષિત સ્થળે પહોંચાડે.”

પરિવારજનોની ચિંતા

ગાંધીનગરના સેક્ટર-14ના રહેવાસી બાબુભાઈ સોલંકીના પુત્ર યુવરાજ સોલંકીએ જણાવ્યું કે તેમના પિતા અને અન્ય સ્થાનિક લોકો આ બસમાં ફસાયા છે. “બપોરે ભૂસ્ખલનની ખબર પડી. બે કલાક પહેલાં અમારી વાત થઈ, પરંતુ ત્યારથી સંપર્ક થઈ શક્યો નથી. ક્યારેક અજાણ્યા નંબર પરથી વાત થાય છે, પરંતુ હવે કોઈ સમાચાર નથી. અમે બધા ચિંતામાં છીએ, પણ જાણવા મળ્યું છે કે તેઓ સુરક્ષિત છે.” ગાંધીનગરના સેક્ટર-14ના કિશોરભાઈ અને પુષ્પાબેન સોલંકીની પુત્રી રાજેશ્વરીબેને જણાવ્યું, “આ પ્રવાસ 12થી 24 એપ્રિલ સુધીનો હતો, અને સાણંદની એક મહિલા દ્વારા આયોજન થયું હતું. સવારે 8:30 વાગ્યે ટ્રાવેલ્સના ડ્રાઈવરના ફોનથી માતા-પિતા સાથે વાત થઈ, પરંતુ નેટવર્કની સમસ્યાને કારણે હવે સંપર્ક નથી. બપોરે તેમને ખીચડી અને નાસ્તો આપવામાં આવ્યો હતો. બસ ભૂસ્ખલનથી 1.5 કિલોમીટર દૂર ફસાઈ છે.”

વહીવટી તંત્રનો પ્રતિસાદ

વીડિયો વાયરલ થતાં જ બનાસકાંઠાના કલેક્ટર મિહિર પટેલે રામબનના કલેક્ટર અને મુસાફર કેતન સાથે સીધો સંપર્ક સાધ્યો. રામબન જિલ્લા વહીવટે બચાવ ટીમને સ્થળ પર મોકલી, અને ખાતરી આપી કે બસ ફક્ત ખરાબ હવામાન અને રસ્તાની સ્થિતિને કારણે અટકી છે. ગાંધીનગરના કલેક્ટર મેહુલ દવેએ જણાવ્યું, “ગાંધીનગરના 30 મુસાફરો સુરક્ષિત છે. અમે બનાસકાંઠા કલેક્ટર સાથે સંકલન કરી રહ્યા છીએ. ટ્રાવેલ્સ અને મુસાફરોની વિગતો એકત્ર કરવામાં આવી રહી છે.”

આ પણ વાંચો :  Landslide in J&K: 50 ગુજરાતી મુસાફરોની સલામતી માટે CM ભૂપેન્દ્ર પટેલ અને ગૃહ રાજ્યમંત્રી હર્ષ સંઘવી સતત પ્રયત્નશીલ