• Operation Sindoor : માસૂમોના મોતને ન્યાય આપતી હિંમતભરી કાર્યવાહી
• શુભમના બલિદાનનો બદલો : પાકિસ્તાનને દેશનો વળતો જવાબ
• પહેલગામથી POK સુધી, ભારતનો નિશાનચૂક પ્રહાર
• શહીદના પરિવારની ભાવુક અપીલ
• ભારતનો સંયમ અને શક્તિનો સંદેશ

India’s Airstrike on Pakistan : પહેલગામ આતંકવાદી હુમલા બાદ, ભારતે ‘Operation Sindoor’ હેઠળ પાકિસ્તાન અને પાકિસ્તાન અધિકૃત જમ્મુ-કાશ્મીર (POK) માં છુપાયેલા 9 આતંકવાદી ઠેકાણાઓ પર ચોક્કસ મિસાઇલ હુમલાઓ કરીને નોંધપાત્ર બદલો લીધો છે. આ કાર્યવાહીએ ભારતની આતંકવાદ સામેની અડગ નીતિ અને સૈન્ય શક્તિને વિશ્વ સમક્ષ રજૂ કરી છે. આ હુમલામાં કુલ 26 નાગરિકનો જીવ ગયો હતો, જેમાં શુભમ દ્વિવેદીનો પણ સમાવેશ થાય છે. તેમના પત્નીએ ભારત તરફથી થયેલા એર સ્ટ્રાઇક પર ભાવનાત્મક નિવેદન આપ્યું છે.

શુભમ દ્વિવેદીની પત્નીની ભાવનાત્મક અપીલ

પહેલગામ હુમલામાં પોતાના પતિ શુભમ દ્વિવેદીને ગુમાવનાર તેમની પત્નીએ ઓપરેશન સિંદૂરની સફળતા બાદ ભાવુક નિવેદન આપ્યું. તેમણે કહ્યું, “મારા પતિના બલિદાનનો બદલો લેવા બદલ હું વડાપ્રધાન નરેન્દ્ર મોદીનો હૃદયપૂર્વક આભાર માનું છું. મારા પરિવારને તેમના પર પૂર્ણ વિશ્વાસ હતો, અને આ કાર્યવાહીએ અમારો વિશ્વાસ મજબૂત કર્યો છે. આ મારા પતિ માટે સાચી શ્રદ્ધાંજલિ છે. મને લાગે છે કે તેઓ જ્યાં હશે, ત્યાં તેમની આત્માને શાંતિ મળી હશે.” ભારતે આ એર સ્ટ્રાઇકને ‘ઓપરેશન સિંદૂર’ નામ આપ્યું છે જેને સાંભળીને તેમની આંખો ભીની થઈ ગઈ હતી.

#WATCH | #OperationSindoor | Wife of Shubham Dwivedi who lost his life in #PahalgamTerroristAttack, says, "I want to thank PM Modi for taking revenge for my husband's death. My entire family had trust in him, and the way he replied (to Pakistan), he has kept our trust alive. This… pic.twitter.com/SbSsFcWU1k

— ANI (@ANI) May 7, 2025

સંજય દ્વિવેદીનો આભાર અને દુ:ખ

શુભમના પિતા સંજય દ્વિવેદીએ પણ આ કાર્યવાહીની પ્રશંસા કરી અને વડાપ્રધાન મોદીનો આભાર વ્યક્ત કર્યો. તેમણે જણાવ્યું કે પોતાના પુત્રની ખોટનું દુ:ખ હજુ તાજું છે, પરંતુ ભારતીય સેનાની આ નિર્ણાયક કાર્યવાહીએ તેમના હૃદયને થોડી રાહત આપી છે. તેમણે ભાવુક થઈને કહ્યું, “ભારતે મારા શુભમના મૃત્યુનો બદલો લઈને ન્યાય કર્યો છે. આ માત્ર મારા પરિવાર માટે જ નહીં, પરંતુ આખા દેશ માટે ગૌરવની વાત છે.” સંજયભાઈએ ભારતીય સેનાની બહાદુરી અને વડાપ્રધાનના નેતૃત્વની સરાહના કરી, જેના દ્વારા આતંકવાદીઓને કડક જવાબ આપવામાં આવ્યો.

પહેલગામ હુમલાની દુ:ખદ યાદ

સંજય દ્વિવેદીએ પહેલગામ હુમલાની ઘટનાને યાદ કરતાં જણાવ્યું કે, તેમનો પરિવાર પહેલગામ ફરવા ગયો હતો. શુભમ અને તેની પત્ની ‘મીની સ્વિટ્ઝર્લૅન્ડ’ તરીકે ઓળખાતા સ્થળે ઘોડેસવારી કરવા ગયા હતા. શુભમે તેમના પિતાને સાથે આવવા આગ્રહ કર્યો હતો, પરંતુ સંજયભાઈએ પત્નીની તબિયતને ધ્યાનમાં રાખીને ના પાડી હતી. તેમણે દુ:ખી હૃદયે કહ્યું, “જો અમે પણ સાથે હોત, તો કદાચ અમે પણ માર્યા ગયા હોત.” આ ઘટનાએ તેમના પરિવારને હચમચાવી દીધો છે, પરંતુ ઓપરેશન સિંદૂરની સફળતાએ તેમને ન્યાયની આશા આપી છે.

ઓપરેશન સિંદૂર: ભારતની શક્તિ અને સંયમ

ઓપરેશન સિંદૂર દ્વારા ભારતે ન માત્ર આતંકવાદી ઠેકાણાઓનો નાશ કર્યો, પરંતુ પાકિસ્તાનના સૈન્ય સ્થળોને નિશાન ન બનાવીને પોતાનો સંયમ પણ દર્શાવ્યો છે. આ કાર્યવાહીએ ભારતની રાજનૈતિક અને સૈન્ય શક્તિને વિશ્વ સમક્ષ રજૂ કરી છે, સાથે જ શુભમ દ્વિવેદી જેવા શહીદોના પરિવારોને ન્યાયનો અહેસાસ કરાવ્યો છે. આજે સવારે ભારતીય સેના આ ઓપરેશન અંગે વિગતવાર બ્રીફિંગ આપશે, જેમાં વધુ માહિતી જાહેર થવાની સંભાવનાઓ છે.

આ પણ વાંચો :  Operation Sindoor : ભારતીય સેનાએ સાબિત કર્યું - હમ સે જો ટકરાયેગા વો મિટ્ટી મે મિલ જાયેગા