• બાળપણથી RSS સાથે ઘનિષ્ઠ સંબંધ અને વ્યાપાક કામગીરી
• માધવ વિનાયક કૂલકર્ણીએ પ્રચારક તરીકે કર્યું જીવન સમર્પિત  
• વિવિધ જવાબદારીઓ અને ભાષાઓ પર પ્રભુત્વ ધરાવનારા કૂલકર્ણીની અચાનક વિદાયથી સંઘમાં શોકની લાગણી

રાષ્ટ્રીય સ્વયંસેવક સંઘ (RSS) ના એક અગ્રણી અને સમર્પિત પ્રચારક, માધવ વિનાયક કુલકર્ણી, જેમને લોકો પ્રેમથી મનુભાઈ તરીકે પણ બોલાવતા હતા, તેમનું દુઃખદ નિધન થયું છે. તેમના અવસાનથી સંઘ પરિવારમાં અનેક લોકોએ ઊંડો શોક વ્યક્ત કર્યો છે. મનુભાઈનું જીવન રાષ્ટ્ર અને સંઘ પ્રત્યેની તેમની અવિરત સેવા અને નિષ્ઠાનું ઉત્તમ ઉદાહરણ પૂરું પાડે છે.

બાળપણથી સંઘ સાથેનો સંબંધ

માધવ વિનાયક કુલકર્ણીનો જન્મ 17 મે 1938 ના રોજ મહારાષ્ટ્રના કોલ્હાપુરમાં થયો હતો. તેમનો સંઘ સાથેનો સંબંધ ખૂબ નાની ઉંમરે જ શરૂ થઈ ગયો હતો. વર્ષ 1942માં, જ્યારે તેઓ માત્ર 4 વર્ષના હતા, ત્યારે તેમના મોટા ભાઈ દ્વારા તેમનો સંઘમાં પ્રવેશ કરાવવામાં આવ્યો હતો. આ નાનકડી ઉંમરે શરૂ થયેલી સફર આજીવન ચાલી અને તેમણે સંઘના સિદ્ધાંતોને પોતાના જીવનમાં ઉતાર્યા. નાનપણથી જ તેમનામાં રાષ્ટ્રભાવના અને સામાજિક સેવાના સંસ્કારોનું સિંચન થયું હતું.

પ્રચારક તરીકેનું સમર્પિત જીવન

વર્ષ 1962થી માધવ કુલકર્ણીએ સંઘના મુખ્ય પ્રચારક તરીકેની જવાબદારી સ્વીકારી. એક પ્રચારક તરીકે, તેમણે પોતાનું જીવન સમાજ અને રાષ્ટ્રના નિર્માણ માટે સમર્પિત કર્યું. પ્રચારકનું જીવન અત્યંત કઠિન હોય છે, જેમાં વ્યક્તિ પોતાનો પરિવાર અને અંગત જીવન છોડીને સંઘના કાર્યો માટે દેશભરમાં ફરે છે. આ દરમિયાન તેમણે સંઘનું ઊંડાણપૂર્વક શિક્ષણ પણ મેળવ્યું. જેમા તેમણે 1959માં પ્રથમ વર્ષ, 1962માં દ્વિતિય વર્ષ અને 1963માં ત્રીજું વર્ષ પૂર્ણ કર્યું, જે સંઘની વિચારધારાને સમજવા અને તેને આચરણમાં મૂકવા માટે અત્યંત મહત્વપૂર્ણ છે.

વિવિધ જવાબદારીઓ અને ભાષાઓ પર પ્રભુત્વ

સંઘમાં રહીને મનુભાઈએ અનેક મહત્વપૂર્ણ જવાબદારીઓ સંભાળી હતી અને દરેક ભૂમિકામાં તેમણે પોતાની કુશળતાનો પરિચય આપ્યો. તેમણે મુખ્ય શિક્ષક, મહા વિદ્યાલય પ્રમુખ, તાલુકા, જિલ્લા અને મહાનગરના પ્રચારક જેવી વિવિધ ભૂમિકાઓ સફળતાપૂર્વક નિભાવી હતી.

મનુભાઈની એક અન્ય વિશેષતા તેમનું ભાષાઓ પરનું પ્રભુત્વ હતું. તેમને મરાઠી, હિન્દી, ગુજરાતી અને અંગ્રેજી ભાષાનું ઉત્તમ જ્ઞાન હતું. આ ભાષાકીય કૌશલ્યને કારણે તેઓ વિવિધ રાજ્યો અને સમાજના લોકો સાથે સરળતાથી જોડાઈ શકતા હતા, જેણે સંઘના કાર્યનો વ્યાપ વધારવામાં મોટી ભૂમિકા ભજવી.

સંઘ પરિવારમાં શોકની લાગણી

ઉલ્લેખનીય છે કે, માધવ વિનાયક કુલકર્ણીનું દુઃખદ અવસાન રાષ્ટ્રીય સ્વયંસેવક સંઘ માટે એક મોટી ખોટ છે. તેમનું જીવન અને કાર્ય અનેક સ્વયંસેવકો માટે પ્રેરણાદાયક રહ્યું છે. તેમણે માત્ર સંઘની વિચારધારાનો પ્રચાર જ ન કર્યો, પરંતુ પોતાના આચરણ દ્વારા એક પ્રચારકનું આદર્શ જીવન કેવું હોઈ શકે તેનું ઉદાહરણ પણ પૂરું પાડ્યું. મનુભાઈની સ્મૃતિઓ અને તેમના કાર્યો હંમેશા સંઘ પરિવારને પ્રેરણા આપતા રહેશે. તેમનું નિધન ખરેખર એક યુગનો અંત છે અને તેમના જેવા નિષ્ઠાવાન કાર્યકરની ખોટ લાંબા સમય સુધી વર્તાશે.

આ પણ વાંચો- Seventh Day School : તપાસ કમિટીની પૂછપરછ, સ્કૂલ તંત્રે 3 દિવસનો સમય માંગ્યો!