• ઉનાળાનો કહેર શરૂ: તાપમાન 45 ડિગ્રીને પાર
• ભારતમાં ગરમીનું મોજું: 21 શહેરોમાં તાપમાન 42℃થી વધુ
• દિલ્હી-યુપીમાં ભીષણ ઉકળાટ, હીટવેવનું એલર્ટ
• બાડમેરમાં રેકોર્ડ તાપમાન: 45.6℃
• હરિયાણાના 15 જિલ્લામાં ગરમીનું જબરદસ્ત મોજું
• ગુજરાતમાં ગરમ પવન અને હીટવેવની આગાહી
• ઉત્તર ભારતમાં ઉકળાટ વધ્યો, હવામાન વિભાગે આપી ચેતવણી

Heatwave Alert : એપ્રિલના પહેલા અઠવાડિયામાં ભારતના અનેક રાજ્યોમાં ગરમીની અસર સ્પષ્ટ રીતે જોવા મળી રહી છે. દિલ્હી, ઉત્તર પ્રદેશ, રાજસ્થાન, હરિયાણા, મધ્યપ્રદેશ, મહારાષ્ટ્ર, ગુજરાત અને ઓડિશા જેવા રાજ્યોમાં તાપમાન દિવસેને દિવસે વધતું જઈ રહ્યું છે. રવિવારે દેશના 5 રાજ્યોના 21 શહેરોમાં તાપમાન 42 ડિગ્રી સેલ્સિયસથી પણ વધુ નોંધાયું હતું. આ ગરમીના કારણે લોકોનું જીવન પ્રભાવિત થઈ રહ્યું છે અને હવામાન વિભાગે આગામી દિવસોમાં વધુ તીવ્ર ગરમીની ચેતવણી આપી છે.

દિલ્હીમાં તાપમાનનો ઝડપી વધારો

રાષ્ટ્રીય રાજધાની દિલ્હીમાં એપ્રિલના પ્રારંભથી જ ગરમીનો પ્રકોપ શરૂ થઈ ગયો છે. તાપમાનમાં ઝડપથી વધારો થયો છે, જે 3 ડિગ્રીથી વધીને 6.9 ડિગ્રી સુધી પહોંચી ગયો છે. હવામાન વિભાગના જણાવ્યા મુજબ, દિલ્હી-એનસીઆર વિસ્તારમાં દિવસ દરમિયાન ગરમીનું મોજું અનુભવાશે, જેના કારણે લોકોને ભારે તકલીફ પડી શકે છે. આ સાથે જ રાત્રિનું તાપમાન પણ સામાન્યથી વધુ રહેવાની આગાહી કરવામાં આવી છે, જે લોકોને રાત્રે પણ રાહત નહીં આપે. હવામાન વિભાગે જણાવ્યું છે કે, દિલ્હીમાં સવારના સમયે સપાટી પર પવનની ગતિ 8 થી 10 કિલોમીટર પ્રતિ કલાક રહેવાની સંભાવના છે. જોકે, બપોરના સમયે દક્ષિણ-પૂર્વ દિશામાંથી આવતા પવનની ગતિ ધીમે ધીમે ઘટીને 4 થી 6 કિલોમીટર પ્રતિ કલાક થઈ જશે. સાંજ અને રાત્રે પણ પવનની ગતિ 8 કિલોમીટર પ્રતિ કલાકથી ઓછી રહેવાની શક્યતા છે. આવી સ્થિતિમાં ગરમીની તીવ્રતા વધુ અનુભવાશે.

રાજસ્થાનના બાડમેરમાં રેકોર્ડબ્રેક ગરમી

રાજસ્થાનનું બાડમેર શહેર ગરમીના નવા રેકોર્ડ બનાવી રહ્યું છે. રવિવારે અહીં મહત્તમ તાપમાન 45.6 ડિગ્રી સેલ્સિયસ નોંધાયું, જે એપ્રિલના પહેલા અઠવાડિયામાં અત્યાર સુધીનું સૌથી ઊંચું તાપમાન છે. આ સામાન્યથી 6.8 ડિગ્રી વધુ છે, જે ગરમીની તીવ્રતાનો અંદાજ આપે છે. રાજસ્થાનના અન્ય ભાગોમાં પણ ગરમીનું મોજું આવવાની શક્યતા છે, જે 7 થી 10 એપ્રિલ દરમિયાન ચાલુ રહી શકે છે.

હરિયાણામાં ગરમીનું એલર્ટ

હરિયાણામાં એપ્રિલ 2025ની શરૂઆતથી ગરમીનો પ્રકોપ વધી રહ્યો છે. હવામાન વિભાગે રાજ્યના અનેક જિલ્લાઓ માટે ગરમીના મોજાની ચેતવણી જારી કરી છે. 7 થી 9 એપ્રિલ દરમિયાન સિરસા, ફતેહાબાદ, હિસાર, ભિવાની, ચરખી દાદરી, ઝજ્જર, રેવાડી, મહેન્દ્રગઢ, ગુરુગ્રામ, ફરીદાબાદ, પલવલ, મેવાત, જીંદ, રોહતક અને સોનીપત જેવા જિલ્લાઓમાં તાપમાન 40 ડિગ્રી સેલ્સિયસથી ઉપર જવાની શક્યતા છે. લોકોને ગરમીથી બચવા સાવચેતી રાખવા સૂચના આપવામાં આવી છે.

ગુજરાતમાં ગરમ પવનની આગાહી

ગુજરાતના વિવિધ ભાગોમાં 7 થી 10 એપ્રિલ દરમિયાન ગરમ પવન ફૂંકાવાની સંભાવના છે. હવામાન વિભાગે જણાવ્યું કે સૌરાષ્ટ્ર અને કચ્છના કેટલાક વિસ્તારોમાં તીવ્ર ગરમીની સ્થિતિ જોવા મળશે. આ સમયગાળા દરમિયાન તાપમાનમાં વધારો થવાથી લોકોને બહાર નીકળતી વખતે વધુ સાવધાની રાખવાની જરૂર છે.

અન્ય રાજ્યોમાં ગરમીનું મોજું

હવામાન વિભાગની આગાહી મુજબ, હિમાચલ પ્રદેશ, પંજાબ, ચંદીગઢ, મધ્ય પ્રદેશ અને પશ્ચિમ ઉત્તર પ્રદેશના અમુક વિસ્તારોમાં પણ ગરમીનું મોજું આવી શકે છે. ઉત્તર પ્રદેશમાં મહત્તમ તાપમાન સામાન્યથી વધુ રહેવાની શક્યતા છે, જ્યાં દિવસનું તાપમાન 40 ડિગ્રી સેલ્સિયસથી ઉપર રહેશે. આ સાથે રાત્રે પણ તાપમાન અસામાન્ય રીતે ઊંચું રહેવાની ધારણા છે.

આ પણ વાંચો :   Weather Update : ઉત્તર ભારતમાં ગરમી તો દક્ષિણમાં પડી શકે છે વરસાદ!