દિલ્હી રમખાણોના આરોપી ઉમર ખાલિદને બહેનના લગ્ન માટે 14 દિવસના વચગાળાના જામીન
- ઉમર ખાલિદને બહેનના લગ્ન માટે 14 દિવસના જામીન મંજૂર
- દિલ્હી રમખાણોના આરોપી ઉમર ખાલિદને વચગાળાના જામીન મળ્યા
- કોર્ટે 16 ડિસેમ્બરથી 29 ડિસેમ્બર સુધી બહેનના લગ્નમાં સામેલ થવા માટે રાહત આપી
- જામીન દરમિયાન સોશિયલ મીડિયાનો ઉપયોગ કરવા પર સંપૂર્ણ પ્રતિબંધ
- ખાલિદ માત્ર ઘરે અને લગ્ન સ્થળ પર જ હાજર રહી શકશે
Umar Khalid Interim Bail : દિલ્હીની એક અદાલતે JNU ના પૂર્વ વિદ્યાર્થી અને 2020 ના દિલ્હી રમખાણોના કાવતરાના આરોપી ઉમર ખાલિદને બહેનના લગ્નમાં હાજરી આપવા માટે 14 દિવસના વચગાળાના જામીન આપ્યા છે. જોકે, કોર્ટે સોશિયલ મીડિયાનો ઉપયોગ ન કરવા સહિતની કડક શરતો પણ લગાવી છે.
દિલ્હીની એક અદાલતે ગુરુવારે JNU (જવાહરલાલ નેહરુ યુનિવર્સિટી) ના પૂર્વ વિદ્યાર્થી અને દિલ્હી રમખાણોના કાવતરાના આરોપી ઉમર ખાલિદને તેમની બહેનના લગ્નમાં ભાગ લેવા માટે વચગાળાના જામીન મંજૂર કર્યા છે. એડિશનલ સેશન્સ જજ (ASJ) સમીર બાજપેયીએ ખાલિદને 16 ડિસેમ્બરથી 29 ડિસેમ્બર સુધી, એટલે કે કુલ 14 દિવસ માટે વચગાળાના જામીન આપ્યા છે. આ અગાઉ, ડિસેમ્બર 2024 માં ખાલિદને તેમના પિતરાઈ ભાઈના લગ્નમાં હાજરી આપવા માટે સાત દિવસના જામીન આપવામાં આવ્યા હતા.
Delhi riots conspiracy case | Karkardooma Court granted interim bail to Umar Khalid for December 16 to December 29.
He had sought interim bail to attend his sister's wedding.
The wedding is scheduled on December 27.
— ANI (@ANI) December 11, 2025
Umar Khalid Interim Bail : 27 ડિસેમ્બરે છે બહેનના લગ્ન
પ્રાપ્ત માહિતી મુજબ, ઉમર ખાલિદની બહેનના લગ્ન 27 ડિસેમ્બરના રોજ થવાના છે. કડકડડૂમા કોર્ટમાં દાખલ કરવામાં આવેલી જામીન અરજીમાં ખાલિદે 14 ડિસેમ્બરથી 29 ડિસેમ્બર સુધી જામીન માંગ્યા હતા. જોકે, કોર્ટે તેમને 14 દિવસ માટે જ રાહત આપી છે.
અદાલતે કેટલીક કડક શરતો સાથે ઉમર ખાલિદને આ રાહત આપી છે. કોર્ટે સ્પષ્ટ કહ્યું કે જામીન અવધિ દરમિયાન અરજદારને સોશિયલ મીડિયાનો ઉપયોગ કરવાની છૂટ રહેશે નહીં. તે ફક્ત તેમના પરિવારજનો, સંબંધીઓ અને મિત્રોને જ મળી શકશે. સાથે જ, કોર્ટે જણાવ્યું કે આ સમયગાળા દરમિયાન તે માત્ર પોતાના ઘરે અથવા લગ્નની વિધિઓ યોજાવાની હોય તે સ્થળો પર જ હાજર રહેશે, જેની વિગતો તેણે આપી છે.
કોર્ટે જામીન આપતા શું કહ્યું?
કેસની સુનાવણી દરમિયાન અદાલતે કહ્યું કે, 'આ વાતને ધ્યાનમાં લેતા કે લગ્ન અરજદારની સગી બહેનના છે, તેમની વચગાળાની જામીન અરજી સ્વીકારવામાં આવે છે.' અદાલતે અરજદારને રૂ. 20,000 ના વ્યક્તિગત બોન્ડ અને તેટલી જ રકમના બે જામીનદારો સાથે કેટલીક શરતો પર 16 ડિસેમ્બરથી 29 ડિસેમ્બર સુધી વચગાળાના જામીન મંજૂર કર્યા છે.
ઉલ્લેખનીય છે કે, આના એક દિવસ પહેલા 10 ડિસેમ્બરના રોજ સુપ્રીમ કોર્ટે આ જ કેસમાં ખાલિદ અને અન્ય પાંચ આરોપીઓ દ્વારા દાખલ કરવામાં આવેલી નિયમિત (રેગ્યુલર) જામીન અરજી પર પોતાનો નિર્ણય સુરક્ષિત રાખી લીધો હતો. ખાલિદની ધરપકડ 13 સપ્ટેમ્બર 2020 ના રોજ કરવામાં આવી હતી અને તેમના પર દિલ્હીમાં વર્ષ 2020 માં થયેલા રમખાણો માટે ફોજદારી કાવતરું રચવા બદલ UAPA (ગેર-કાયદેસર પ્રવૃત્તિઓ નિવારણ અધિનિયમ) હેઠળ કેસ દાખલ કરવામાં આવ્યો છે.
આ પણ વાંચો : 102 ડિગ્રી તાવ સાથે સંસદમાં પહોંચેલા કેન્દ્રિય ગૃહમંત્રી અમિતભાઇ શાહ વિરોધીઓ પર વરસ્યા