વડાપ્રધાન નરેન્દ્ર મોદીએ ટોક્યોમાં ક્વાડ
લીડર્સ સમિટમાં રશિયાનું નામ લીધું ન હતું પરંતુ યુક્રેન પર વાત કરી હતી. પીએમ
મોદીએ દુનિયાના તમામ ટોચના નેતાઓની સામે દુશ્મની ખતમ કરવાની વાત કરી હતી. તેમણે
ફરી એકવાર કહ્યું કે યુદ્ધનો અંત સંવાદ અને કૂટનીતિથી જ થઈ શકે છે. પીએમ મોદીએ
પોતાના સંબોધનમાં રશિયાનો ઉલ્લેખ નથી કર્યો પરંતુ યુક્રેન વિશે વાત કરતાં વિશ્વને
મોટો સંદેશ આપ્યો. વડાપ્રધાન નરેન્દ્ર મોદીએ મંગળવારે ટોક્યોમાં
બીજા ઈન પર્સન ક્વાડ લીડર્સ સમિટમાં યુક્રેન અને રશિયા વચ્ચે ચાલી રહેલા યુદ્ધ
વિશે વાત કરી હતી. તેમણે દુશ્મનાવટનો અંત લાવવા, સંવાદ અને મુત્સદ્દીગીરી ફરી શરૂ કરવાની હાકલ
કરી હતી. પીએમ મોદીએ ક્વાડ દેશોના નેતાઓ સાથે ચોથી વાર્તાલાપમાં ભાગ લીધો હતો, જેમાં ઓસ્ટ્રેલિયા, જાપાન અને અમેરિકા
સામેલ હતા. જેમાં યુક્રેનમાં રશિયાની સૈન્ય કાર્યવાહીની ટીકા થઈ હતી.

પીએમ મોદીએ કહ્યું કે તેઓ યુક્રેન સંઘર્ષની
વચ્ચે રાજદ્વારી માર્ગ માટે ઉભા છે, કારણ કે વિશ્વ જાણે છે કે આ યુદ્ધે બંને દેશોને
ભારે નુકસાન પહોંચાડ્યું છે અને યુરોપમાં મોટા પ્રમાણમાં માનવીય સંકટ સર્જ્યું છે.
સમિટ દરમિયાન તમામ
વૈશ્વિક નેતાઓએ મુક્ત, ખુલ્લા
અને સમાવિષ્ટ ઈન્ડો-પેસિફિક અને સાર્વભૌમત્વ, પ્રાદેશિક અખંડિતતા અને વિવાદોના શાંતિપૂર્ણ
નિરાકરણના સિદ્ધાંતોને જાળવી રાખવાની તેમની સહિયારી પ્રતિબદ્ધતાનો પુનરોચ્ચાર
કર્યો હતો. તેમણે ઈન્ડો-પેસિફિકમાં વિકાસ અને યુરોપમાં સંઘર્ષ અંગે તેમનો
પરિપ્રેક્ષ્ય રજૂ કર્યો.

મેડ ઈન ઈન્ડિયા કોરોના વેક્સીનના વખાણ

MEA અનુસાર નેતાઓએ ક્વાડ
વેક્સિન પાર્ટનરશિપ હેઠળ એપ્રિલ 2022માં થાઇલેન્ડ અને
કંબોડિયાને ભારત દ્વારા મેડ ઇન ઇન્ડિયા રસીના 525,000 ડોઝની ભેટનું
સ્વાગત કર્યું. MEA એ એક નિવેદનમાં જણાવ્યું હતું કે, જીનોમિક સર્વેલન્સ
અને ક્લિનિકલ ટ્રાયલ્સમાં સહયોગ દ્વારા પ્રાદેશિક સ્વાસ્થ્ય સુરક્ષાને વધારવા અને
વૈશ્વિક સ્વાસ્થ્ય સુરક્ષા આર્કિટેક્ચરને મજબૂત બનાવવાનો અમારો ધ્યેય છે.