Mahadev Case : હુમા કુરેશી, કપિલ શર્મા અને હિના ખાનને પણ ED નું તેડું
બોલિવૂડ એક્ટર રણબીર કપૂર બાદ હવે મહાદેવ સટ્ટાબાજી એપ કેસ (Mahadev betting app case)માં હુમા કુરેશી (Huma Qureshi) સહિત ઘણા સ્ટાર્સ ED (Enforcement Directorate)ના રડારમાં આવી ગયા છે. EDએ બોલીવુડની જાણીતી અભિનેત્રી હુમા કુરેશી, ટીવી અભિનેત્રી હિના ખાન (Hina Khan) અને પ્રખ્યાત ટીવી કોમેડિયન કપિલ શર્મા (Kapil Sharma)ને સમન્સ પાઠવ્યા છે.
અભિનેતા રણબીર કપૂરને સમન્સ જારી કરવામાં આવ્યું હતું
મહાદેવ ઓનલાઈન બુક સટ્ટા એપ કેસમાં બુધવારે અભિનેતા રણબીર કપૂરને સમન્સ જારી કરવામાં આવ્યું હતું. એન્ફોર્સમેન્ટ ડિરેક્ટોરેટ (ED) એ રણબીર કપૂરને 6 ઓક્ટોબરે સમન્સમાં હાજર થવાનો નિર્દેશ આપ્યો હતો. જોકે, હવે સમાચાર આવ્યા છે કે રણબીર હાલમાં ED સમક્ષ હાજર થવાનો ઈન્કાર કરી રહ્યો છે. અભિનેતાએ તેની સમક્ષ હાજર થવા માટે એજન્સી પાસેથી થોડા દિવસનો સમય માંગ્યો છે.
રણબીર કપૂરે સમય માંગ્યો
રણબીર કપૂરે મહાદેવ ઓનલાઈન બુક સટ્ટાબાજીની એપને લગતા પૈસાની ઉચાપતના કેસમાં હાજર રહેવા માટે વધુ સમય માંગ્યો છે. સૂત્રોના જણાવ્યા અનુસાર રણબીર કપૂરે એન્ફોર્સમેન્ટ ડિરેક્ટોરેટ પાસે હાજર થવા માટે 2 અઠવાડિયાનો સમય માંગ્યો છે. તમને જણાવી દઈએ કે મહાદેવ ઓનલાઈન ગેમિંગ એપ કેસના આરોપી સૌરભ ચંદ્રાકરના લગ્નમાં રણબીર કપૂરે હાજરી આપી હતી. આ કારણોસર EDએ તેમને પૂછપરછ માટે સમન્સ જારી કર્યા છે. રણબીર કપૂરે આ એપ્લીકેશનનો પ્રચાર કર્યો હોવાની પણ ચર્ચા છે.
આ સ્ટાર્સ પણ રડાર પર છે
અભિનેતા રણબીર કપૂર ઉપરાંત આતિફ અસલમ, રાહત ફતેહ અલી ખાન, અલી અઝગર, વિશાલ દદલાની, ટાઈગર શ્રોફ, નેહા કક્કર, એલી અવરામ, ભારતી સિંહ, સની લિયોન, ભાગ્ય શ્રી, પુલકિત, કીર્તિ ખરબંદા, નુસરત ભરૂચા આના દાયરામાં છે. EDની તપાસમાં કૃષ્ણા અભિષેકના નામના સમાચાર પણ બહાર આવી રહ્યા છે. જો સૂત્રોનું માનીએ તો આ એપને પ્રમોટ કરનારા 100થી વધુ સોશિયલ મીડિયા પ્રભાવકો પણ શંકાના દાયરામાં છે.
કૌભાંડ શું છે?
મહાદેવ ઓનલાઈન બુક બેટિંગ એપ એ ઘણી વેબસાઈટ અને એપ્સનું સિન્ડિકેટ છે. આ કંપની પર ગેરકાયદેસર સટ્ટાબાજીની વેબસાઇટ્સ પર નવા વપરાશકર્તાઓ લાવવાનો, બેનામી બેંક એકાઉન્ટ્સ અને નાણાંની ઉચાપત કરવાનો આરોપ છે. તાજેતરમાં, સપ્ટેમ્બર મહિનામાં, EDએ, મહાદેવ ઓનલાઈન લોટરી એપ કેસની તપાસ કરતી વખતે, કોલકાતા, ભોપાલ, મુંબઈ સહિત દેશના વિવિધ શહેરોમાં દરોડા પાડ્યા હતા અને 417 કરોડ રૂપિયાની સંપત્તિ જપ્ત કરી હતી. એપ સાથે જોડાયેલા ઘણા લોકોની ધરપકડ પણ કરવામાં આવી હતી. જો અહેવાલો પર વિશ્વાસ કરવામાં આવે તો આ કૌભાંડ લગભગ 5000 કરોડ રૂપિયાનું છે.
આ પણ વાંચો---ED : AAP સાંસદ સંજય સિંહને 5 દિવસના રિમાન્ડ