RCB ના આ ક્રિકેટર પર ગાઝિયાબાદની યુવતીએ લગાવ્યો જાતીય શોષણનો આરોપ, FIR દાખલ
- ક્રિકેટર યશ દયાલ સામે જાતીય શોષણનો કેસ
- ગાઝિયાબાદની ઈન્દિરાપુરમ પોલીસમાં FIR દાખલ
- લગ્નની લાલચે શોષણ કર્યાનો યુવતીનો આરોપ
- CM યોગીના કાર્યાલયમાં કરાઈ હતી રજૂઆત
- છેલ્લા 5 વર્ષથી યશ દલાલ સાથે સંબંધ હોવાનો દાવો
- અન્ય યુવતીઓ સાથે યશના સંબંધ હોવાનો આરોપ
- પીડિતાએ પોલીસ સમક્ષ અનેક પુરાવા રજૂ કર્યા
RCB Cricketer Yash Dayal : ભારતીય ક્રિકેટર અને રોયલ ચેલેન્જર્સ બેંગ્લોર (RCB)ના ઝડપી બોલર યશ દયાલ માટે તાજેતરમાં ખરાબ સમાચાર સામે આવ્યા છે. ગાઝિયાબાદના ઈન્દિરાપુરમ પોલીસ સ્ટેશનમાં તેમની સામે એક યુવતીએ જાતીય શોષણનો આરોપ લગાવતી FIR નોંધાવી છે. આ કેસ ભારતીય ન્યાય સંહિતા (BNS)ની કલમ 69 હેઠળ દાખલ કરવામાં આવ્યો છે. યુવતીનો આરોપ છે કે યશ દયાલે લગ્નની લાલચ આપીને તેનું માનસિક અને શારીરિક શોષણ કર્યું. આ ઘટના ક્રિકેટ જગતમાં ચર્ચાનો વિષય બની ગયો છે, કારણ કે યશે તાજેતરમાં જ IPL 2025માં RCB ને ટાઇટલ જીતાડવામાં મહત્વની ભૂમિકા ભજવી હતી.
પીડિતાની ફરિયાદ અને IGRS દ્વારા રજૂઆત
પીડિત યુવતીએ ઈન્ટિગ્રેટેડ ગ્રીવન્સ રિડ્રેસલ સિસ્ટમ (IGRS) દ્વારા આ મામલે ફરિયાદ નોંધાવી હતી, જેના પગલે પોલીસે તપાસ શરૂ કરી હતી. યુવતીના જણાવ્યા અનુસાર, તે ઈન્ટરનેટ મીડિયા દ્વારા યશ દયાલના સંપર્કમાં આવી હતી. બંને વચ્ચે મિત્રતા થઈ, જે પાછળથી પ્રેમ સંબંધમાં બદલાઈ. યુવતીનો દાવો છે કે યશે લગ્નનું વચન આપીને તેની સાથે છેતરપિંડી કરી અને શોષણ કર્યું. યુવતીએ પોલીસ સમક્ષ પોતાના આરોપોને સમર્થન આપવા માટે ઘણા પુરાવા રજૂ કર્યા છે. આ ઉપરાંત, તેણે એવો પણ આરોપ લગાવ્યો છે કે યશ દયાલના અન્ય યુવતીઓ સાથે પણ સંબંધો હતા, જેનાથી તેની છેતરપિંડીનો ખુલાસો થયો.
Ghaziabad, UP: An FIR has been registered against cricketer Yash Dayal at PS Indirapuram, under BNS Section 69, on charges of sexual exploitation, physical violence, mental harassment and cheating by making false promises of marriage.
— ANI (@ANI) July 7, 2025
યશ દયાલની ક્રિકેટ કારકિર્દી
યશ દયાલ 2022થી ઈન્ડિયન પ્રીમિયર લીગ (IPL)માં રમી રહ્યો છે. તેણે પોતાની કારકિર્દીની શરૂઆત ગુજરાત ટાઇટન્સ સાથે કરી હતી, પરંતુ તેનું પ્રદર્શન નિરાશાજનક રહ્યું. ખાસ કરીને IPL 2022માં, કોલકાતા નાઈટ રાઈડર્સ (KKR) સામેની એક મેચમાં તેણે છેલ્લી ઓવરમાં 30 રન આપ્યા હતા. આ ઓવરમાં KKR ના રિંકુ સિંહે યશની ઓવરમાં 5 છગ્ગા ફટકારીને ગુજરાત ટાઇટન્સની હારનું કારણ બન્યો હતો. આ ઘટના બાદ યશની ખૂબ ટીકા થઈ હતી, અને ગુજરાત ટાઇટન્સે તેને ટીમમાંથી બહાર કરી દીધો.
RCB સાથે નવી શરૂઆત
IPL 2024 ની હરાજીમાં યશ દયાલને RCB એ 5 કરોડ રૂપિયામાં ખરીદ્યો. RCB સાથે તેણે પોતાની બોલિંગમાં નોંધપાત્ર સુધારો કર્યો. IPL 2025 માં તેણે 13 વિકેટ ઝડપી અને RCB ને પંજાબ કિંગ્સ સામે 6 રનથી જીત અપાવીને ટાઇટલ જીતવામાં મહત્વનું યોગદાન આપ્યું. યશે અત્યાર સુધી IPLની 43 મેચોમાં 41 વિકેટ ઝડપી છે. આ ઉપરાંત, ઘરેલુ ક્રિકેટમાં પણ તેનું પ્રદર્શન શાનદાર રહ્યું છે. તેણે 27 ફર્સ્ટ-ક્લાસ મેચોમાં 84 વિકેટ અને 23 લિસ્ટ-A મેચોમાં 36 વિકેટ ઝડપી છે.
પોલીસ તપાસ અને આગળની કાર્યવાહી
આ કેસમાં પોલીસે તપાસ શરૂ કરી દીધી છે, અને પીડિતા દ્વારા રજૂ કરાયેલા પુરાવાઓની તપાસ કરવામાં આવી રહી છે. આ મામલે ઉત્તર પ્રદેશના મુખ્યમંત્રી યોગી આદિત્યનાથના કાર્યાલયમાં પણ રજૂઆત કરવામાં આવી હતી, જેના પગલે પોલીસને આ કેસમાં તાત્કાલિક પગલાં લેવાની સૂચના આપવામાં આવી. યશ દયાલે હજુ સુધી આ આરોપો અંગે કોઈ સત્તાવાર નિવેદન આપ્યું નથી, પરંતુ આ ઘટનાએ તેની કારકિર્દી અને વ્યક્તિગત જીવન પર પ્રશ્નચિહ્નો ઉભા કર્યા છે.
આ પણ વાંચો : ત્રેવડી સદી ફટકાર્યા બાદ દક્ષિણ આફ્રિકાના કેપ્ટને ટેસ્ટ ક્રિકેટના ઇતિહાસનો સૌથી ખરાબ નિર્ણય લીધો