• લોર્ડ્સમાં ઓસ્ટ્રેલિયા અને દ.આફ્રિકા વચ્ચે WTC 2025 ફાઇનલ
• મેચના પહેલા દિવસે બોલરોનો કહેર અને 145 વર્ષનો ઐતિહાસિક રેકોર્ડ
• લોર્ડ્સના મેદાન પર બેટ્સમેન ફેલ, બોલર્સનો દબદબો
• 145 વર્ષમાં પહેલીવાર બંને ઓપનર્સ 0 રન પર પાછા ફર્યા!

AUS vs SA WTC Final : ઓસ્ટ્રેલિયા અને દક્ષિણ આફ્રિકા વચ્ચે વર્લ્ડ ટેસ્ટ ચેમ્પિયનની ફાઈનલ મેચ લોર્ડ્સના ઐતિહાસિક મેદાન પર રમાઇ રહી છે.  11 જૂન, 2025ના રોજ શરૂ થયેલી આ મેચના પહેલા દિવસે બોલરોએ બેટ્સમેનોને ધૂળ ચટાડી, જેમાં કાગીસો રબાડા, માર્કો જેન્સન અને મિશેલ સ્ટાર્કે અદભૂત પ્રદર્શન કર્યું. દિવસ દરમિયાન 78.4 ઓવરમાં માત્ર 255 રન બન્યા અને 14 વિકેટ પડી, જે આ મેચની રોમાંચક બનાવી દીધી છે. આ ઉપરાંત, એક અનોખી ઘટનાએ ટેસ્ટ ક્રિકેટના 145 વર્ષના ઇતિહાસમાં નવો રેકોર્ડ નોંધાવ્યો, જેણે ક્રિકેટ ચાહકોને આશ્ચર્યમાં મૂકી દીધા.

145 વર્ષનો અનોખો રેકોર્ડ

ઇંગ્લેન્ડની ધરતી પર 561 ટેસ્ટ મેચોના ઇતિહાસમાં પહેલીવાર એવું બન્યું કે બંને ટીમોના ઓપનિંગ બેટ્સમેન ખાતું ખોલ્યા વિના પેવેલિયન પરત ફર્યા. ઓસ્ટ્રેલિયાના ઉસ્માન ખ્વાજા 20 બોલ રમીને શૂન્ય રન પર કાગીસો રબાડાની ઘાતક બોલિંગનો શિકાર બન્યો. બીજી તરફ, દક્ષિણ આફ્રિકાના એડન માર્કરામ ઇનિંગની પહેલી જ ઓવરમાં મિશેલ સ્ટાર્કના બોલ પર બોલ્ડ થયો. આ ઘટનાએ લોર્ડ્સના મેદાન પર ટેસ્ટ ક્રિકેટના લાંબા ઇતિહાસમાં એક નવું પ્રકરણ ઉમેર્યું, જે ચર્ચાનો વિષય બની ગયો.

ઓસ્ટ્રેલિયન બેટિંગ લાઇનઅપ ધ્વસ્ત

દક્ષિણ આફ્રિકાના કેપ્ટન ટેમ્બા બાવુમાએ ટોસ જીતીને પહેલા બોલિંગનો નિર્ણય લીધો, જે તેમના બોલરોના પ્રદર્શનથી સાર્થક થયું. ઓસ્ટ્રેલિયન ટીમ 56.4 ઓવરમાં 212 રનમાં ઓલઆઉટ થઈ ગઈ. કાગીસો રબાડાએ 15.4 ઓવરમાં 51 રન આપીને 5 વિકેટ ઝડપી, ઓસ્ટ્રેલિયન બેટિંગ લાઇનઅપને ધ્વસ્ત કરી નાખી. માર્કો જેન્સને 3 વિકેટ લઈને તેનો શાનદાર સાથ આપ્યો, જ્યારે કેશવ મહારાજ અને એડન માર્કરામે 1-1 વિકેટ લીધી. ઓસ્ટ્રેલિયા તરફથી સ્ટીવ સ્મિથ (66) અને બ્યૂ વેબસ્ટર (72)એ 79 રનની ભાગીદારી કરી, પરંતુ છેલ્લે 5 વિકેટ માત્ર 20 રનમાં ગુમાવતાં ટીમ નબળી પડી.

રબાડાનું રેકોર્ડ-બ્રેકિંગ પ્રદર્શન

રબાડાની આ શાનદાર બોલિંગે તેને દક્ષિણ આફ્રિકાના ટેસ્ટ ઇતિહાસમાં ચોથો સૌથી વધુ વિકેટ લેનાર બોલર બનાવ્યો. 71 મેચમાં 332 વિકેટ સાથે તેણે દિગ્ગજ એલન ડોનાલ્ડ (330 વિકેટ)ને પાછળ છોડી દીધો. આ ઉપરાંત, રબાડા WTC ફાઇનલમાં 5 વિકેટ લેનાર બીજો બોલર બન્યો છે, જે અગાઉ ન્યૂઝીલેન્ડના કાયલ જેમીસન (2021)એ કર્યું હતું. તે ICC ટૂર્નામેન્ટની ફાઇનલમાં આવું કરનાર દક્ષિણ આફ્રિકાનો એકમાત્ર બોલર છે, જેમાં 1998ની ICC નોકઆઉટ ટ્રોફીમાં જેક્સ કાલિસ પછી આ સિદ્ધિ મેળવનાર તે બીજો ખેલાડી છે.

ઓસ્ટ્રેલિયાનો જોરદાર પ્રતિકાર

ઓસ્ટ્રેલિયન બોલરોએ પણ દક્ષિણ આફ્રિકાની બેટિંગને શરૂઆતથી જ તકલીફમાં મુકી દીધી હતી. મિશેલ સ્ટાર્કે ઇનિંગની પહેલી ઓવરમાં એડન માર્કરામને બોલ્ડ કરીને શાનદાર શરૂઆત કરી. તેણે રાયન રિકેલ્ટન (16)ને પણ આઉટ કર્યો. પેટ કમિન્સે વિઆન મલ્ડર (6) અને જોશ હેઝલવુડે ટ્રિસ્ટન સ્ટબ્સ (2)ને પેવેલિયન મોકલ્યા. દિવસના અંતે દક્ષિણ આફ્રિકા 43/4 પર હતું, જેમાં ટેમ્બા બાવુમા (3*) અને ડેવિડ બેડિંગહામ (8*) ક્રીઝ પર હતા. દક્ષિણ આફ્રિકા હજુ 169 રનથી પાછળ છે, અને બીજા દિવસે તેમની બેટિંગ પર નિર્ણાયક દબાણ રહેશે.

મેચના બીજા દિવસ પર સૌ કોઇની નજર

WTC 2025 ફાઇનલનો પહેલો દિવસ બોલરોના નામે રહ્યો, જેમાં રબાડા અને સ્ટાર્કે પોતાની ઝંઝાવાતી બોલિંગથી મેચને રોમાંચક બનાવી દીધી. 145 વર્ષનો ઐતિહાસિક રેકોર્ડ, રબાડાનો 5 વિકેટનો દમ અને ઓસ્ટ્રેલિયન બોલરોનો પ્રતિકાર આ મેચને યાદગાર બનાવે છે. બીજા દિવસે દક્ષિણ આફ્રિકાના બેટ્સમેનો ઓસ્ટ્રેલિયન બોલરોનો સામનો કેવી રીતે કરે છે, તે ખાસ જોવાનું રહેશે. લોર્ડ્સની આ પીચ પર બોલરોનો દબદબો યથાવત રહેવાની શક્યતા છે, જે આ ફાઇનલને વધુ રોમાંચક બનાવશે.

આ પણ વાંચો :  બોલર્સના નાકમાં દમ કરી રહ્યો છે ભારતનો આ યુવા બેટ્સમેન! પ્રેક્ટિસ મેચમાં ફટકારી દીધા 90 બોલમાં 190 રન