IND vs ENG 2nd Test : શું આજે એજબેસ્ટનમાં ભારત-ઈંગ્લેન્ડ વચ્ચે નહીં થઇ શકે મેચ?
- આજે IND vs ENG વચ્ચે બીજી ટેસ્ટ મેચ રમાશે
- ભારત માટે એજબેસ્ટનમાં ઐતિહાસિક જીતની શોધ
- IND vs ENG મેચમાં ટોસ બની શકે છે બોસ
- IND vs ENG મેચમાં વરસાદની સંભાવના
IND vs ENG 2nd Test : ભારત અને ઇંગ્લેન્ડ વચ્ચે બર્મિંગહામના એજબેસ્ટન સ્ટેડિયમ ખાતે આજથી એટલે કે 2 થી 6 જુલાઈ, 2025 દરમિયાન 5 મેચની ટેસ્ટ શ્રેણીની બીજી મેચ રમાશે. આ શ્રેણીની પહેલી મેચ લીડ્સ ખાતે રમાઈ હતી, જ્યાં ભારતીય ટીમને 5 વિકેટથી હારનો સામનો કરવો પડ્યો હતો. લીડ્સ ટેસ્ટમાં ભારતે એક તબક્કે બાજી મારી લીધી હોય તેવું લાગતું હતું, પરંતુ ઇંગ્લેન્ડે ચોથી ઇનિંગમાં 371 રનના પડકારજનક લક્ષ્યનો પીછો કરીને જીત મેળવી અને શ્રેણીમાં 1-0ની લીડ મેળવી લીધી. હવે એજબેસ્ટનમાં ભારતીય ટીમ શ્રેણીમાં 1-1ની બરાબરી કરવાના ઇરાદા સાથે ઉતરશે, જોકે આ મેદાન પર ભારતનો રેકોર્ડ નબળો રહ્યો છે, કારણ કે તેઓ અહીં હજુ સુધી એક પણ ટેસ્ટ મેચ જીતી શક્યા નથી.
એજબેસ્ટનનો ઇતિહાસ અને ભારતનો રેકોર્ડ
એજબેસ્ટન સ્ટેડિયમમાં અત્યાર સુધી 56 ટેસ્ટ મેચો રમાઈ છે, જેમાં પહેલા બોલિંગ કરનારી ટીમે 23 મેચોમાં જીત હાંસલ કરી છે, જ્યારે પહેલા બેટિંગ કરનારી ટીમે 18 મેચો જીતી છે, અને 15 મેચો ડ્રો રહી છે. આ આંકડા દર્શાવે છે કે આ મેદાન પર બોલરોને વધુ ફાયદો થઈ શકે છે, ખાસ કરીને વાદળછાયા વાતાવરણમાં. ભારતે છેલ્લે 2022માં આ મેદાન પર ટેસ્ટ મેચ રમી હતી, જ્યાં તેમને 7 વિકેટથી હારનો સામનો કરવો પડ્યો હતો. આ નબળા રેકોર્ડને તોડવા માટે ભારતીય ટીમને આ વખતે ખાસ રણનીતિ અને પ્રદર્શનની જરૂર પડશે.
— BCCI (@BCCI) July 1, 2025
હવામાનની સ્થિતિ અને ટોસનું મહત્વ
AccuWeather ના અહેવાલ મુજબ, આજે 2 જુલાઈ, 2025ના રોજ બર્મિંગહામમાં મેચના પહેલા દિવસે વરસાદની શક્યતા 82% છે, અને આકાશમાં 86% વાદળો હશે. આવા હવામાનમાં ઝડપી બોલરોને નોંધપાત્ર ફાયદો મળી શકે છે, જેના કારણે ટોસની ભૂમિકા નિર્ણાયક બની રહેશે. તાપમાનની વાત કરીએ તો, મહત્તમ તાપમાન 21 ડિગ્રી સેલ્સિયસ અને લઘુત્તમ તાપમાન 10 ડિગ્રી સેલ્સિયસની આસપાસ રહેવાની શક્યતા છે. વરસાદને કારણે મેચમાં વિક્ષેપ પડવાની આશંકા છે, જે બંને ટીમોની રણનીતિને અસર કરી શકે છે.
ભારતીય ટીમનો પડકાર
લીડ્સમાં નિરાશાજનક હાર બાદ ભારતીય ટીમ એજબેસ્ટનમાં વાપસીનો પ્રયાસ કરશે. ટીમ ઇન્ડિયાને બેટિંગ અને બોલિંગ બંને વિભાગોમાં સુધારો કરવાની જરૂર છે, ખાસ કરીને ચોથી ઇનિંગમાં લક્ષ્યનો બચાવ કરવામાં નિષ્ફળતા મળી હતી. ઇંગ્લેન્ડની ટીમ, પોતાના ઘરઆંગણે, આક્રમક બેટિંગ અને ઝડપી બોલિંગના દમ પર આગળ વધવા માગશે. ભારતે એજબેસ્ટનના ઐતિહાસિક રેકોર્ડને તોડવા માટે પોતાની રમતનું શ્રેષ્ઠ સ્તર દર્શાવવું પડશે. ખેલાડીઓની ફોર્મ, ટીમની રણનીતિ, અને હવામાનની સ્થિતિ આ મેચના પરિણામને નિર્ધારિત કરશે.
આ પણ વાંચો : માતાની બોલિંગ સામે ક્લીન બોલ્ડ થયો શ્રેયસ ઐયર, જુઓ સરપંચનો Out થતો Video